ដោយ: សហសេវិក
អន្តរជាតិ: តម្លៃជួលការិយាល័យជាមធ្យមនៅកណ្តាលទីក្រុងតូក្យូបានហក់ឡើងដល់កម្រិតខ្ពស់បំផុតក្នុងរយៈពេល៣១ឆ្នាំនៅខែកក្កដា ដោយសារការផ្លាស់ប្តូរទីតាំង និងពង្រីកការិយាល័យរបស់ក្រុមហ៊ុននានាជំរុញឱ្យម្ចាស់អគារដំឡើងថ្លៃជួល។
តម្លៃជួលជាមធ្យមនៅទូទាំងសង្កាត់ទាំង៥ នៅកណ្តាលទីក្រុងតូក្យូបានកើនឡើង១,២៨ភាគរយធៀបនឹងខែមិថុនា ដល់២៣.២៨៧យ៉េន (១៤៧ដុល្លារអាមេរិក) ក្នុងមួយ Tsubo (១ tsubo= ៣,៣ម៉ែត្រការ៉េ)។
តួលេខខាងលើជាជាការកើនឡើងប្រចាំខែលើកទី៣០ ជាប់ៗគ្នា និងជាកម្រិតខ្ពស់បំផុតចាប់តាំងពីឆ្នាំ១៩៩៥។នេះបើយោងតាមការដកស្រង់ចុះផ្សាយដោយសារព័ត៌មាន Nikkei Asia។
តម្រូវការនៅតែមានភាពរឹងមាំ ខណៈដែលក្រុមហ៊ុនកាន់តែច្រើនពង្រីកប្រតិបត្តិការរបស់ពួកគេ នាំបុគ្គលិកត្រឡប់មកការិយាល័យវិញ និងស្វែងរកកន្លែងធ្វើការដែលមានគុណភាពកាន់តែប្រសើរ ដើម្បីទាក់ទាញ និងរក្សាបុគ្គលិក។
ទន្ទឹមនឹងនេះ ការស្វែងរកកន្លែងការិយាល័យកាន់តែមានភាពពិបាក។ អត្រាការិយាល័យទំនេរបានធ្លាក់ចុះមកត្រឹម១,៩៥ភាគរយក្នុងខែកក្កដា ទាបជាងកម្រិត៥ភាគរយ ដែលត្រូវបានចាត់ទុកថាជាទីផ្សារមានតុល្យភាព។
កង្វះខាតនេះក៏កំពុងជំរុញឱ្យមានតម្រូវការសម្រាប់ការអភិវឌ្ឍអគារការិយាល័យថ្មីៗផងដែរ។ យោងតាមក្រុមហ៊ុន CBRE បានឱ្យដឹងថា ចំនួនជាង៩០ភាគរយនៃទំហំការិយាល័យសរុបនៅក្នុងអគារធំៗចំនួន៤ ដែលគ្រោងនឹងបញ្ចប់នៅឆមាសទីពីរនៃឆ្នាំ២០២៦ ត្រូវបានជួលរួចហើយកាលពីខែមិថុនា៕
