ដោយៈ ម៉ាណេត
ភ្នំពេញៈ ទ្រព្យសកម្មរបស់ប្រព័ន្ធធនាគារ មានកំណើនដល់២៤០,៨ទ្រីលានរៀល ស្មើនឹង៥៩,៤ពាន់លានដុល្លារអាមេរិកក្នុងឆ្នាំ២០២០ កើនឡើង១៥,៧ភាគរយ ក្នុងនោះឥណទានអតិថិជន បានកើនដល់៣៧,៣ពាន់លានដុល្លារអាមេរិក កើនឡើង១៤,៨ភាគរយ។ នេះបើយោងតាមការរបាយការណ៍ចុងក្រោយរបស់ធនាគារជាតិនៃកម្ពុជា (NBC) ។
ប្រាក់បញ្ញើអតិថិជនមានកំណើន១៥,៤ភាគរយ (ដល់១៣៦,៩ទ្រីលានរៀល ស្មើនឹង៣៣,៨ពាន់លានដុល្លារអាមេរិក) និងដើមទុនមានកំណើន១០,៤ភាគរយ (ដល់២៥,៧ ទ្រីលានរៀល ស្មើនឹង៦,៣ពាន់លានដុល្លារអាមេរិក)។ គ្រឹះស្ថានធនាគារនិងហិរញ្ញវត្ថុបានបន្តលើកកម្ពស់ បរិយាបន្នហិរញ្ញវត្ថុ ដោយចំនួនគណនីប្រាក់បញ្ញើអតិថិជនកើនដល់៨,៩លានគណនី និងគណនី ឥណទានអតិថិជនកើនដល់៣,២លានគណនី។
យោងតាម NBC បានឱ្យដឹងថា រាជរដ្ឋាភិបាលកម្ពុជា ក្រោមការដឹកនាំប្រកបដោយទស្សនវិស័យវែងឆ្ងាយ និងម៉ឺងម៉ាត់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានទប់ស្កាត់ ការឆ្លងនិងការរីករាលដាលនៃជំងឺកូវីដ-១៩យ៉ាងមានប្រសិទ្ធភាព។ ទន្ទឹមនឹងការគ្រប់គ្រងបានល្អ លើការរីករាលដាលនៃជំងឺកូវីដ-១៩ ជំនឿទុកចិត្តមកលើសេដ្ឋកិច្ចកម្ពុជា ក៏ត្រូវបានគាំទ្រផងដែរដោយស្ថិរភាពម៉ាក្រូសេដ្ឋកិច្ចនិងហិរញ្ញវត្ថុ។
គោលនយោបាយរូបិយវត្ថុ ត្រូវបានអនុវត្តដោយមានភាពបត់បែន ដើម្បីរួមចំណែកគ្រប់គ្រងសម្ពាធអតិផរណា ហើយធនាគារជាតិនៃកម្ពុជាបានធ្វើអន្តរាគមន៍ លើទីផ្សារប្តូរប្រាក់ដើម្បីរក្សាស្ថិរភាពតម្លៃប្រាក់រៀល ខណៈដែលរូបិយប័ណ្ណក្នុងតំបន់ ប្រឈមនឹងការប្រែប្រួលខ្លាំង។
ប្រព័ន្ធធនាគារកម្ពុជាមានធនាគារពាណិជ្ជចំនួន៥២ ធនាគារឯកទេស១៤ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើពីសាធារណជន៦ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ៧៥ គ្រឹះស្ថាន ឥណទានជនបទ២៤៦ ក្រុមហ៊ុនភតិសន្យាហិរញ្ញវត្ថុ១៥ អ្នកដំណើរការតតិយភាគី៤ គ្រឹះស្ថានផ្តល់ សេវាទូទាត់២៨ ក្រុមហ៊ុនចែករំលែកព័ត៌មានឥណទាន១ ការិយាល័យតំណាងធនាគារបរទេស៦ និងអាជីវកម្មប្តូរប្រាក់ ២.៨៨៩ ។
ទីស្នាក់ការកណ្តាល និងសាខានៃគ្រឹះស្ថានធនាគារ និងហិរញ្ញវត្ថុមានចំនួន២.៥២៧ និងមានម៉ាស៊ីនដក និងដាក់ប្រាក់ស្វ័យប្រវត្តិ (ATM) ចំនួន៣.១៦៨ ៕
