ដោយៈលក្ខិណា
ភ្នំពេញៈ វិបត្តិហិរញ្ញវត្ថុគឺជាបញ្ហាដ៏ពិបាកមួយ ដែលមិនងាយនឹងដោះស្រាយចេញឡើយ។ ប្រសិនមនុស្សដែលជួបវិបត្តិនេះ ហើយមិនសូវតស៊ូ នឹងធ្វើឱ្យខ្លួនគេធ្លាក់ក្នុងរណ្ដៅនៃបញ្ហានេះកាន់តែធ្ងន់ធ្ងរ ។ តែយ៉ាងណាក៏មានចំនុចមួយចំនួន សម្រាប់ជួយដោះស្រាយឬអាចជួយដោះស្រាយបានមួយកម្រិតផងដែរ។
យោងតាមអ្នកជំនាញហិរញ្ញវត្ថុមួយក្រុម បានចេញជាទស្សនៈមួយចំនួនដែលជាគន្លឹះសម្រាប់ដោះស្រាយអ្នក ដែលជួបបញ្ហាហិរញ្ញវត្ថុដោយក្នុងនោះ
ទី១ ប្រឈមមុខនឹងបញ្ហា
នៅពេលជួបវិបត្តិហិរញ្ញវត្ថុ រឿងដំបូងគេដែលគួរធ្វើនោះ គឺការទទួលស្គាល់ការពិតថាកំពុងជួបបញ្ហាមួយនេះ ដោយមិនត្រូវគេចវេសពីបញ្ហានេះឡើយ ព្រោះការគេចវេសវាមិនបានជួយ ឱ្យចេញផុតពីបញ្ហាមួយនេះបានទេ។
ដូច្នេះហើយត្រូវទទួលស្គាល់វា ហើយរកវិធីដោះស្រាយតាមបែបវិជ្ជមាន ហើយព្យាយាមរំដោះខ្លួនចេញម្ដងបន្តិចៗ យើងនឹងអាចរួចផុតពីវិបត្តិនេះ ជាមិនខាននៅពេលណាមួយ។
២ បង្កើតកញ្ចប់ថវិកា និងគ្រប់គ្រងលំហូរសាច់ប្រាក់
មូលហេតុចម្បងដែលនាំមកជួបវិបត្តិហិរញ្ញវត្ថុ ក៏អាចបណ្ដាលមកពីការចាយវាយ រួមមាន ដូចជា ការកំណត់ប្រភពចំណាយមិនបានត្រឹមត្រូវ និងចាយវាយតាមតែចិត្តរបស់ខ្លួន និងគ្មានផែនការចាយវាយជាដើម។ យើងគួរតែពិនិត្យឡើងវិញ នូវប្រភពចំណាយរបស់យើង ឱ្យបានច្បាស់ថា ក្នុងចំណោមប្រភពចំណាយទាំងនោះ មួយណាដែលត្រូវតែចំណាយចាំបាច់ មួយណាជាចំណាយមិនចាំបាច់។ ក្រោយពីកំណត់ប្រភពចំណាយរួចរាល់ គួរតែរៀបចំផែនការថ្មីមួយផ្ទាល់ខ្លួន ដែលសមស្របទៅនឹងស្ថានភាពហិរញ្ញវត្ថុ។
៣ បង្កើនប្រភពចំណូល
ដើម្បីចេញឱ្យផុតពីវិបត្តិហិរញ្ញវត្ថុបាន គឺតម្រូវឱ្យខិតខំប្រឹងប្រែងខ្លាំងជាមុន ព្រោះក្នុងដំណាក់កាលនេះស្ថានភាពហិរញ្ញវត្ថុ មិនសូវជាល្អប៉ុន្មានទេ អ៊ីចឹងហើយ បើមិនខំរកចំណូលឲ្យបានច្រើនជាងមុនទេ មិនដឹងពេលណាបានត្រឡប់ មករកស្ថានភាពហិរញ្ញវត្ថុល្អប្រសើរវិញនោះឡើយ។ ក្នុងពេលនេះ គួរស្វែងរកការងារក្រៅម៉ោងបន្ថែម នៅពេលទំនេរ អាចលក់ផលិតផលឬសេវាកម្មដែលអាចធ្វើបាន ហើយក៏អាចលក់របស់មួយចំនួនដែល មិនត្រូវការដើម្បីយកចំណូលផងដែរក្នុងករណីចាំបាច់។
៤ ដោះស្រាយបំណុល
ពេលដែលយើងមានប្រភព ចំណូលសមរម្យមួយចំនួនហើយ យើងគួរតែគិតគូរពីការដោះបំណុលផ្សេងៗ ដែលមានឱ្យអស់កាន់តែលឿនកាន់តែប្រសើរ ព្រោះបំណុលទាំងអស់នេះនឹងធ្វើឱ្យកាន់តែដុនដាបទៅៗ បើសិនជាយើងនៅតែដោះវាចេញមិនអស់។
៥ ស្វែងរកជំនួយ
យើងមិនគួរដោះស្រាយបញ្ហាហិរញ្ញវត្ថុ ដែលយើងកំពុងជួបតែម្នាក់ឯងនោះទេ យើងគួរតែស្វែងរក គ្រួសារ មិត្តភក្តិ មនុស្សដែលយើងស្គាល់ និងជំនាញហិរញ្ញវត្ថុ ដើម្បីជួយយើងក្នុងប្រឹក្សាយោបល់ និងដោះស្រាយបញ្ហាដែលយើងកំពុងតែជួបប្រទះ។
ចំនុចទាំងនេះ គ្រាន់តែចំនុចគន្លឹះមួយចំនួន សម្រាប់សាកល្បងដោះស្រាយពេលមានបញ្ហាតែប៉ុណ្ណោះ តែសម្រាប់បុគ្គលម្នាក់ៗ សុទ្ធតែមានវិធីដោះស្រាយរៀងៗខ្លួននិងផ្សេងៗគ្នា ដើម្បីជៀសផុតពីវិបត្តិហិរញ្ញវត្ថុធ្ងន់ធ្ងរបន្ថែមទៀត៕