ដោយ៖ លក្ខិណា
ភ្នំពេញ៖ ធនាគារ BRED Bank (Cambodia ) ដែលជាធនាគារមកពីប្រទេសបារាំង បានចុះអនុស្សរណៈនៃការយោគយល់គ្នា ជាមួយក្រុមហ៊ុនអចលនទ្រព្យធំមួយនៅកម្ពុជា ដើម្បីសហការផ្ដល់សេវាហិរញ្ញវត្ថុដល់អ្នកដែលទិញអចលនទ្រព្យតាមបណ្ដាញក្រុមហ៊ុន Century 21 Cambodia។
អនុស្សារណៈនៃការយោគយល់គ្នា (MOU) នេះ ត្រូវបានចុះហត្ថលេខាដោយលោក Seraj Sutton នាយកប្រតិបត្តិនៃក្រុមហ៊ុន Century 21 Cambodia លោក Guillaume Perdon ប្រធាននាយកប្រតិបត្តិនៃធនាគារ BRED Bank (Cambodia) និងអ្នកស្រីមាស គន្ធានាយកគ្រប់គ្រងបណ្តាញសាខាផ្នែកហិរញ្ញវត្ថុបុគ្គល ធនាគារ BRED Bank (Cambodia) នៅថ្ងៃទី២៨ ខែមករា ឆ្នាំ២០២១។
យោងតាមសេចក្តីប្រកាសព័ត៌មានរបស់ក្រុមហ៊ុន Century 21 Cambodia បានឱ្យដឹងថា តាមរយៈ MoU នេះ អតិថិជនដែលទិញអចលនទ្រព្យតាមក្រុមហ៊ុន Century 21 Cambodia នឹងមានភាពងាយស្រួលជាងមុនក្នុងការទទួលបានហិរញ្ញវត្ថុ ដើម្បីទិញអចលនទ្រព្យក្នុងក្តីស្រមៃរបស់ពួកគេ ដោយទទួលបានកម្ចីក្នុងអត្រាការប្រាក់សមរម្យ សេវាឆាប់រហ័ស ទំហំកម្ចីសមតាមតម្រូវការពីធនាគារ BRED Bank (Cambodia)។
លោក Seraj Sutton បានមានប្រសាសន៍ថា វាជាសញ្ញាវិជ្ជមានមួយសម្រាប់វិស័យអចលនទ្រព្យកម្ពុជា ដោយក្រុមហ៊ុនអចលនទ្រព្យធំមួយនៅកម្ពុជា ដែលបានធ្វើជាដៃគូជាមួយធនាគារ BRED Bank ដែលជាធនាគារអឺរ៉ុបដំបូងគេនៅកម្ពុជា ហើយលោកជឿជាក់ថាការសហការគ្នានេះនឹងដើរតួនាទីយ៉ាងសំខាន់ក្នុងការបង្កើតឱកាសកាន់តែប្រសើរសម្រាប់អតិថិជន និងវិនិយោគិន ក៏ដូចជាជួយឱ្យប្រជាជនកម្ពុជាកាន់តែច្រើនឡើងមានលទ្ធភាពទិញអចលទ្រព្យ ក្នុងក្តីសុបិន្តរបស់ពួកគេ។
ការចូលរួមអភិវឌ្ឍន៍អចលនទ្រព្យរបស់ធនាគារមួយនេះ វានឹងក្លាយជាផ្លូវត្រួសត្រាយមួយទៀតដល់ធនាគារដទៃទៀតនៅកម្ពុជា ក្នុងការចូលរួមអភិវឌ្ឍន៍អចលនទ្រព្យនៅក្នុងប្រទេសកម្ពុជា ក្នុងពេលដែលវិស័យនេះ បានក្លាយជាវិស័យស្នួលនិងសំខាន់ ក្នុងការលើកស្ទួយកំណើនសេដ្ឋកិច្ចជាតិ៕
