ដោយៈ សាវុធ
ភ្នំពេញៈ ទិន្នន័យទីផ្សារសំដៅដល់ទិន្នន័យទាំងឡាយណា ដែលទាក់ទងនឹងថ្លៃនិងការជួញដូរមូលបត្រនៅផ្សារមូលបត្រកម្ពុជា (ផ.ម.ក.)។ ឧទាហរណ៍ ថ្លៃបម្រែបម្រួលជាថ្លៃបម្រែបម្រួលថ្លៃជាភាគរយ ទំហំជួញដូរ តម្លៃជួញដូរ និងព័ត៌មានអំពីសន្ទស្សន៍ ជាដើម។ល។
ព័ត៌មានក្រុមហ៊ុនចុះបញ្ជីសំដៅដល់ ព័ត៌មានអំពីស្ថានភាពនិងគុណភាពអាជីវកម្មរបស់ក្រុមហ៊ុននាពេលអតីតកាល និងបច្ចុប្បន្ន ដែលអនុញ្ញាត ឱ្យវិនិយោគិនអាចធ្វើការព្យាករណ៍អំពីអនាគតរបស់ក្រុមហ៊ុនបាន ហើយនិងធ្វើការសម្រេចចិត្តវិនិយោគទៅតាមនោះដែរ។
ព័ត៌មានក្រុមហ៊ុន ចុះបញ្ជីរួមមាន ប្រវត្តិសង្ខេបអំពីក្រុមហ៊ុន របាយការណ៍ហិរញ្ញវត្ថុ ព័ត៌មានសារជីវកម្ម ព័ត៌មានអំពីគណៈគ្រប់គ្រង និងភាគហ៊ុនិកសំខាន់ៗ គោលនយោបាយភាគលាភ គម្រោងអាជីវកម្ម ព្រមទាំងសេចក្តីអត្ថាធិប្បាយរបស់គណៈគ្រប់គ្រងក្រុមហ៊ុនជាដើម។ល។
សាធារណជនអាចស្វែងរកទិន្នន័យទីផ្សារបាន នៅក្នុងគេហទំព័ររបស់ផ.ម.ក.ផ្នែក “ទិន្នន័យទីផ្សារ” ។ សម្រាប់វិនិយោគិន ដែលមានគណនីជួញដូរស្រាប់ អាចចូលមើលទិន្នន័យទាន់ពេល(Real-time data) នៅក្នុង “តារាងបញ្ញបច្ចុប្បន្ន” (ដែលស្ថិតនៅខាងស្ដាំផ្នែកខាងលើនៃគេហទំព័ររបស់ផ.ម.ក.) ដោយប្រើលេខអត្តសញ្ញាណអ្នកប្រើប្រាស់(User ID)ដែលផ្តល់ឱ្យដោយឥតគិតថ្លៃ ពីក្រុមហ៊ុនឈ្មួញជើងសាមូលបត្រ។ CSX៕
