ដោយៈ ម៉ាណេត
ភ្នំពេញៈ ធនាគារវឌ្ឍនៈអាស៊ី ចំកាត់ (ABA) ទទួលបានចំណេញសុទ្ធ ៥០,២លានដុល្លារអាមេរិក ក្នុងត្រីមាសទី៤ឆ្នាំ២០២០ ខណៈទ្រព្យសកម្មសរុបកើនបាន៨,៤% ធៀបនឹងត្រីមាសទី៣ និងសមមូល ៦,១ពាន់លានដុល្លារអាមេរិក គិតត្រឹមដំណាច់ត្រីមាសទី៤ កាលពីឆ្នាំមុន។
ការប្រកាសពីស្ថានភាពចំណូលនេះ ត្រូវបានឡើងក្នុងរបាយការណ៍អំពីលទ្ធផលហិរញ្ញវត្ថុរបស់ធនាគារ ABA ក្នុងត្រីមាសទីបួន ឆ្នាំ២០២០ ដែលដាក់ជូនផ្សារមូលបត្រកម្ពុជា នៅល្ងាចថ្ងៃទី១៥ ខែកុម្ភៈ ឆ្នាំ២០២១ ។
លោក Yves Jackquot ប្រធានក្រុមប្រឹក្សាភិបាលធនាគារ ABA បានថ្លែងថា សំដៅលើសូចនាករ សមត្ថភាពហិរញ្ញវត្ថុរបស់ធនាគារ នៅក្នុងរយៈពេលនៃរបាយការណ៍នេះ យើងទទួលបានកំណើនប្រកបដោយស្ថិរភាព។
លោកបានថ្លែងថា គិតត្រឹមដំណាច់ត្រីមាសទី៤ ឆ្នាំ២០២០ ទ្រព្យសកម្មសរុបកើនបាន ៨,៤% ធៀបនឹងត្រីមាសទីបីនិងសមមូល ៦,១ពាន់លានដុល្លារអាមេរិក ហើយមូលធនភាគហ៊ុនិករបស់ធនាគារក៏កើនឡើង និងឡើងដល់ ៧៧០,៥លានដុល្លារអាមេរិក អំឡុងរបាយការណ៍នេះ។
លោកបានបន្តទៀតថា “ធនាគារមានសមត្ថភាព អាចរក្សាផលចំណេញសុទ្ធ៥០,២លានដុល្លារអាមេរិក ក្នុងត្រីមាសទីបួន ឆ្នាំ២០២០” ។ លោកថ្លែងថា “កំណើនទាំងនេះអាចកើតមាន ដោយសារអានុភាពដ៏ខ្លាំងក្លា របស់កម្មវិធីសេវាធនាគារឌីជីថល និងស្វ័យសេវាដ៏ទំនើបរបស់ខ្លួន” ។
ក្នុងត្រីមាស ទីបួននេះ ធនាគារ ABA បានបង្កើនសមត្ថភាពកម្មវិធីសេវាធនាគារចល័តរបស់ខ្លួន តាមរយៈការនាំមកនូវសេវាកម្ម និងមុខង៉ារងាយស្រួលថ្មីៗ ដូចជា សេវាផ្ទេរប្រាក់ក្រៅប្រទេស MoneyGram និងសេវាផ្ទេរប្រាក់ក្នុងស្រុង ប៉ាគង រួមទាំងចំនួនទឹកប្រាក់កំណត់ខ្ពស់ជាងមុនចំពោះកម្ចី ភ្លាមៗសម្រាប់ម្ចាស់គណនីប្រាក់បញ្ញើ មានកាលកំណត់ ការគាំទ្រភាសាចិន និងផ្សេងៗទៀត។
ធនាគារបានដាក់ឲ្យដំណើរការកម្មវិធី PayWay Mobile សម្រាប់អាជីវកម្មគ្រប់ប្រភេទ ក្នុងការទទួលទូទាត់ពីអតិថិជនរបស់ខ្លួនជាប្រាក់រៀល និងប្រាក់ដុល្លារដោយមិនប្រើសាច់ប្រាក់ តាមរយៈការបង្កើតកូដ QR ជាមួយទូរស័ព្ទដៃរបស់ពួកគេ។ កម្មវិធីនេះដោះស្រាយប្រតិបត្តិ ការប្រចាំថ្ងៃរបស់ពាណិជ្ជកពាក់ព័ន្ធ នឹងការរក្សាទុកកំណត់ត្រាការលក់ ខណៈដែលកាត់បន្ថយការប៉ះពាល់នឹងសាច់ប្រាក់។
ABA មានបណ្តាញពាណិជ្ជករជាង ៦០.០០០ កំពុងទទួលការទូទាត់តាមកូដ QR ពីអ្នកប្រើប្រាស់កម្មវិធី ABA Mobile ហើយកម្មវិធី PayWay Mobile ត្រូវបានរំពឹងថានឹងពង្រឹងជំហររបស់ធនាគារនៅក្នុងវិស័យនេះផងដែរ។
ដោយសង្កេតឃើញសមិទ្ធផលទាំងអស់នេះ ទស្សនាវដ្តីហិរញ្ញវត្ថុ Asiamoney (ហុងកុង) បានផ្តល់កិត្តិយសប្រគល់ជូនធនាគារ ABA នូវពានរង្វាន់ “ធនាគារឌីជីថលដ៏ឆ្នើមនៅកម្ពុជា ឆ្នាំ២០២០” ។
បន្ថែមលើនេះប្រព័ន្ធទូទាត់អនឡាញ PayWay ត្រូវទស្សនាវដ្តី Asia eCommerce (សិង្ហបុរី) បានប្រសិទ្ធនាមជា “ដំណោះស្រាយការទូទាត់ពាណិជ្ជកម្ម អេឡិកត្រូនិកល្អបំផុតនៅកម្ពុជា” រយៈពេលពីរឆ្នាំជាប់គ្នា៕
