ដោយៈ ចំណាន
ភ្នំពេញៈ លោកលឹម វិសាល អគ្គលេខាធិការរងគណៈកម្មាធិការវិនិយោគកម្ពុជា បានទទួលជួបពិភាក្សាការងារ ជាមួយគណៈប្រតិភូធុរកិច្ចដែលសម្របសម្រួលដោយក្រុមហ៊ុន Cambodia Securities Plc. ក្នុងគោលបំណងលើកកម្ពស់ ការយល់ដឹងឱ្យកាន់តែស៊ីជម្រៅអំពីសក្តានុពល និងបរិយាកាសវិនិយោគនៅកម្ពុជា។
ភាគីទាំងពីរក៏បានផ្លាស់ប្តូរព័ត៌មាន ជុំវិញកាលានុវត្តភាពធុរកិច្ចថ្មីៗ ដើម្បីទាក់ទាញវិនិយោគិន ដែលមានសក្តានុពលបន្ថែមទៀត ឱ្យមកបណ្តាក់ទុននៅកម្ពុជា។
ក្នុងជំនួបនោះ លោកលឹម វិសាល បានសម្តែងនូវការស្វាគមន៍យ៉ាងកក់ក្តៅជូនចំពោះសមាជិក នៃគណៈប្រតិភូធុរកិច្ចទាំងអស់ ដែលបានអញ្ជើញមកបំពេញទស្សនកិច្ចការងារ នៅព្រះរាជាណាចក្រកម្ពុជា។
ជាមួយគ្នានេះ លោកបញ្ជាក់ពីកិច្ចខិតខំប្រឹងប្រែង របស់រាជរដ្ឋាភិបាល ក្នុងការកែលម្អបរិយាកាសវិនិយោគ តាមរយៈការផ្តល់ការលើកទឹកចិត្តប្រកបដោយភាពទាក់ទាញ និងសេវាថែទាំវិនិយោគដោយគ្មានការរើសអើង ព្រមទាំងបានឆ្លើយទៅនឹងសំនួរជាក់លាក់ មួយចំនួនរបស់គណៈប្រតិភូ។
លោកលឹម វិសាលបានសង្កត់ធ្ងន់ថា វិស័យឯកជនគឺជាដៃគូមិនអាចខ្វះបាន ក្នុងការជំរុញកំណើនសេដ្ឋកិច្ច និងការបង្កើតឱកាសការងារ ហើយក្រុមប្រឹក្សាអភិវឌ្ឍន៍កម្ពុជា ត្រៀមខ្លួនជាស្រេចក្នុងការផ្តល់កិច្ចសម្រួលគ្រប់បែបយ៉ាងដល់វិនិយោគិន ដើម្បីធានាបាននូវភាពជោគជ័យនៃគម្រោងវិនិយោគ និងផលប្រយោជន៍ទៅវិញទៅមក៕
