ដោយៈសាវុធ
ភ្នំពេញៈ លោកអ្នកមិនតម្រូវឱ្យឆ្លងកាត់ ការវាយតម្លៃគុណវុឌ្ឈិណាមួយឡើយ ដើម្បីអាចជួញដូរមូលបត្រ ដែលបានចុះបញ្ជីនៅផ្សារមូលបត្រកម្ពុជា (ផ.ម.ក.)។ ប៉ុន្តែ លោក អ្នក គួរមានយ៉ាងហោចចំណេះដឹងមូលដ្ឋានមួយចំនួន ទាក់ទងនឹងការវិនិយោគហិរញ្ញវត្ថុនិងការជួញដូរមូលបត្រ ព្រមទាំងការយល់ដឹងពីហានិភ័យ ដែលអាចកើតមាន ដើម្បីធានាបាននូវការសម្រេចចិត្តវិនិយោគដែលត្រឹមត្រូវ។
ផ.ម.ក. មិនកំណត់ដើមទុនអប្បបរមា សម្រាប់ការវិនិយោគឡើយ។ លោកអ្នកត្រូវមានត្រឹមតែទឹកប្រាក់ ស្មើនឹងថ្លៃមូលបត្រ ដែលត្រូវទិញបូករួមជាមួយថ្លៃកម្រៃសេវា ដែលត្រូវបង់ទៅក្រុមហ៊ុនមូលបត្រ នៅពេលដែលលោកអ្នកបញ្ជាទិញតែប៉ុណ្ណោះ។ ឯកតាបញ្ជាអប្បបរមានៃភាគហ៊ុន និងសញ្ញាបណ្ណនៅផ.ម.ក. គឺត្រឹមតែ១ភាគហ៊ុន ឬ១ឯកតាសញ្ញាបណ្ណ។
ជាមួយគ្នានេះ ដើម្បីចាប់ផ្តើមជួញដូរបាន អ្នកត្រូវមានគណនីជួញដូរជាមុនសិន។ ដើម្បីបើកគណនីជួញដូរមូលបត្រ អ្នកត្រូវទាក់ទងទៅកាន់ក្រុមហ៊ុន មូលបត្រណាមួយដែលជាសមាជិក របស់ ផ.ម.ក.៕
