ដោយៈសុខុម
អន្តរជាតិៈ ទិន្នន័យនៃការជួញដូរបង្ហាញថា មាសដែលជាការវិនិយោគដ៏មានសុវត្ថិភាពបំផុត បានឡើងថ្លៃខ្ពស់គួរឱ្យភ្ញាក់ផ្អើលកាលពីថ្ងៃព្រហស្បតិ៍ ទី៣១ ធ្នូ ដែលជាចុងក្រោយនៃឆ្នាំ២០២០ ពោលគឺឡើងរហូតដល់ជាង២០% មិនធ្លាប់មាននៅលើទីផ្សារអន្តរជាតិក្នុងរយៈពេលមួយទសវត្សរ៍មកនេះ។ នេះបើយោងតាមសារព័ត៌មាន Sputnik News ចុះផ្សាយកាលពីពេលថ្មី។
ហាងឆេងមាសបានធ្លាក់ថ្លៃបន្តិច មកនៅត្រឹម១.៨៩០,២៥ដុល្លារ ក្នុងមួយអោន (ounce) ក្នុងថ្ងៃនោះ ប៉ុន្តែបានឡើងថ្លៃរហូតដល់ទៅជាង២៤% សម្រាប់ឆ្នាំ២០២០ ទាំងមូល។ ហាងឆេងមាសនៅសហរដ្ឋអាមេរិកបានឡើងថ្លៃ ០,២% ដល់១.៨៩៧,៦០ ដុល្លារក្នុងមួយអោន។
ហាងឆេងមាសសម្រាប់ការជួញដូរកាលពីខែកុម្ភៈ នៅលើផ្សារភាគហ៊ុនអាមេរិក New York Mercantile Exchange (NYMEX) បានឡើងថ្លៃ ០,០២% ឬ ០,៤៥ ដុល្លារដល់ ១.៨៩៣,៧៥ ដុល្លារក្នុងមួយអោន។ ចំណែកហាងឆេងប្រាក់ សម្រាប់ការជួញដូរកាលពីខែមីនា បានឡើងថ្លៃ០,១៤% ដល់ ២៦,៦០៥ដុល្លារក្នុងមួយអោន។ រីឯហាងឆេងផ្លាកទីនបានធ្លាក់ថ្លៃ ០,២% មកនៅត្រឹម១.០៦៣,៣៩ដុល្លារក្នុងមួយអោន ប៉ុន្តែជារួមបានឡើងថ្លៃ១០% ក្នុងឆ្នាំ២០២០ ។
យោងតាមទិន្នន័យសម្រាប់ឆ្នាំ២០២០បានបង្ហាញថា ហាងឆេងមាស លើទីផ្សារអន្តរជាតិបានឡើងថ្លៃ២១,៧% ដែលខ្ពស់បំផុតមិនធ្លាប់មានចាប់តាំងពីឆ្នាំ២០១១មក។
កាលពីខែមករា ហាងឆេងមាសនៅត្រឹមតែប្រមាណ១.៦០០ដុល្លារប៉ុណ្ណោះ ក្នុងមួយអោន ប៉ុន្តែចាប់ពីខែមីនា ដល់ខែកក្កដា និងនៅដើមខែសីហា ហាងឆេងមាសបានឡើងថ្លៃខ្ពស់បំផុតជាប្រវត្តិសាស្ត្រ ដែលមានតម្លៃរហូតដល់ ២.០៦៩,៤ ដុល្លារក្នុងមួយអោន៕
