ដោយៈលក្ខិណា
ភ្នំពេញៈ ដើម្បីទប់ស្កាត់ដល់ការរាលដាលជំងឺកូវីដ១៩ កាន់តែខ្លាំងនៅក្នុងសហគមន៍ប្រជាពលរដ្ឋ ដែលមានគណនីធនាគារគួរបង្កើត App ដើម្បីទូទាត់ការចំណាយរបស់ខ្លួន តាមប្រព័ន្ធបច្ចេកវិទ្យាម្ដងហើយខណៈជំងឺកូវីដ១៩ កំពុងរាលដាលកាន់តែខ្លាំងនៅក្នុងសហគមន៍ជាលើកទី។
ការទូទាត់តាមបច្ចេកវិទ្យាត្រូវបានមើលឃើញថា ចាប់ផ្ដើមកាន់តែច្រើននៅក្នុងដំណាក់កាលដែលកូវីដ១៩ បានឆ្លងចូលមកក្នុងប្រទេសកម្ពុជា ជាក់ស្ដែងតាមបណ្ដាភោជនីយដ្ឋាន ហាងកាហ្វេ និងកន្លែងធ្វើអាជីវកម្មផ្សេងៗបានដាក់ QR Code ដើម្បីឱ្យអតិថិជនអាចស្កែន ដើម្បីទូទាត់ថ្លៃចំណាយ ដោយក្នុងហាងខ្លះមានប្រព័ន្ធ QR Code ច្រើនធនាគារ និងខ្លះទៀតមានពីរបីធនាគារផងដែរ ។
លោកបណ្ឌិតអ៊ិន ចាន់នីប្រធាននាយកប្រតិបត្តិធនាគារអេស៊ីលីដា បានលើកឡើងថា ក្នុងឆ្នាំ២០២១នេះ វិស័យធនាគារមានផែនការជំរុញឱ្យអតិថិជន ដែលមានគណនីធនាគារអេស៊ីលីដា ទាញយកកម្មទូទាត់តាម App ឱ្យបានកាន់តែច្រើន ដោយធនាគារបានលើកផ្លាស់ប្តូររូបរាងថ្មីនៃ App របស់ខ្លួន ដើម្បីទាក់ទាញអតិថិជនប្រើប្រាស់កាន់តែច្រើន និងលើកទឹកចិត្តឱ្យអតិថិជន ប្រើប្រាស់កាន់តែច្រើនផងដែរ ។
លោកបណ្ឌិតបន្តថា “ការទូទាត់តាមបច្ចេកវិទ្យាទូរសព្ទដៃ ដោយការស្កែន QR Code បានផ្ដល់ប្រយោជន៍អតិថិជន ដោយមិនចាំបាចឱ្យអតិថិជន ដាក់ប្រាក់តាមខ្លួន គ្រាន់តែមានទូរសព្ទដៃមួយជាប់ខ្លួនជាស្រេច” ។
ម្យ៉ាងទៀត ការប្រើប្រាស់ App ក៏អាចឱ្យអតិថិចនផ្ទេរប្រាក់ទៅវិញទៅមក និងទូទាត់ការចំណាយនានា ដោយមិនចាំបាច់ធ្វើដំណើរទៅកាន់បញ្ជរទូទាត់នោះឡើយ ។
លោកបន្តថា បច្ចុប្បន្ននេះ ប្រជាពលរដ្ឋកាន់តែច្រើន បានយល់ដឹងនិងកំពុងប្រើប្រាស់បច្ចេកវិទ្យាក្នុងវិស័យហិរញ្ញវត្ថុ ។ការប្រើប្រាស់បច្ចេកវិទ្យានេះដែរ និងអាចជួយសន្សំសំចៃ ដល់ការចំណាយរបស់អតិថិជនផងដែរ ហើយធនាគារជាតិក៏មិនចាំបាច់បោះពុម្ពលុយមកបន្ថែមទៀតដែរ ។
បច្ចុប្បន្ននេះ មិនមែនមានតែធនាគារនោះទេ ដែលបង្កើតកម្មវិធីទូទាត់តាម QR Code តែគ្រឹះស្ថានមីក្រូហិរញ្ញវត្ថុ និងក្រុមហ៊ុនហិរញ្ញវត្ថុជាច្រើនទៀត ក៏បានបង្កើតកម្មវិធីសម្រាប់ទូទាត់ការចំណាយ ដោយមិនប្រើប្រាស់ក្រដាសប្រាក់ ។ តាមរយៈការទូទាត់ ដោយមិនប្រើក្រដាស់ប្រាក់ ក៏អាចចូលរួមចំណែកក្នុងការទប់ស្កាត់ ពីការឆ្លងកូវីដ១៩បានមួយកម្រិតផងដែរ៕
