ដោយៈ សាវុធ
ភ្នំពេញៈ តាមរយៈប្រព័ន្ធបញ្ជរតែមួយរបស់អាស៊ាន (ASW) ក្រុមហ៊ុននាំចេញ និងនាំចូលទាំងអស់នៅកម្ពុជា អាចដាក់ពាក្យសុំផ្លាស់ប្តូរទិន្នន័យ ប្រតិវេទន៍គយអាស៊ាន (ACDD) តាមប្រព័ន្ធអេឡិចត្រូនិក ជាមួយបណ្ដាប្រទេសសមាជិកអាស៊ាន។ នេះបើយោងតាមសេចក្តីជូនដំណឹង របស់អគ្គនាយកដ្ឋានគយ និងរដ្ឋាករកម្ពុជា (GDCE) កាលពីថ្មីៗនេះ។
GDCE បានឱ្យដឹងថា ដើម្បីចូលរួមលើកកម្ពស់បន្ថែមទៀតនូវប្រសិទ្ធភាព នៃកិច្ចសម្រួលពាណិជ្ជកម្ម និងស្របតាមគោលនយោបាយ របស់រាជរដ្ឋាភិបាលអគ្គនាយកដ្ឋានគយ និងរដ្ឋាករកម្ពុជា បានអភិវឌ្ឍរួចរាល់នូវមុខងារ សម្រាប់ផ្លាស់ប្តូរទិន្នន័យប្រតិវេទន៍គយអាស៊ាន (ACDD) ក្នុងទម្រង់អេឡិចត្រូនិក ជាមួយបណ្តាប្រទេសសមាជិកអាស៊ាន តាមរយៈប្រព័ន្ធបញ្ជរតែមួយអាស៊ាន។
GDCE បានឱ្យដឹងទៀតថា “ក្នុងន័យដូចបានជម្រាបជូនខាងលើ អគ្គនាយកដ្ឋានគយនិងរដ្ឋាករកម្ពុជា សម្រេចដាក់ឱ្យអនុវត្តការផ្លាស់ប្តូរទិន្នន័យ ប្រតិវេទន៍គយអាស៊ាន (ACDD)បន្ថែមលើការផ្លាស់ប្តូរវិញ្ញាបនប័ត្រ បញ្ជាក់ដើមកំណើតទំនិញទម្រង់ D (ATIGA e-Form D) ដែលចេញដោយអាជ្ញាធរមានសមត្ថកិច្ច នៃប្រទេសសមាជិកអាស៊ាន ចាប់ពីថ្ងៃជូនដំណឹងនេះតទៅ” ។
ប្រព័ន្ធឆ្លងកាត់គយអាស៊ាន (ACTS) តាមប្រព័ន្ធអនឡាញ កាលពីថ្ងៃទី៣ ខែធ្នូ ឆ្នាំ២០២០ ត្រូវបានដាក់ដំណើរការ ដើម្បីពន្លឿនការធ្វើពាណិជ្ជកម្មទំនិញ តាមដងផ្លូវក្នុងតំបន់អាស៊ីអាគ្នេយ៍ បន្ទាប់ពីការសាកល្បងនៅក្នុងប្រទេសកម្ពុជា ឡាវ ម៉ាឡេស៊ី សិង្ហបុរី ថៃ និងវៀតណាម ប្រព័ន្ធនេះត្រូវបានដាក់ឱ្យប្រើប្រាស់ជាផ្លូវការហើយ។
ដោយមានការគាំទ្រពីសហភាពអឺរ៉ុប ប្រព័ន្ធ ACTS កំពុងធ្វើឱ្យងាយស្រួលដល់ការដឹកជញ្ជូនទំនិញឆ្លងកាត់តំបន់ ដែលកាន់តែមានប្រសិទ្ធភាព និងចំណាយតិច។
ការដឹកជញ្ជួនដោយប្រើប្រាស់ប្រព័ន្ធ ACTS ដំបូងបង្អស់ដោយជោគជ័យ បានធ្វើឡើងកាលចន្លោះថ្ងៃទី២៣ និង២៤ ខែតុលា នៅពេលដែលរថយន្តដឹកទំនិញមួយគ្រឿងធ្វើដំណើរពីប្រទេសសិង្ហបុរី ឆ្លងកាត់ប្រទេសម៉ាឡេស៊ីតាមរយៈប្រទេសថៃ។
ប្រព័ន្ធនេះ នឹងមាននៅក្នុងប្រទេសមីយ៉ាន់ម៉ា ក្នុងពេលឆាប់ៗខាងមុខនេះ ហើយអាស្រ័យលើតំរូវការអាជីវកម្ម ក្រោយមកទៀតអាចត្រូវបានពង្រីក ទៅដល់ប្រទេសប្រ៊ុយណេ ឥណ្ឌូនេស៊ី និងហ្វីលីពីន។
ឥឡូវនេះ អ្នកដឹកជញ្ជូនអាចធ្វើសេចក្តីប្រកាសស្តីពី ការឆ្លងកាត់ទំនិញគយតែមួយ ដែលគ្របដណ្តប់ លើការដឹកជញ្ជូនទំនិញឆ្លងកាត់ប្រទេសជាច្រើន ដោយមិនចាំបាច់ធ្វើការប្រកាសពន្ធគយម្តងហើយម្តងទៀត ឬផ្លាស់ប្តូរយានយន្តនៅតាមព្រំដែននីមួយ៕
