ដោយគង់ ម៉ាលីន
ភ្នំពេញៈ ផ្សារមូលបត្រកម្ពុជា (ផមក)ជាប្រធានបទថ្មីសម្រាប់ប្រជាជនកម្ពុជា ដែល ប្រជាជនខ្មែរវ័យក្មេងជាច្រើនចង់ដឹង និងចាប់អារម្មណ៏ក្នុងការវិនិយោគ ប៉ុន្តែមិនដឹងពីរបៀបក្នុងការចាប់ផ្ដើម។
គេហទំព័រCambodiabanknews.com និងfacebook pageឈ្មោះ Cambodia Bank News សូមនាំយកនូវចំណេះចឹងថ្មីមួយទាក់ទងនឹងបញ្ហានេះ ដើម្បីបានសិក្សាស្វែងយល់ទាំងអស់គ្នា ខណៈផ្សារហ៊ុនបាន និងកំពុងដើរតួនាទីយ៉ាងសំខាន់ក្នុងសេដ្ឋកិច្ចជាតិ។
ផ.ម.ក គឺជាអ្វី?
ផ.ម.ក. ជាសហគ្រាសរួមគ្នាមួយ ដែលធ្វើប្រតិបត្តិការផ្សាហ៊ុនរបស់រដ្ឋាភិបាលប្រទេសកម្ពុជា៥៥ភាគរយ និងភាគហ៊ុន៤៥ភាគរយដែលគ្រប់គ្រងដោយកូរ៉េ។ ផ្សារមូលបត្រកម្ពុជាដែលគ្រប់គ្នាហៅថាផ.ម.ក ជាផ្សារហ៊ុន ដែលបង្កើតឡើងដើម្បីផ្តល់នូវប្រព័ន្ធសម្រាប់ធ្វើការជួញដូរមូលបត្រ។
វាគឺជាឱកាស សម្រាប់អ្នកក្នុងការចូលរួមក្នុងការវិនិយោគ ហើយអ្នកក៏អាចរកប្រាក់ចំណេញបានច្រើនជាងការរសន្សំប្រាក់នៅក្នុងធនាគារផងដែរ។
តើត្រូវធ្វើដូចម្តេចដើម្បីបើកគណនីនេះបាន?
ដើម្បីចុះឈ្មោះប្រើប្រាស់គណនីជួញដូរមូលបត្រ លោក អ្នកចាំបាច់ត្រូវមានអត្តសញ្ញាណបណ្ណនាំទៅជាមួយ។ អតិថិជនត្រូវមានលេខអត្តសញ្ញាណវិនិយោគិន ដែលមានតម្លៃ៥ដុល្លារ។ ជាមួយនឹងគណនីជួញដូរមូលបត្រ អតិថិជនអាចទិញនិងលក់ភាគហ៊ុនបានហើយ។ បន្ទាប់ពីពេលដែលទិញឬវិនិយោគលក់ភាគហ៊ុនអតិថិជន ត្រូវបង់កម្រៃជើងសារមូលបត្រអោយទៅក្រុមហ៊ុនមូលបត្រ ដែលកម្រៃជើងសារនោះ អាស្រ័យតាមក្រុមហ៊ុនbroker ដែលយើងបើកគណនីជួញដូរជាមួយ។
តើអ្នកណាខ្លះអាចទិញភាគហ៊ុនបាន?
មនុស្សគ្រប់រូបដែលមានអាយុចាប់ពី១៨ឆ្នាំទៅ អាចវិនិយោគប្រាក់របស់ពួកគេនៅក្នុងផ្សារហ៊ុនបាន។ ដំបូងពួកគេត្រូវចុះឈ្មោះ ដើម្បីបើកគណនីជួញដូរមូលបត្រ មួយជាមួយbroker ដែលមិនតម្រូវ ត្រូវតែមានគណនីធនាគារនោះទេ។
លោក អ្នកអាចចុះឈ្មោះប្រើប្រាស់គណនី ជាមួយឈ្មួញកណ្ដាលដោយឥតគិតថ្លៃ៕
