ដោយ: ម៉ាណេត
ភ្នំពេញ: វិស័យធនាគារ និងហិរញ្ញវត្ថុនឹងបន្តដើរតួនាទីគន្លឹះមួយ ក្នុងការគាំទ្រសកម្មភាពសេដ្ឋកិច្ច ព្រមទាំងរួមចំណែករក្សាលំនឹងម៉ាក្រូសេដ្ឋកិច្ច និងហិរញ្ញវត្ថុ។ នេះបើយោងតាមការលើកឡើងរបស់ធនាគារជាតិនៃកម្ពុជា (NBC) នៅក្នុងរបាយការណ៍ស្តីពីវឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ២០២០ និងទស្សនវិស័យ២០២១ ចេញផ្សាយនៅថ្ងៃទី៣១ ខែធ្នូ ឆ្នាំ២០២០ ។
NBC បានឱ្យដឹងថា លើសពីនេះការរំពឹងពីការងើបឡើង នៃកំណើនសេដ្ឋកិច្ចនឹងអាចបន្ថយសម្ពាធមកលើវិស័យធនាគារ ជាពិសេសលទ្ធភាពបង្កើនឥណទាន និងទទួលបានប្រាក់បញ្ញើខ្ពស់ជាងឆ្នាំ២០២០ ។ ទោះយ៉ាងណា ការថយចុះចំណូល និងសន្សំនៅឆ្នាំ២០២០ នឹងអាចបង្កើនបំណុលរបស់ប្រជាជន ដែលបញ្ហានេះអាចបង្កជាហានិភ័យចម្បងមួយ ដូចដែលប្រទេសកំពុងអភិវឌ្ឍន៍នានា បាននិងកំពុងប្រឈមក្នុងដំណាក់កាលក្រោយវិបត្តិកូវីដ-១៩ ដូច្នេះដែរ។
ម្យ៉ាងទៀត ភាពមិនប្រាកដប្រជានៃវិស័យសេដ្ឋកិច្ចមួយចំនួន ដែលទទួលរងឥទ្ធិលនៃជំងឺ កូវីដ-១៩ ក៏អាចនាំឱ្យហានិភ័យកើនឡើង ចំពោះវិស័យធនាគារផងដែរ។ ឆ្លើយតបនឹងបញ្ហានេះ ធនគារជាតិនៃកម្ពុជា នឹងបន្តពង្រឹងការត្រួតពិនិត្យប្រព័ន្ធធនាគារ និងបានត្រៀមដាក់ចេញវិធានការប្រុងប្រយ័ត្ន និងការគាំទ្រចាំបាច់នានា ដើម្បីរក្សាចីរភាព ភាពធន់ និងទំនុកចិត្ត មកលើប្រព័ន្ធធនាគារកម្ពុជា។
ទន្ទឹមនេះ ប្រព័ន្ធធនាគារនឹងបន្តផ្តល់ឥណទាន ប្រកបដោយការទទួលខុសត្រូវខ្ពស់ លើកកម្ពស់ការយល់ដឹងផ្នែកហិរញ្ញវត្ថុរបស់សាធារណជន ពង្រឹងកិច្ចគាំពារអតិថិជន និងបង្កើនគុណភាព និងតម្លាភាព នៃប្រព័ន្ធចែករំលែកព័ត៌មានឥណទាន ដែលនឹងរួមចំណែករក្សាស្ថិរភាពហិរញ្ញវត្ថុឱ្យបានរឹងមាំ និងចៀសផុតពីបញ្ហាបំណុលវ័ណ្ឌករបស់ប្រជាពលរដ្ឋ។
ម្យ៉ាងវិញទៀតសេដ្ឋកិច្ចកម្ពុជា នៅបន្តមានកម្រិតដុល្លារូបនីយកម្មខ្ពស់នៅឡើយ បើទោះបីជាសម្រេចបានវឌ្ឍនភាពល្អកន្លងមកក៏ដោយ ដូចជា ការបិទស្លាកថ្លៃទំនិញ និងសេវាជាប្រាក់រៀល ការបង្កើនការផ្តល់កម្ចី និងការទូទាត់សេវាសាធារណៈជារៀល។
ការប្រើប្រាស់ប្រាក់រៀលឱ្យកាន់តែទូលំទូលាយ នឹងគាំទ្រដល់ប្រសិទ្ធភាពនៃការអនុវត្តគោលនយោបាយរូបិយវត្ថុនិងសារពើពន្ធ ជាពិសេសក្នុងដំណាក់កាលស្តារ និងជំរុញសកម្មភាពសេដ្ឋកិច្ច ដូចជា តាមរយៈការកាត់បន្ថយអត្រាការប្រាក់នៅលើទីផ្សារ ការចាក់បញ្ចូលសាច់ប្រាក់នៅក្នុងសេដ្ឋកិច្ច និងការប្រមូលទុនដោយការបោះផ្សាយមូលបត្ររដ្ឋជាដើម។
ក្នុងន័យនេះការរៀបចំក្របខ័ណ្ឌ និងយន្តការបោះផ្សាយមូលបត្ររដ្ឋ និងការជំរុញការប្រើប្រាស់ប្រាក់រៀល នឹងអនុញ្ញាតឱ្យរាជរដ្ឋាភិបាល ទទួលបានហិរញ្ញប្បទានរយៈពេល វែងបន្ថែមទៀត ហើយផ្តល់លទ្ធភាពដល់ធនាគារជាតិនៃកម្ពុជា ក្នុងការអនុវត្តគោលនយោបាយ រូបិយវត្ថុឱ្យកាន់តែមានប្រសិទ្ធភាពផ្អែកលើយន្តការទីផ្សារ។
វិបត្តិជំងឺកូវីដ-១៩ ក៏បានផ្លាស់ប្តូររបៀបនៃការរស់នៅ ទំនាក់ទំនង និងដំណើរការសេដ្ឋកិច្ច ហើយបាននាំទៅរកប្រក្រតីថ្មី ដែលក្នុងនោះការប្រើប្រាស់បច្ចេកវិទ្យាទទួលបានការពេញនិយម និងអាចក្លាយជាប្រភពកំណើនសក្តានុពលថ្មីសម្រាប់សេដ្ឋកិច្ច។
ក្នុងស្ថានភាពនេះ ធនាគារជាតិនៃកម្ពុជាក៏បានអភិវឌ្ឍប្រព័ន្ធទូទាត់ ផ្អែកលើបច្ចេកវិទ្យាហិរញ្ញវត្ថុថ្មីៗ ដែលបាននិងកំពុងដើរតួនាទីកាន់តែសំខាន់ក្នុងការសម្រួល និងគាំទ្រកំណើនប្រតិបត្តិការដោះដូរ ការវិនិយោគ និងពាណិជ្ជកម្មអន្តរជាតិ។ ទំនើបកម្មប្រព័ន្ធទូទាត់ និងការប្រើប្រាស់បច្ចេកវិទ្យាហិរញ្ញវត្ថុថ្មី នឹងរួមចំណែក គាំទ្រដល់សេដ្ឋកិច្ចឌីជីថលរបស់រាជរដ្ឋាភិបាលផងដែរ៕
