ដោយៈ សាវុធ
ភ្នំពេញៈ ពន្ធលើប្រាក់បៀវត្សរ៍ គឺជាពន្ធប្រចាំខែកំណត់លើប្រាក់បៀវត្សរ៍ ដែលរូប វ័ន្តបុគ្គលបានទទួលក្នុងក្របខ័ណ្ឌនៃការ បំពេញសកម្មភាពបំរើការងារ។
រូបវ័ន្តបុគ្គលនិវាសនជន នៅក្នុងព្រះរាជាណាចក្រកម្ពុជា ត្រូវជាប់ពន្ធលើប្រាក់បៀវត្សរ៍ ចំពោះប្រាក់បៀវត្សប្រភពកម្ពុជា និងប្រាក់បៀវត្សប្រភពបរទេស។ រូបវន្តអនិវាសនជនត្រូវជាប់ពន្ធលើប្រាក់បៀវត្សចំពោះ ប្រាក់បៀវត្សប្រភពកម្ពុជា។
សហគ្រាសដែលជានិយោជក ត្រូវមានកាតព្វកិច្ចកាត់ទុក ពន្ធលើប្រាក់បៀវត្សរ៍នៅមុនពេល បើកប្រាក់បៀវត្សឱ្យដល់និយោជិត និងបង់ប្រាក់ពន្ធនេះជូនរដ្ឋបាលសារពើពន្ធយ៉ាងយឺតបំផុតនៅថ្ងៃទី២០នៃខែបន្ទាប់ ពីខែដែលប្រាក់បៀវត្សត្រូវបានបើក។
សម្រាប់និយោជិតនិវាសនជន ប្រាក់ពន្ធត្រូវបង់ត្រូវកំណត់លើប្រាក់បៀវត្សរ៍ ជាប់ពន្ធប្រចាំខែនិងត្រូវកាត់ទុក តាមអត្រាកំណើនតាមថ្នាក់ដូចតទៅៈ
ភាគរយនៃបៀវត្សប្រចាំខែត្រួវជាប់ពន្ធ អត្រាពន្ធៈ
ពី០ ៛ ដល់១.២០០.០០០ ៛ ០%
ពី ១.២០០.០០១ ៛ ដល់ ២.០០០.០០០ ៛ ៥%
ពី ២.០០០.០០១ ៛ ដល់ ៨.៥០០.០០០ ៛ ១០%
ពី ៨.៥០០.០០១ ៛ ដល់ ១២.៥០០.០០០ ៛ ១៥%
លើសពី ១២.៥០០.០០០ ៛ ២០%
សម្រាប់និយោជិតអនិវាសនជន ពន្ធលើប្រាក់បៀវត្សរ៍ ត្រូវបានកាត់ទុកតាមអត្រា ២០% នៃទឹកប្រាក់ត្រូវបើកឱ្យមុនការកាត់ទុក។ ពន្ធកាត់ទុកនេះគឺជាពន្ធចុងក្រោយ នៃប្រាក់បៀវត្សរ៍ សម្រាប់អនិវាសនជនជាអ្នកទទួលប្រាក់បៀវត្សរ៍។
ចំពោះអត្ថប្រយោជន៍បន្ថែមជារៀងរាល់ខែ សហគ្រាស ក្រុមហ៊ុនត្រូវកាត់ទុក និងបង់ប្រាក់ពន្ធតាមអត្រា២០ភាគរយ នៃតម្លៃសរុបរបស់អត្ថប្រយោជន៍បន្ថែម ដែលបានផ្តល់ឱ្យនិយោជិតទាំងអស់។ តម្លៃនៃអត្ថប្រយោជន៍បន្ថែម គឺជាតម្លៃទីផ្សារ រួមទាំងពន្ធអាករទាំងអស់៕
