ដោយៈសុខុម
ក្រុងឡុងដ៍: សេដ្ឋកិច្ចរបស់ប្រទេសអង់គ្លេស បានដាំក្បាលចុះធ្ងន់ធ្ងរបំផុតជាប្រវត្តិសាស្ត្រក្នុងរយៈពេលជាង៣សតវត្សរ៍ ដោយផលិតផលក្នុងស្រុកសរុប (GDP) បានធ្លាក់ចុះរហូតដល់ទៅជិត ១០% នៅក្នុងឆ្នាំ២០២០ ។ នេះបើយោងតាមសារព័ត៌មាន CNN ចុះផ្សាយកាលពីថ្ងៃទី១២ កុម្ភៈ។
ការដាំក្បាលចុះដ៏អាក្រក់នៃសេដ្ឋកិច្ចរបស់យក្សនៅតំបន់អឺរ៉ុបនេះ គឺដោយសារការឆ្លងរាតត្បាតវីរុសកូវីដ-១៩ បានបំផ្លាញកំណើនសេដ្ឋកិច្ចគ្មានសល់នៅអង់គ្លេស ក្នុងរយៈពេល៧ឆ្នាំចុងក្រោយនេះ ស្រដៀងនឹងស្ថានភាពក្នុងឆ្នាំ២០១៣ ។
ទិន្នន័យរបស់ធនាគារកណ្ដាលរបស់អង់គ្លេស Bank of England បង្ហាញថា ការធ្លាក់ចុះGDP៩,៩% នៅអង់គ្លេស។ នេះគឺស្រាលជាងការរំពឹងទុក ប៉ុន្តែនៅតែខ្ពស់ជាងអំឡុងមហាវិបត្តិសេដ្ឋកិច្ច (Great Depression) ក្នុងឆ្នាំ១៩២១ ដែលកាលនោះ GDP បានធ្លាក់ចុះ៩,៧% ដោយធ្វើឱ្យវាក្លាយជាការធ្លាក់ចុះប្រចាំឆ្នាំ ធ្ងន់ធ្ងរបំផុតចាប់តាំងពីឆ្នាំ១៧០៩ មក។
ប្រទេសអង់គ្លេស បានធ្លាក់ចុះសេដ្ឋកិច្ចធ្ងន់ធ្ងរបំផុត ក្នុងចំណោមសេដ្ឋកិច្ចធំៗកាលពីឆ្នាំមុន។ ជាឧទាហរណ៍ ប្រទេសអាល្លឺម៉ង់ បានធ្លាក់ចុះសេដ្ឋកិច្ចស្រាលជាងអំឡុងវិបត្តិហិរញ្ញវត្ថុពិភពលោក។ ការប៉ាន់ប្រមាណបណ្ដោះអាសន្នបង្ហាញថា អាល្លឺម៉ង់ ដែលជាប្រទេសសេដ្ឋកិច្ចធំបំផុតនៅអឺរ៉ុប បានធ្លាក់ចុះសេដ្ឋកិច្ច៥% កាលពីឆ្នាំមុន។
ទន្ទឹមនេះដែរ យោងតាមការិយាល័យស្ថិតិរបស់សហភាពអឺរ៉ុប Eurostat បង្ហាញថា តាមការរំពឹងទុក GDP របស់សហភាពអឺរ៉ុប អាចនឹងធ្លាក់ចុះ៦,៤% ។
បើធ្វើការប្រៀបធៀបគ្នាឃើញថា ស្ថានភាពសេដ្ឋកិច្ចរបស់សហរដ្ឋអាមេរិក រឹតតែល្អប្រសើរជាងឆ្ងាយ ដោយ GDP របស់មហាអំណាចពិភពលោកមួយនេះ បានធ្លាក់ចុះត្រឹម ៣,៥% ធៀបនឹងឆ្នាំ២០១៩ ។
លោក Rishi Sunak រដ្ឋមន្ត្រីហិរញ្ញវត្ថុរបស់អង់គ្លេស បានចេញសេចក្ដីថ្លែងការណ៍ថា “តួលេខថ្ងៃនេះបង្ហាញថា សេដ្ឋកិច្ចបានធ្លាក់ចុះខ្លាំងគួរឱ្យតក់ស្លុត ដោយសារការឆ្លងរាតត្បាតវីរុសកូវីដ-១៩ ដែលប្រទេសនានាទូទាំងពិភពលោកសុទ្ធតែរងផលប៉ះពាល់” ។
លោកបន្ថែមទៀតថា “ខណៈមានសញ្ញាវិជ្ជមានខ្លះ នៃភាពធន់ទ្រាំរបស់សេដ្ឋកិច្ចក្នុងរដូវរងា យើងដឹងថាបម្រាមមិនឱ្យពលរដ្ឋចេញពីផ្ទះ នាពេលបច្ចុប្បន្ននឹងបន្តជះផលប៉ះពាល់ខ្លាំងលើពលរដ្ឋ និងអាជីវកម្មយ៉ាងច្រើន” ៕
