ដោយៈ ម៉ាណេត
ភ្នំពេញៈ អនុប្រធានសភាពាណិជ្ជកម្មកម្ពុជាបានលើកឡើងថា កម្ពុជានឹងទាក់ទាញការវិនិយោគជាច្រើន ពីក្រុមហ៊ុនអាមេរិក និងក្រុមហ៊ុនចិន ដែលនឹងមកបោះទុនវិនិយោគនៅក្នុងឆ្នាំ២០២១នេះ ដោយសារកម្ពុជាទទួលបានទាំងការអនុគ្រោះពន្ធពីអាមេរិក និងកិច្ចព្រមព្រៀងពាណិជ្ជកម្មសេរី (FTA) ជាមួយចិន។
លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជាបានថ្លែងប្រាប់នៅល្ងាចថ្ងៃទី២៥ ខែមករា ឆ្នាំ២០២១ថា កំណើននាំចេញទៅអាមេរិកនៅតែកើនឡើង ហើយសង្គ្រាមពាណិជ្ជចិន និងអាមេរិកកំពុងបន្តភាពតានតឹង វាធ្វើឱក្រុមហ៊ុនជាច្រើនផ្លាស់ប្តូរទីតាំងផលិតកម្មមកកាន់កម្ពុជា ហើយនាំចេញទៅសហរដ្ឋអាមេរិក។
លោកបានពន្យល់ថា “ក្រុមហ៊ុនអាមេរិក នៅចិន និងក្រុមហ៊ុនចិន នៅទឹកដីចិនផ្ទាល់ ផលិត ហើយនាំចេញអាមេរិកជាប់ពន្ធខ្ពស់ ដូច្នេះទាំងក្រុមហ៊ុនអាមេរិក និងចិនទាំងនោះ អាចងាកមកកម្ពុជា ដើម្បីផលិត ហើយនាំចេញទៅអាមេរិក” ។ លោកបន្តថា “ក្រុមហ៊ុននៅអាមេរិក ដែលផលិត ហើយនាំចេញទៅចិនជាប់ពន្ធខ្ពស់ ក៏អាចងាកមកកម្ពុជា ដើម្បីរៀបចំទីតាំងផលិតកម្ម និងនាំចេញចិនវិញផងដែរ ព្រោះយើងមានកិច្ចព្រមព្រៀងពាណិជ្ជកម្មសេរីជា (FTA) ជាមួយចិន” ។
លោកឧកញ៉ាលឹម ហេងបានថ្លែងថា កម្ពុជានៅតែមានភាពទាក់ទាញការវិនិយោគពីបរទេស ដោយសារតម្លៃពលកម្មរបស់យើងនៅទាប ហើយកម្លាំងវ័យក្មេងរបស់យើងមានច្រើន ដូច្នេះភាពទាក់ទាញនៅតែមាន ហើយឱកាស និងទីតាំងនៅមានតម្លៃធូរថ្លៃ ដែលអាចឱ្យវិនិយោគិន ចូលមកបណ្តាក់ទុន។
លោកបានថ្លែងទៀតថា កម្ពុជានឹងបន្តទទួលបានការវិនិយោគ ពីទាំងក្រុមហ៊ុនអាមេរិក និងក្រុមហ៊ុនចិនកាន់តែច្រើន នៅក្នុងឆ្នាំ២០២១នេះ ដោយសារតែកម្ពុជាមានប្រព័ន្ធអនុគ្រោះ GSP របស់អាមេរិក និង FTA ជាមួយចិន។
អ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជា លោកបណ្ឌិតហុង វណ្ណៈបានមានប្រសាសន៍ថា ការទទួលបានកិច្ចព្រមព្រៀងពាណិជ្ជកម្មសេរីកម្ពុជា ចិន កិច្ចព្រមព្រៀងអនុគ្រោះពន្ឋ GSP របស់អាមេរិក និងកិច្ចព្រមព្រៀងជាច្រើនទៀតនាពេលខាងមុខ ដែលនឹងផ្តល់កាលានុវត្តន៍ភាព ជម្រុញកំនើននៃការនាំចេញរបស់កម្ពុជា ដែលវានឹងជំរុញកំនើនសេដ្ឋកិច្ចកម្ពុជានៅឆ្នាំនេះ ឲ្យសម្រេចបានកំនើនល្អប្រសើរឡើងវិញ។
លោកបន្តថា “កម្ពុជានឹងទាក់ទាញការវិនិយោគពីបណ្តារោងចក្រ សហគ្រាសជាច្រើន ដើម្បីផលិតនាំចេញដោយរួចពន្ឋទៅកាន់ប្រទេសចិន ប៉ុន្តែអ្វីសំខាន់មួយទៀតសំរាប់ផលិតផលក្នុងស្រុក តើកម្ពុជាបានត្រៀមខ្លួនបានល្អបែបណា ដើម្បីនាំចេញកសិផលទៅកាន់ប្រទេសចិន” ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោកវេង សាខុនបានថ្លែងថា បញ្ហាភូត្តគាមអនាម័យ ជាបញ្ហាចម្បង ដែលនឹងក្លាយជាឧបសគ្គក្នុងការនាំចេញកសិផលកម្ពុជាទៅកាន់ប្រទេសចិន ដែលការងារនេះក្រសួងកសិកម្ម បាននិងកំពុងធ្វើជាមួយកសិករ ដើម្បីលើកកំពស់បញ្ហាភូត្តគាមអនាម័យឲ្យបានល្អប្រសើរ៕
