ដោយ: គង់ សិរីម៉ាលីនណា
ភ្នំពេញ: ការរីករាលដាលមេរោគកូវីដ១៩ ក្រោយព្រឹត្តិការណ៍សហគមន៍ ២០កុម្ផៈ បានធ្វើឱ្យប្រជាពលរដ្ឋ ដែលប្រកបរបររត់ម៉ូតូកង់បី និងអ្នកបម្រើតាមភោជនីយដ្ឋានប្រមាណ៨៥ ទៅ៩០ភាគរយ រងផលប៉ះពាល់វិបត្តិសេដ្ឋកិច្ចក្នុងគ្រួសារ និងថយចុះនូវប្រាក់ចំណូលប្រចាំថ្ងៃ។
លោកបណ្ឌិត គី សេរីវឌ្ឍន៍ អ្នកជំនាញផ្នែកសេដ្ឋកិច្ច បានវីភាគថា ពាក់ព័ន្ធព្រឹត្តការណ៍ ២០កុម្ភៈ ជាលក្ខណៈប្រវិត្តសាស្ត្រសម្រាប់កូវីដនៅកម្ពុជា ការរីករាលដាលសហគមន៍នេះ គឺមានទ្រង់ទ្រាយធំ ហើយទាក់ទងជាមួយក្នុងការបង្ក្រាប ឬការទប់ស្កាត់ ការបិទបញ្ចប់នៅក្នុងការឆ្លងសហគមន៍នេះ ហាក់ដូចជាមិនទាន់មានភាពកំណត់ច្បាស់នៅឡើយ ហើយអ្វីដែលធ្វើឱ្យប៉ះពាល់ ទៅដល់វិស័យសេដ្ឋកិច្ចជាងគេ គឺក្តីព្រួយបារម្ភរបស់ប្រជាពលរដ្ឋដែលមិនបានចេញក្រៅហើយពេលនោះឯង។
លោកបន្តថា “ការចាយរបស់ប្រជាពលរដ្ឋមានភាពថមថយ និងឈានទៅដល់ការធ្លាក់ចុះនៃកម្លាំងផលិតក្នុងវិស័យសេដ្ឋកិច្ច” ។ លោកបន្តថា “អ្នកប៉ះពាល់ធ្ងន់ជាងគេ គឺក្រុមផ្គត់ផ្គង់សេវាកម្ម រួមមាន ក្រុមម៉ូតូកង់បីដែលជាអ្នកមានចំណូលទាប ហើយរងផលប៉ះពាល់ស្ទើរតែ៨៥ ទៅ៩០ភាគរយ” ។
ចំណែក អ្នកដែលធ្វើការតាមភោជនីយដ្ឋាន នៅពេលដែលភោជនីយដ្ឋានត្រូវបានបិទអត់មានភ្ញៀវនោះ ក៏ជាកត្តាដែលធ្វើឱ្យប៉ះពាល់ ដល់កត្តាជីវភាពរបស់គាត់ដែរ។ រីឯអ្នកលក់ដូរមួយចំនួនតូចដែលជាអាជីវកម្មខ្នាតតូច មិនមែនគេមិនហ៊ានទិញទេ តែគេព្រួយបារម្ភថា ការទិញលក់តាមគាត់អាចនឹងមានការឆ្លង ដោយសារកង្វះអនាម័យ អញ្ចឹងអ្វីដែលយើងមើលឃើញផលប៉ះពាល់នេះ សុទ្ធតែប៉ះពាល់ដល់ក្រុមដែលមានចំណូលទាប និងជនងាយរងគ្រោះ ដូច្នេះហើយបើយើងគិតអំពីចរន្តសេដ្ឋកិច្ចទាំងមូលវិញ គ្របដណ្តប់ ៦០ភាគរយ នៃកម្លាំងសេដ្ឋកិច្ចរបស់កម្ពុជា ហើយការរីករាលដាលនេះ មិនមែនផ្ទុះទូទាំងប្រទេសទេ គឺមានប៉ះពាល់តែនៅក្នុងតាមខេត្ត ញ្ចឹងតាមការវាយតម្លៃផលសេដ្ឋកិច្ច មានផលប៉ះពាល់មួយចំនួនប្រមាណ២០ភាគរយទេ នៅក្នុងចំណោម៦០ភាគរយ នៃវិស័យចែករំលែកក្នុងវិស័យសេដ្ឋកិច្ច។
ក្រៅពីរបរដែលប៉ះពាល់ខាងលើនេះ លោកបណ្ឌិតរបានលើកឡើងថា ក្នុងរយះពេល១ខែនេះ វិស័យកសិកម្មនៅកម្ពុជា ក៏មានការស្រុតចុះដែរ សម្រាប់អ្នកធ្វើស្រែ ចម្ការ និងការនាំផលិតផលចេញដូចជា ស្វាយ ដំឡូងជាដើមទៅប្រទេសថៃហើយ ត្រូវបានគេបន្ទាបថ្លៃ។ ជាមួយគ្នានេះ លោកបានបង្ហាញនូវដំណោះស្រាយថា ដើម្បីចូលរួមការពារពីជំងឺកូវីដ១៩ យើងត្រូវចូលរួមការពារឱ្យបានល្អប្រសើរ តាមការណែនាំរបស់ក្រសួងសុខាភិបាល។
ចំពោះការលក់ដូររបស់ប្រជាពលរដ្ឋ ត្រូវឱ្យមានធម្មតាកុំឱ្យបិទ តែត្រូវរក្សាអនាម័យ និងរក្សាគម្លាត ទៅតាមការណែនាំរបស់ក្រសួងសុខាភិបាល។ មួយវិញទៀត ការលក់ដូររបស់ប្រជាពលរដ្ឋ ត្រូវឱ្យមានធម្មតាកុំឱ្យបិទតែត្រូវរក្សាអនាម័យ និងស្តង់ដារគម្លាតទៅតាមការណែនាំរបស់ក្រសួងសុខាភិបាល យើងអាចទប់ទល់ក្នុងរយះពេលខ្លីបាន ហើយមួយទៀតរដ្ឋាភិបាលក៏គួរ តែមានការឧបត្ថម្ភមួយចំនួន ទៅលើក្រុមអ្នកផ្គត់ផ្គង់សេវា ព្រោះអ្នកនេះក៏រងផលប៉ះពាល់ ជាពិសេសការជួយរបស់រដ្ឋ។
លោកបណ្ឌិតគី សិរីវឌ្ឍន៍ បានបន្តថា “ខ្ញុំជឿថាមិនអាចមានលទ្ធភាពចែកប្រាក់ចំណូលខ្វះខាតជួយគាត់ទេ ញ្ចឹងមានវិធីមួយទៀតទប់ទល់ នឹងការរៀបចំកម្មវិធីឡើងវិញ ការបង់ប្រាក់ធនាគាររបស់គាត់” ។ លោកបន្តថា “ប្រសិនជាគាត់រកចំណូលផ្គត់ផ្គង់ក្នុងគ្រួសារមិនបានគ្រប់គ្រាន់ផង ទម្រាំទៅដល់ការបង់ធនាគារទៀត ដូច្នេះខ្ញុំជឿថា រដ្ឋាភិបាលគួរតែពិចារណា ការរៀបចំកម្មវិធីឡើងវិញការបង់ប្រាក់ ឬសងប្រាក់របស់គាត់ ដើម្បីដោះស្រាយនូវវិបត្តិនេះ” ។
គិតត្រឹមថ្ងៃទី១៧ ខែមីនា ឆ្នាំ២០២១នេះ ស្ថានភាពជំងឺកូវីដ១៩ នៅទូទាំងប្រទេសកម្ពុជា អ្នកមានវីរុសកូវីដ១៩សរុបចំនួន១,៥០៥នាក់។ ក្នុងនោះអ្នកព្យាបាលជាសះស្បើយចំនួន៨៤០នាក់។ អ្នកកំពុងសម្រាកព្យាបាលចំនួន៦៦២នាក់៕
