ដោយៈ សុខុម
វ៉ាស៊ីនតោន: សហភាពអឺរ៉ុប កាលពីថ្ងៃទី១១ ខែកុម្ភៈ បានទទួលស្គាល់ចំណាត់ការរបស់រដ្ឋការថ្មីរបស់លោកចូ បៃឌិន នៅក្នុងការមិនដាក់ពន្ធបន្ថែមលើទំនិញ របស់សហភាពអឺរ៉ុប ក្នុងជម្លោះដ៏រ៉ាំរ៉ៃជុំវិញពន្ធយន្តហោះ ហើយបានបង្ហាញជំហរថា ខ្លួនត្រៀមរួចជាស្រេច ដើម្បីដោះស្រាយជម្លោះពាណិជ្ជកម្មជាមួយសហរដ្ឋអាមេរិក។
យោងតាមសារព័ត៌មាន CNA ចុះផ្សាយកាលពីថ្ងៃទី១២ ខែកុម្ភៈ ឆ្នាំ២០២១ ឱ្យដឹងថា នៅថ្ងៃព្រហស្បតិ៍ដដែល ការិយាល័យតំណាងពាណិញ្ជកម្មសហរដ្ឋអាមេរិក (United States Trade Representative) បានលើកឡើងថា ខ្លួនបានយល់ស្របនឹងឧស្សាហកម្មរបស់សហរដ្ឋអាមេរិកថា ពេលនេះមិនទាន់ចាំបាច់ ដែលត្រូវកែប្រែព័ន្ធបច្ចុប្បន្នលើទំនិញរបស់សហភាពសអឺរ៉ុបឡើយ ព្រោះកំពុងស្ថិតក្នុងដំណាក់កាល ពិនិត្យផ្ទៀងផ្ទាត់ឡើងវិញ។
ចំណាត់ការនេះធ្វើឡើងមួយថ្ងៃ ក្រោយពីតំណាងពាណិញ្ជកម្មសហរដ្ឋអាមេរិក និយាយថា ខ្លួនកំពុងសម្លឹងរកឱកាស ធ្វើការជាមួយបណ្ដាសម្ព័ន្ធមិត្តអឺរ៉ុប ដើម្បីដោះស្រាយជម្លោះអូសបន្លាយអស់រយៈពេល១៦ឆ្នាំ ជុំវិញការឧបត្ថម្ភធនដល់ក្រុមហ៊ុនផលិតយន្តហោះ Airbus របស់សហភាពអឺរ៉ុប និងក្រុមហ៊ុនជាគូប្រជែង Boeing របស់សហរដ្ឋអាមេរិក។
ពេលសាកសួរអំពីសេចក្ដីសម្រេចខាងលើនេះ អ្នកនាំពាក្យសហភាពអឺរ៉ុប ឆ្លើយតបថា “សហភាពអឺរ៉ុប ត្រៀមខ្លួនរួចជាស្រេច ដើម្បីចូលរួមចរចាជាមួយរដ្ឋការថ្មីរបស់សហរដ្ឋអាមេរិក ដោយឈរលើមូលដ្ឋានបៀបវារៈសហភាពអឺរ៉ុប -សហរដ្ឋអាមេរិកសម្រាប់ការប្រែប្រួលជាសកល ដែលយើងបានអនុម័តកាលពីថ្ងៃទី២ ធ្នូ។ គោលបំណងរបស់យើង គឺដើម្បីស្វែងរកដំណោះស្រាយបញ្ចប់ជម្លោះពាណិជ្ជកម្មនានា ដែលកំពុងកើតមាន រួមទាំងជម្លោះជុំវិញក្រុមហ៊ុន Airbus និង Boeing ផងដែរ” ។
សម្ព័ន្ធពាណិជ្ជកម្មអាមេរិក-អ៊ីតាលី American Italian Food Coalition ដែលតំណាងក្រុមហ៊ុនអ៊ីតាលី ជាង៤៥០បាននិយាយថា ចំណាត់ការនេះ នឹងទុកពេលវេលាគ្រប់គ្រាន់ឱ្យភាគីទាំងពីរ ស្វែងរកដំណោះស្រាយ ដើម្បីបញ្ចប់ជម្លោះ។
ក្រុមមន្ត្រីមកពីសហភាពអឺរ៉ុប និងអង់គ្លេស ពិតជាចង់ឈានដល់កិច្ចព្រមព្រៀងជាមួយរដ្ឋប្រធានាធិបតីលោក ចូ បៃឌិន យ៉ាងខ្លាំង ប៉ុន្តែការចរចាត្រូវបានពន្យារពេល ខណៈរង់ចាំការសម្រេចពីព្រឹទ្ធសភា លើការជ្រើសរើសរបស់លោក ចូ បៃឌិន ឱ្យលោកស្រី Katherine Tai ធ្វើជាប្រធានក្រុមចរចា។ ការរង់ចាំនេះប្រហែលជាត្រូវការពេលវេលាប៉ុន្មានសប្ដាហ៍។
កាលពីថ្ងៃច័ន្ទ ទី៨ កុម្ភៈ ប្រេសិតពិសេសមកពីប្រទេសអង់គ្លេស និងសហភាពអឺរ៉ុប បានសង្កត់ធ្ងន់ ពីការប្ដេជ្ញាចិត្តរបស់ខ្លួន នៅក្នុងការដោះស្រាយជម្លោះជុំវិញការឧបត្ថម្ភធន ដល់ក្រុមហ៊ុនផលិតយន្តហោះ។
លោក Stavros Lambrinidis ឯកអគ្គរដ្ឋទូតសហភាពអឺរ៉ុប បានគូសបញ្ជាក់ថា ក្រុងពុចសែល បានស្នើឱ្យភាគីទាំងពីរ ផ្អាកការយកពន្ធរយៈពេល៦ខែសិន ដើម្បីមានពេលវេលាគ្រប់គ្រាន់នៅក្នុងការចរចា។
ទន្ទឹមនេះ ប្រទេសអង់គ្លេស ដែលបានចាកចេញពីសហភាពអឺរ៉ុប ទៅហើយនោះបានលើកឡើងថា ខ្លួនក៏មានបំណងលើកពេលយកពន្ធដែរ ដែលប្រហែលធ្វើឡើងជាឯកតោភាគី (ភាគីតែម្ខាង) ដើម្បីបង្ហាញនូវកាយវិការសុច្ឆន្ទៈរបស់ខ្លួន៕