ដោយ៖ ម៉ាណេត
ភ្នំពេញ៖ ពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិកមានទំហំទឹកប្រាក់ដល់ ២,៤៨៨ លានដុល្លារក្នុងរយៈពេល ៥ ខែដំបូងនៃឆ្នាំនេះ កើនឡើង ១៨ ភាគរយ បើធៀបនឹងរយៈពេលដូចគា្នកាលពីឆ្នាំមុន។
ស្ថិតិពីការិយាល័យជំរឿនសហរដ្ឋអាមេរិក ដែលចេញផ្សាយកាលពីថ្ងៃទី២៣ ខែកក្កដា ឆ្នាំ២០២០ បានឱ្យដឹង ថា ចាប់ពីខែមករាដល់ខែឧសភា កម្ពុជាបាននាំចេញផលិតផលមានតម្លៃ ២,៣៦៣ លានដុល្លារអាមេរិកទៅកាន់ទីផ្សារសហរដ្ឋអាមេរិគ កើនឡើង ២៥,៩ ភាគរយបើប្រៀបធៀបនឹងរយៈពេលដូចគ្នាកាលពីឆ្នាំមុន។
កម្ពុជាបាននាំចូលទំនិញពីសហរដ្ឋអាមេរិកគិតជាទឹកប្រាក់សរុប ១២៥,៣ លានដុល្លារ ធ្លាក់ចុះ ៤២,៤ភាគរយធៀបនឹងរយៈពេលដូចគ្នាពីឆ្នាំមុន។
គិតតែនៅក្នុងខែឧសភា ពាណិជ្ជកម្មទ្វេភាគីមានតម្លៃ ៣៥៥,៩ លានដុល្លារអាមេរិក ថយចុះ ១៩ ភាគរយ បើប្រៀបធៀបនឹងខែឧសភាឆ្នាំមុន។ ក្នុងចំណោមតួលេខនេះ ៣៣៨,៨ លានដុល្លារគឺជាការនាំចេញរបស់កម្ពុជា។
ប្រទេសកម្ពុជាបាននាំចេញនូវវាយនភណ្ឌ ស្បែកជើង ទំនិញធ្វើដំណើរ និងផលិតផលកសិកម្មទៅកាន់សហរដ្ឋអាមេរិក ហើយបាននាំចូលយានយន្ត ចំណីសត្វ និងគ្រឿងម៉ាស៊ីន។
កាលពីឆ្នាំមុន ពាណិជ្ជកម្មទ្វេភាគីរវាងប្រទេសទាំងពីរបានឈានដល់ទំហំទឹកប្រាក់ ៥,៨ ពាន់លានដុល្លារអាមេរិក កើនឡើង ៣៧ ភាគរយ បើធៀបនឹងឆ្នាំ២០១៨៕
