ដោយៈម៉ាណេត
ភ្នំពេញៈ ភ្នាក់ងារវាយតម្លៃសេដ្ឋកិច្ច Moody’s របស់សហរដ្ឋអាមេរិកបានឱ្យដឹងនៅថ្ងៃទី១២ ខែមករា ឆ្នាំ២០២១កន្លងមកថា ហានិភ័យនៃភាពងាយរងគ្រោះពីបំណុលពីបរទេសរបស់ប្រទេសកម្ពុជា នៅតែស្ថិតក្នុងការគ្រប់គ្រងបាន។
យោងតាមការវាយតម្លៃចុងក្រោយរបស់ភ្នាក់ងារ Moody’s អំពីផលប៉ះពាល់នៃវិបត្តិកូវីដ១៩ លើអាស៊ី និងប៉ាស៊ីហ្វិក ទីភ្នាក់ងារវាយតម្លៃរបស់សហរដ្ឋអាមេរិកនេះ បានឱ្យដឹងថា សម្ពាធរំហូរសាច់ប្រាក់ នឹងបន្តបង្កផលប៉ះពាល់ដល់ប្រទេសមួយចំនួន។
ភ្នាក់ងារ Moody’s បានប៉ាន់ប្រមាណថា ទីផ្សារជួរមុខភាគច្រើន ដែលរួមមានប្រទេសកម្ពុជា ឡាវ និងមីយ៉ាន់ម៉ា មានការកើនឡើងនៃបំណុលខាងក្រៅកាលពីឆ្នាំមុន ជាមួយនឹងផលប៉ះពាល់ផ្សេងៗគ្នា ប៉ុន្តែស្ថិតនៅក្រោមការគ្រប់គ្រងបាន” ។
ភ្នាក់ងារនេះបានឱ្យដឹងទៀតថា “ការកើនឡើងនូវបំណុលក្រៅប្រទេស នៅបង់ក្លាដែស កម្ពុជា និងហ្វីជី (Fiji) ត្រូវបានជំរុញដោយហិរញ្ញប្បទាន ដែលផ្តល់ដោយសហគមន៍អន្តរជាតិ” ។
ជាមួយការគ្រប់គ្រងបំណុលសាធារណៈ រដ្ឋាភិបាលកម្ពុជាតែងតែធ្វើឡើងដោយប្រុងប្រយ័ត្នបំផុត ដើម្បីជៀសវាងវិបត្តិបំណុលដូចប្រទេសមួយចំនួន ដែលបាននិងកំពុងមានបញ្ហាកន្លងមក។
ជាក់ស្តែងរដ្ឋាភិបាលកម្ពុជា បានរៀបចំយន្តការជាច្រើន ក្នុងការគ្រប់គ្រងបំណុលសាធារណៈ រាជរដ្ឋាភិបាល ប្រកាន់ខ្ជាប់នូវគោលរណ៍គន្លឹះចំនួន៥ដូចជា ទី១ ខ្ចីឥណទានក្នុងទំហំសមស្រប ដែលស្ថានភាពថវិកា និងសេដ្ឋកិច្ចអាំចទ្រាំទ្របាន។ ទី២ ខ្ចីតែឥណទានដែលមានកម្រិតសម្បទាន ឬលក្ខខណ្ឌអនុគ្រោះខ្ពស់។ ទី៣ ខ្ចីសម្រាប់តែវិស័យអាទិភាពទ្រទ្រង់ចីរភាពនៃកំណើនសេដ្ឋកិច្ច និងវិស័យបង្កើនផលិតភាពសេដ្ឋកិច្ច ឬផលិតភាពផលិតកម្ម។
ទី៤ ប្រើប្រាស់ឥណទាន ប្រកបដោយតម្លាភាព គណនេយ្យភាព ប្រសិទ្ធភាព និងស័ក្ខិសិទ្ធភាពខ្ពស់បំផុត។ ទី៥ ប្រើប្រាស់ឥណទានសម្រាប់ហិរញ្ញប្បទាន គម្រោងវិនិយោគ លើហេដ្ឋារចនាសម្ព័ន្ធសាធារណៈ ដែលត្រូវមានស្តង់ដា និងគុណភាពខ្ពស់ស្របតាមគោលការណ៍ នៃការគ្រប់គ្រងការវិនិយោគសាធារណៈ ព្រមទាំងឆ្លើយតបទៅនឹងតម្រូវការនៃការអភិវឌ្ឍជាតិ នៅក្នុងតំណាក់កាលថ្មី ពិសេសធានាបាននូវចីរភាពសេដ្ឋកិច្ច សង្គម បរិស្ថាន និងភាពធន់នឹងបម្រែបម្រួលអាកាលធាតុ៕
