ដោយ៖ សាវុធ
ភ្នំពេញៈ ការមានគំនិតអភិវឌ្ឍខ្លួនធ្វើជាអ្នកជំនួញ ឬប្រកបអាជីវកម្មដោយម្ចាស់ការលើខ្លួនឯងគឺជារឿងដែលល្អបំផុត និងគួរតែអនុវត្តន៍ភ្លាម ប្រសិនខ្លួនមានលទ្ធភាពគ្រប់គ្រាន់។ ប៉ុន្តែអ្វីដែលត្រូវតែពិចារណាមុនពេលបោះជំហានចេញ ដោយខ្វះមិនបាននោះ គឺគួរធ្វើអ្វីខ្លះដើម្បីអាចឈរជើងបានយូរអង្វែង និងទទួលបានភាពជោគជ័យលើអាជីវកម្ម។
១. មិនត្រូវគិតទៅលើតែប្រាក់ចំណេញមួយមុខ
ការចាប់ផ្តើមអាជីវកម្មមួយ ម្ចាស់តែងចង់បានប្រាក់ចំណេញឱ្យបានច្រើនដែរ។ ផ្នត់គំនិតរកស៊ី ចង់បានតែប្រាក់ចំណេញសម្រាប់ខ្លួនឯងនេះ ជាគំនិតអាត្មានិយម ហើយបើទោះជាជោគជ័យក៏អាចកើតឡើងក្នុងរយៈពេលខ្លីប៉ុណ្ណោះ។ នៅក្នុងប្រទេសជប៉ុនអាជីវកម្មជោគជ័យ គឺមានរយៈពេលវែងរហូតតកូនតចៅរាប់រយឆ្នាំក៏មាន។ចំនុចសំខាន់ដើម្បីឱ្យអាជីវកម្មជោគជ័យមានរយៈពេលវែង គឺមិនត្រូវគិតតែពីប្រយោជន៍ផ្ទាល់ខ្លួនតែមួយមុខនោះទេ តែត្រូវគិតពីប្រយោជន៍សាធារណៈ ប្រយោជន៍អតិថិជនជាធំ មិនថាក្រុមហ៊ុនផ្តល់សេវាកម្ម ឬផលិតកម្មនោះឡើយ ដើម្បីទទួលបានការគាំទ្រកាន់តែច្រើនឡើង។
នៅលើរបត់ទីផ្សារសេរីក្នុងប្រទេសកម្ពុជា ក្រុមហ៊ុនមួយចំនួនដែលចេញលក់ផលិតផលនៅលើទីផ្សារលើកដំបូង ត្រូវគេមើលឃើញថាភាគច្រើនតែងផ្តល់នូវគុណភាព និងសេវាកម្មល្អ ប៉ុន្តែនៅពេលទទួលបានការគាំទ្រច្រើនហើយ ក្រុមហ៊ុនខ្លះបានបន្ថយគុណភាព និងបរិមាណផលិតផលរបស់ខ្លួន ដែលជាយុទ្ធសាស្ត្រទីផ្សារស្វែងរកប្រាក់ចំណេញឱ្យបានច្រើន តែយុទ្ធសាស្ត្រនេះគឺជាការចាក់សម្លាប់អាជីវកម្មរបស់ខ្លួន នៅក្នុងរយៈពេលដ៏ខ្លី។
២. ស្គាល់ពីអតិថិជនគោលដៅច្បាស់
សម្រាប់អ្នកមានទុន ការចាប់ផ្តើមអាជីវកម្ម ដោយមិនបានសិក្សាទីផ្សារ និងអតិថិជនគោលដៅជាមុនហាក់បី ដូចជា ប្រថុយប្រថានខ្លាំងណាស់។ ជួនកាលមានផលិតផលល្អ ប៉ុន្តែអតិថិជនគោលដៅ ជីវភាពរស់នៅរបស់ពួកគេមិនសមល្មម នឹងទទួលយកវត្ថុទាំងនោះមកប្រើប្រាស់ ឬទទួលទាន។ ឧទាហរណ៍ ទីផ្សារកាហ្វេនៅក្នុងក្រុងភ្នំពេញ ដែលមានហាងទំនើប មានគុណភាពល្អ មានសេវាកម្មល្អ មានម៉ាស៊ីនត្រជាក់ លក់ក្នុងតម្លៃ ២-៣ ដុល្លារ ក្នុង១កែវ ដែលមានអតិថិជនគាំទ្រប្រមាណ៣០ភាគរយ ប៉ុណ្ណោះ ប៉ុន្តែកាហ្វេដែលមានតម្លៃចន្លោះពី១-២ ដុល្លារ ក្នុង១កែវ ដែលលក់នៅហាងបែបធម្មតា បែរជាមានអតិថិជនគាំទ្រច្រើនចន្លោះពី ៣០-៧០ ភាគរយ នៃចំណែកទីផ្សារនៃអ្នកនិយមទទួលទានកាហ្វេ ដូច្នេះបើសិនជាចាប់ផ្តើមអាជីវកម្មកាហ្វេ គួរត្រូវជ្រើសរើសអតិថិជនគោលដៅមួយណាឱ្យប្រាកដ។
៣. ស្គាល់ពីសមាសភាពដៃគូប្រកួតប្រជែង
មានអ្នកធ្វើជំនួញមួយចំនួនគិតថា ខ្លួនឯងមានសមត្ថភាពគ្រប់គ្រាន់ មានផលិតផលល្អហើយនោះ ក៏ចាប់ផ្តើមចែកចាយនៅលើទីផ្សារតែម្តង ដោយមិនបានគិតទៅលើដៃគូប្រកួតប្រជែងនោះឡើយ ។ កត្តានេះ នឹងអាចធ្វើឱ្យគម្រោងអាជីវកម្មមិនជោគជ័យ ឬអាចត្រឹមទទួលបានការគាំទ្រតិចតួចបំផុត។ ដូច្នេះដើម្បីឱ្យមានការគាំទ្រច្រើន គួរតែសិក្សាអំពីដៃគូប្រកួតប្រជែងឱ្យបានច្បាស់ ថាតើដៃគូប្រកួតប្រជែងរបស់យើងជាអ្នកណា ហើយគេបានធ្វើអ្វីខ្លះ ចែកចាយផលិតផលបែបណានៅលើទីផ្សារ ដើម្បីទាញយកចំណែកទីផ្សារបស់យើងបាន។
៤. ថែរក្សាអតិថិជនដែលមានស្រាប់
ដោយសារចង់បានអតិថិជនឱ្យបានកាន់តែច្រើនឡើងៗ អ្នកខ្លះគិតតែពីធ្វើយុទ្ធសាស្ត្រដណ្តើមយកអតិថិជនបន្ថែម រហូតភ្លេចគិតពីការថែរក្សាអតិថិជនចាស់ ដែលមានក្នុងដៃស្រាប់ រហូតធ្វើឱ្យប្រភពគាំទ្រអស់ទឹកចិត្តនាំគ្នាចាកចេញ។ ដូច្នេះមានតែការថែរក្សាពីអតិថិជនចាស់ ផ្តល់នូវផលិតផលដែលមានគុណភាពល្អ គួរជាទីទុកចិត្ត រួមជាមួយការផ្តល់សេវាកម្មល្អ លឿនរហ័សទាន់ចិត្ត ទើបធ្វើឱ្យអតិថិជនចាស់លើកសរសើរ និយាយតគ្នាពីមាត់មួយទៅមាត់មួយ ដែលជាយុទ្ធសាស្ត្រពង្រីកទីផ្សារបានលឿន និងមានប្រសិទ្ធភាពបំផុត៕