ដោយៈ ចំណាន
ព្រះសីហនុៈ អភិបាលរងខេត្តព្រះសីហនុ លោកឡុង ឌីម៉ង់ អញ្ជើញដឹកនាំកិច្ចប្រជុំពិភាក្សា លើសំណើសុំសម្របសម្រួលលើគោលការណ៍ថ្មីនៃថ្លៃឈ្នួលស្តុកកុងតឺន័រ បស់កំពង់ផែស្វយ័តក្រុងព្រះសីហនុ។
កិច្ចប្រជុំកាលពីសប្តាហ៍មុននេះ មានការអញ្ជើញចូលរួមពីតំណាងរដ្ឋបាលក្រុងព្រះសីហនុ រដ្ឋបាលក្រុងកំពង់សោម មន្ទីរអង្គភាពពាក់ព័ន្ធ កំពង់ផែស្វយ័តក្រុងព្រះសីហនុ និង តំបន់សេដ្ឋកិច្ចពិសេសក្រុងព្រះសីហនុ។
កិច្ចប្រជុំនេះបានរៀបចំឡើង ដើម្បីឆ្លើយតបទៅនឹងសំណើជួយសម្រួល តំបន់សេដ្ឋកិច្ចពិសេសក្រុងព្រះសីហនុ ទៅលើការអនុវត្តគោលការណ៍ថ្មីនៃថ្លៃឈ្នួលស្តុកកុងតឺន័រ នៅលើទីលានស្តុកកុងតឺន័ររបស់កំពង់ផែស្វយ័តក្រុងព្រះសីហនុ ដែលកំពុងមានភាពមមាញឹកខ្លាំង។
ថ្នាក់ដឹកនាំរដ្ឋបាលខេត្ត និងកំពង់ផែស្វយ័តក្រុងព្រះសីហនុ រួមជាមួយនឹងតំបន់សេដ្ឋកិច្ចពិសេស នឹងធ្វើការពិភាក្សាបន្ថែមដើម្បីស្វែងរកដំណោះស្រាយ និងវិធីសាស្ត្រក្នុងការសម្របសម្រួលនីតិវិធី ដល់វិស័យឯកជន និងក្រុមហ៊ុនដឹកជញ្ជូន ព្រមទាំងភាគីពាក់ព័ន្ធដទៃទៀត ធ្វើយ៉ាងណាបង្កើនប្រសិទ្ធភាព និងកាត់បន្ថយពេលវេលា និងឈានទៅសម្រេចបានសុភបរិមានៅគ្រប់ភាគី៕
