ដោយ វុធ
ភ្នំពេញ៖ ក្រុមហ៊ុនបដិសណ្ឋារកិច្ច Hilton របស់អាមេរិក ដែលជាក្រុមហ៊ុនបដិសណ្ឋារកិច្ចដ៏ល្បីឈ្មោះមួយនៅលើពិភពលោក និងក្រុមហ៊ុនអភិវឌ្ឍន៍អចលនៈទ្រព្យក្រុមហ៊ុន GFC Company Limited បានប្រកាសចុះហត្ថលេខាលើកិច្ចព្រមព្រៀងជាមួយគ្នា ក្នុងការបើកដំណើរការសណ្ឋាគារថ្មីនៅចំកណ្តាលរាជធានីភ្នំពេញ។
គម្រោងសណ្ឋាគារនេះ គឺផ្នែកមួយនៃការអភិវឌ្ឍចប្រើប្រាស់ការចម្រុះដោយគ្រោងបើកដំណើរ ក្រោមឈ្មោះពាណិជ្ជកម្ម Hilton Phnom Penh នៅឆ្នាំ ២០២២ ដែលមាន ២៨០ បន្ទប់។ នេះបើយោងតាមការចុះផ្សាយគេហទំព័រ Hospitalitynet នៅថ្ងៃទី ២៥ ខែកក្កដា ឆ្នាំ ២០២០នេះ។
សណ្ឋាគារនេះស្ថិតនៅចម្ងាយតែ ៩ គីឡូម៉ែត្រពីអាកាសយានដ្ឋានអន្តរជាតិភ្នំពេញ ពោលនៅជិតទីតាំងល្បី ៗ មួយចំនួនរបស់រាជធានីដូចជាផ្សារកណ្តាល ផ្សារថ្មី និងអគារ Vattanac Capital Tower ជាដើម។
សណ្ឋាគារ Hilton Phnom Penh នឹងចូលរួមលើកស្ទួយវិស័យបដិសណ្ឋារកិច្ចកម្ពុជា និងបណ្តុំទៅដោយភោជនីយដ្ឋាន ហាងកាហ្វេ បារ និងកន្លែងទទួលភ្ញៀវ ដើម្បីបំពេញតាមចំណង់ចំណូលចិត្តរបស់អតិថិជន។ ក្រៅពីនេះ ក៏មានកន្លែងប្រជុំ និងកន្លែងរៀបចំព្រឹត្តិការណ៍នានាដែលមានទីតាំង ១៥០០ ម៉ែត្រក្រឡារួមទាំងបន្ទប់មានទំហំ ៨៧៥ ម៉ែត្រក្រឡា។
សណ្ឋាគារនេះក៏នឹងមានកន្លែងជួបជុំពិភាក្សាលើជំនួញ មជ្ឈមណ្ឌលហាត់ប្រាណ និងអាងហែលទឹកផងដែរ។
សណ្ឋាគារ Hilton គឺជានិមិត្តសញ្ញាដ៏ល្បីល្បាញរបស់សហរដ្ឋអាមេរិកដែលបំរើដល់វិស័យសណ្ឋាគារ និងបដិសណ្ឋារកិច្ច នៅទូទាំងពិភពលោក៕
