ដោយៈ វណ្ណារ៉ា
ភ្នំពេញៈ ទីផ្សារដីធ្លីនៅពេលបច្ចុប្បន្ននេះ បើទោះជាស្ថិតនៅក្នុងស្ថានភាពប្រឈមនឹងបញ្ហាសេដ្ឋកិច្ចជាសាកលក៏ដោយ ប៉ុន្តែសម្រាប់សកម្មភាពនៃការទិញ លក់គឺនៅតែបន្តមាន ហើយចំពោះតម្លៃក៏មិនមានការធ្លាក់ចុះនោះដែរ ជាពិសេសដីនៅតាមតំបន់ជុំវិញក្រុងមួយចំនួនដែលនៅតែរក្សាបានតម្លៃខ្ពស់ គិតជាមធ្យមជាង១៣០០ដុល្លារក្នុងមួយម៉ែត្រការ៉េ។
លោកស្រី អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានឱ្យដឹងកាលពីល្ងាចថ្ងៃទី២៤ ខែកក្កដា ឆ្នាំ២០២០កន្លងមកថា តម្លៃដីនៅតាមតំបន់ជុំវិញរាជធានីភ្នំពេញ គឺមានកម្រិតខុសគ្នា ដែលវាអាស្រ័យទៅតាមតំបន់ ដែលមានការអភិវឌ្ឍ កំណើនប្រជាសាស្ត្រ និងជាតំបន់ពាណិជ្ជកម្ម។
ជាក់ស្ដែង ដូចជានៅប៉ែកខាងកើតក្នុងតំបន់ជ្រោយចង្វារ ប៉ែកខាងជើងក្នុងតំបន់សែនសុខ និងប៉ែកខាងលិចឆៀងខាងត្បូងក្បែរផ្លូវ៦០ម៉ែត្រ។
តំបន់ជ្រោយចង្វារ
នៅក្នុងខណ្ឌជ្រោយចង្វារ ត្រូវបានបែងចែកជាតំបន់រស់នៅ និងជាតំបន់ពាណិជ្ជកម្ម ប៉ុន្តែតម្លៃដីមានភាគប្រហាក់ប្រហែលគ្នា។បច្ចុប្បន្ននៅតំបន់ក្បែរស្ពាន គឺមានគម្រោងសាងសង់អគារពាណិជ្ជកម្ម និងអគារស្នាក់នៅដូចជាខុនដូជាច្រើន ដែលជម្រុញឱ្យតម្លៃដីនៅតំបន់នេះ មានទីផ្សារស្រដៀងនឹងតំបន់ក្នុងក្រុងមួយចំនួនដែរ ដោយក្នុងមួយម៉ែត្រការ៉េគិតជាមធ្យម ស្ថិតនៅក្នុងចន្លោះ១៥០០-១៨០០ដុល្លារក្នុងមួយម៉ែត្រការ៉េ។
តំបន់សែនសុខ
ដោយសារតែមានកំណើននៃប្រជាសាស្ត្រ ចូលទៅរស់នៅក្នុងតំបន់នេះច្រើន រួមជាមួយនឹងការអភិវឌ្ឍហេដ្ឋារចនាសម្ព័ន្ធខ្វែងស្វាត់ច្រើន ជាពិសេសវត្តមាននៃមណ្ឌលពាណិជ្ជកម្មបែបទំនើប ដូចជា ផ្សារទំនើប AEON2 ផ្សារទំនើបជីបម៉ុង ផ្សារ Makro ផ្សារ Global House មជ្ឈមណ្ឌលសន្និបាតវិមានសែនសុខ ធនាគារជាតិនៃកម្ពុជា ក៏ដូចជាវត្តមាននៃអគារខុនដូមួយចំនួនទៀត បានប្រែក្លាយតំបន់សែនសុខ ឱ្យទៅជាតំបន់ដែលមានប្រជាប្រិយភាព និងជំរុញតម្លៃដីឡើងខ្ពស់ ប្រើប្រៀបទៅនឹងតំបន់មួយចំនួនទៀតដែលគិតជាមធ្យមក្នុងចន្លោះ ១៣០០-១៥០០ដុល្លារ។
តំបន់ផ្លូវ ៦០ម៉ែត្រ
លោកស្រីបានបញ្ជាក់ថា ដោយសារផ្លូវនេះមាន៩គីឡូម៉ែត្រ ដូច្នេះត្រូវបានបែងចែកជា៣តំបន់។ បើគិតកំណាត់ទី១ ចាប់ពីផ្លូវព្រះមុនីវង្សចំនួន៣គីឡូម៉ែត្រ ស្របតាមបណ្តោយផ្លូវនេះទៅខាងមុខ ដីនៅតំបន់នេះគិតជាមធ្យមមានតម្លៃ១៨០០ដុល្លារ និងចន្លោះពី៣គីឡូម៉ែត្រទៅ៦គីឡូម៉ែត្រ ដីមានតម្លៃ៨០០ដុល្លារក្នុងមួយម៉ែត្រការ៉េ ហើយចាប់ពីគីឡូម៉ែត្រទី៦ ដល់គីឡូម៉ែត្រទី៩ ទល់នឹងផ្លូវជាតិលេខ២មានតម្លៃ ៤០០ដុល្លារក្នុងមួយម៉ែត្រការ៉េ។
ក្រៅពីតំបន់ទាំង៣ខាងលើនេះ យោងតាមរបាយការណ៍ដែលចេញដោយក្រុមហ៊ុនភ្នាក់ងារអចលនទ្រព្យ CBRE កាលពីចុងត្រីមាសទី២ ឆ្នាំ២០២០បានបង្ហាញថា ដីនៅក្នុងខណ្ឌសំខាន់ៗ នៅកណ្តាលក្រុងភ្នំពេញរួមមានខណ្ឌដូនពេញ ចំការមន និងខណ្ឌបឹងកេងកង មានតម្លៃជាមធ្យម៥,៥០០ដុល្លារក្នុង១ម៉ែត្រការ៉េ។ចំណែកដីក្នុងខណ្ឌ ៧មករាមានតម្លៃ៥០០០ដុល្លារ។
តម្លៃទាំងអស់នេះ គឺរក្សានៅដដែលបើធៀបទៅនឹងដើមឆ្នាំ២០២០ ខណៈដីនៅខណ្ឌទួលគោកបានកើនឡើងប្រមាណ ២ភាគរយ ដោយមានតម្លៃជាមធ្យម៣៥៥០ដុល្លារ។ ចំណែកដីក្នុងខណ្ឌមួយចំនួនទៀត ដូចជា ខណ្ឌឫស្សីកែវរក្សាតម្លៃដដែល១ ២៥០ ដុល្លារ និងខណ្ឌជ្រោយចង្វារតម្លៃ ១១៥០ដុល្លារ។
ដោយឡែកខណ្ឌផ្សេងៗទៀតដូចជា ខណ្ឌដង្កោ មានជ័យ ច្បារអំពៅ ពោធិ៍សែនជ័យ ព្រែកព្នៅ និងខណ្ឌកំបូលមានតម្លៃជាមធ្យមចន្លោះពី ១៥០ដុល្លារ ទៅដល់ ៥០០ដុល្លារក្នុង១ម៉ែត្រការ៉េ៕