ដោយៈ សុខុម
គូឡាឡាំពួ: Tealive ដែលជាប៊្រែន (ម៉ាកយីហោ) តែគជ់ដ៏ល្បីល្បាញឈានមុខគេនៅអាស៊ីអាគ្នេយ៍ គ្រោងឈានជើងចូលទីផ្សារប្រទេសកម្ពុជា ដើម្បីបើកដំណើរការអាជីវកម្មជាមួយនឹងផែនកាពង្រីក
ទីតាំងដល់ទៅ២៥កន្លែងក្នុងរយៈពេល៥ឆ្នាំ។ នេះបើយោងតាមសារព័័ត៌មាន The Star ចុះផ្សាយកាលពីថ្ងៃទី៣ មីនា។
ក្រុមហ៊ុន Loob Holding Sdn Bhd មានមូលដ្ឋាននៅម៉ាឡេស៊ី ដែលជាម្ចាស់ប៊្រែនតែគជ់មួយនេះ បានចុះកិច្ចព្រមព្រៀងប្រគល់សិទ្ធិអាជីវកម្មជាមួយក្រុមហ៊ុន HSC Group ដែលជាក្រុមហ៊ុនចំណីអាហារ និងភេសជ្ជៈធំជាងគេនៅប្រទេសកម្ពុជា។
តាមរយៈសេចក្តីថ្លែងការណ៍ ក្រុមហ៊ុនម៉ាឡេស៊ី មួយនេះនិយាយថា ប្រទេសកម្ពុជា នឹងក្លាយជាទីផ្សារទី៨ បន្ទាប់ពីប្រទេសម៉ាឡេស៊ី វៀតណាម មីយ៉ាន់ ព្រុយណេ ហ្វីលីពីន អូស្រ្តាលី និងអង់គ្លេស។
លោក Bryan Loo ស្ថាបនិក និងជានាយកប្រតិបត្តិក្រុមហ៊ុន Loob Holding បានលើកឡើងថា ក្រុមហ៊ុន HSC Group គឺស័ក្ដិសមបំផុតសម្រាប់ប៊្រែន Tealive ព្រោះក្រុមហ៊ុននេះតែងតែរក្សាគុណតម្លៃនៃប៊្រែនអន្តរជាតិជាច្រើននៅក្នុងឧស្សាហកម្មចំណីអាហារ និងភេសជ្ជៈ។
ក្រុមហ៊ុន Loob Holding បានបញ្ជាក់ថា សាខាតែគជ់ Tealive ទី១ នៅប្រទេសកម្ពុជា នឹងបើកដំណើរការនៅក្នុងរាជធានីភ្នំពេញ។
លោកឧកញ៉ា សុខ ហុង ម្ចាស់ក្រុមហ៊ុន HSC Group មានប្រសាសន៍ថា ពេលវេលានេះគឺស័ក្ដិសមបំផុត ខណៈប្រជាជនកម្ពុជា ត្រៀមខ្លួនរួចរាល់ក្នុងការទទួលយកតែគជ់បែបសម័យទំនើប ព្រោះប៊្រែនអន្តរជាតិជាច្រើនបានចូលមកកម្ពុជា ជាហូរហែរួចមកហើយក្នុងរយៈពេលជាច្រើនឆ្នាំមកនេះ ហើយនឹងចូលមកជាច្រើនទៀតនៅថ្ងៃអនាគត។
បច្ចុប្បន្ន ក្រុមហ៊ុនរបស់កម្ពុជា មួយនេះគ្រប់គ្រងប៊្រែនចំណីអាហារ និងភេសជ្ជៈអន្តរជាតិជាច្រើនដូចជាហាងដុតនំ Paris Baguette ភោជនីយដ្ឋាន Crystal Jade ភោជនីយដ្ឋាន Burger King ភេសជ្ជៈ 100 Plus និងជាច្រើនទៀតក្រៅពីប៊្រែនលក់រាយ និងផលិតផលគ្រឿងសម្អាង៕
