ដោយៈលក្ខិណា
ភ្នំពេញ ៖ អង្គការទស្សនៈពិភពលោក (World Vision) ប្រចាំកម្ពុជា នឹងចុះហត្ថលេខាលើអនុស្សរណៈមួយជាមួយ មីក្រូហិរញ្ញវត្ថុ អេអឹមខេ ដើម្បីផ្ដល់ភាពងាយស្រួលក្នងការទទួលបានសេវាកម្មហិរញ្ញវត្ថុ សម្រាប់វិស័យវារីវប្បកម្មនៅក្នុងប្រទេសកម្ពុជា។
ពិធីចុះហត្ថលេខាលើអនុស្សរណៈយោគយល់នេះ នឹងធ្វើឡើងនៅថ្ងៃទី៨កុម្ភៈនេះ នៅភោជនីយដ្ឋានទន្លេបាសាក់រាជធានីភ្នំពេញ ។
យោងតាមសេចក្តីប្រកាសព័ត៌មានរួម រវាងស្ថាប័នទាំងនេះបានឱ្យដឹងថា គោលដៅចម្បង នៃភាពជាដៃគូរបស់អង្គការទស្សនៈពិភពលោកនៃគម្រោង អភិវឌ្ឍន៍វារីវប្បកម្មសម្រាប់និរន្តរភាព ពាណិជ្ជកម្មនៅកម្ពុជា ហៅកាត់ថា (ខាស់ ) និង គ្រឹះស្ថានមីក្រូហិរញ្ញវត្ថុអេ អឹម ខេ គឺផ្តល់ជូនអ្នកទទួលផលពីគម្រោង ជាមួយនឹងសេវាកម្មហិរញ្ញវត្ថុ ដែលងាយស្រួលក្នុងវិស័យវារីវប្បកម្ម។
ជាបឋមវាពង្រឹងសហគ្រាសធុនតូច និងមធ្យម តាមរយៈការធ្វើឱ្យប្រសើរឡើងនូវការទទួលបានហិរញ្ញវត្ថុ សម្រាប់កំណើនអាជីវកម្ម ហើយសកម្មភាពនេះគាំទ្រដល់ការផ្លាស់ប្តូរប្រព័ន្ធ ដោយជួយដល់ភ្នាក់ងារហិរញ្ញវត្ថុក្នុងស្រុក ឱ្យយល់កាន់តែច្បាស់អំពីហានិភ័យ និងឱកាស ដែលទាក់ទងនឹងវារីវប្បកម្មព្រមទាំងជំនះឧបសគ្គ ដែលរារាំងការផ្តល់ប្រាក់កម្ចីកាន់តែច្រើនដល់វិស័យនេះ។
លោកហួត សុខា ប្រធាននាយកប្រតិបត្តិសាជីវកម្ម នៃគ្រឹះស្ថានមីក្រូហិរញ្ញវត្ថុ អេ អឹម ខេបានមានប្រសាសន៍ថា ដើម្បីលើកកម្ពស់ វិស័យវារីវប្បកម្មនៅកម្ពុជា អេ អឹម ខេ បានបង្កើតភាពជាដៃគូ ជាមួយគម្រោងអភិវឌ្ឍន៍វារីវប្បកម្មសម្រាប់និរន្តរភាព ពាណិជ្ជកម្មនៅកម្ពុជា(ខាស់) របស់ អង្គការទស្សនៈពិភពលោក ក្នុងការផ្តល់ជូនសេវាហិរញ្ញវត្ថុ ដើម្បីឲ្យតួអង្គនីមួយៗ ដែលជាម្ចាស់អាជីវករក្នុងវិស័យវារីវប្បកម្ម ទទួលបានទុនបន្ថែម យកទៅពង្រីកអាជីវកម្មរបស់ពួកគាត់។
លោកថា “យើងមើលឃើញថា ខាស់ គឺជាគម្រោងមួយរបស់អង្គការ ទស្សនៈពិភពលោក ដែលមានបទពិសោធន៍ ជាពិសេសបច្ចេកទេស ក្នុងការអភិវឌ្ឍវិស័យវារីវប្បកម្មនាពេលកន្លងមក” ។
លោកហួត សុខាសង្ឃឹមថា ការបង្កើតភាពជាដៃគូនេះ នឹងជួយអភិវឌ្ឍវិស័យវារីវប្បកម្មនៅកម្ពុជា ថែមមួយកម្រិតទៀត និងជួយបង្កើនផលិកម្មត្រីក្នុងស្រុក កាត់បន្ថយការនាំចូលពីក្រៅប្រទេស។ ជាលទ្ធផល វានឹងជួយលើកកម្ពស់ជីវភាពប្រជាកសិករ ក៏ដូចជាសេដ្ឋកិច្ចកម្ពុជាផងដែរ៕