ដោយៈម៉ាណេត
ភ្នំពេញៈ ក្រុមហ៊ុន UnionPay បានសហការជាមួយ ក្រុមហ៊ុនបច្ចេកវិទ្យាហិរញ្ញវត្ថុ Mpay ដើម្បីដាក់ចេញកាតទូទាត់ ដោយមិនចាំបាច់មានគណនីធនាគារ និងជំរុញការប្រើប្រាស់ប្រព័ន្ធទូទាត់ ដោយមិនចាំបាច់មានសាច់ប្រាក់ក្នុងដៃ (QR Code) នៅទីផ្សារកម្ពុជា។ នេះបើយោងតាមសេចក្តីប្រកាសព័ត៌មានរបស់ UnionPay នៅថ្នៃទី២៤ ខែធ្នូ ឆ្នាំ២២០២០ ។
កិច្ចសហការនេះត្រូវបានធ្វើឡើង ស្របពេលសមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងសមាគមហិរញ្ញវត្ថុនិងបច្ចេកវិទ្យាកម្ពុជា (CAFT) បានចេញសេចក្តីថ្លែងការណ៍រួមមួយក្នុងខែនេះ ដោយលើកទឹកចិត្តឱ្យមានការទូទាត់ប្រព័ន្ធឌីជីថល ដើម្បីប្រយុទ្ធប្រឆាំងនឹងការផ្ទុះឡើងនៃជំងឺរាតត្បាតនៅកម្ពុជា។
លោកស្រីលាង ចិន្តាប្រធានគ្រប់គ្រងប្រចាំប្រទេសនៃក្រុមហ៊ុន UnionPay មានប្រសាសន៍ថា “យើងមានសេចក្តីរីករាយ ក្នុងការសហការជាមួយដៃគូយុទ្ធសាស្ត្រនិងគំនិតដូចជា Mpay ដើម្បីពង្រីកផលិតផលកាត និងសេវាកម្មទូទាត់ ដែលមានស្រាប់របស់ UnionPay ដើម្បីផ្តល់ជូនអតិថិជនក្នុងស្រុក នូវជម្រើសកាន់តែច្រើនសម្រាប់ វិធីទូទាត់ងាយស្រួល និងមានសុវត្ថិភាព” ។
លោកស្រីបានថ្លែងទៀតថា “យើងសង្ឃឹមថា ភាពជាដៃគូរបស់យើងជាមួយក្រុមហ៊ុន Mpay ក៏នឹងធ្វើឱ្យប្រសើរឡើងនូវការរួមបញ្ចូលផ្នែកហិរញ្ញវត្ថុ តាមរយៈការជួយឱ្យពួកគេទទួលបាននូវសេវាកម្មធនាគារ និងទូទាត់ប្រាក់” ។
ដោយសារតែប្រតិបត្តិការភាគច្រើន នៅក្នុងទីផ្សារកម្ពុជានៅតែមានការប្រើប្រាស់សាច់ប្រាក់ ធនាគារជាតិនៃកម្ពុជា បានដាក់ចេញគំនិតផ្តួចផ្តើមជាច្រើន ដើម្បីលើកកម្ពស់ការទូទាត់តាមប្រព័ន្ធឌីជីថលឱ្យបានកាន់តែច្រើននៅក្នុងប្រទេស។
យោងតាមធនាគារជាតិនៃកម្ពុជាចំនួន កាបូបអេឡិចត្រូនិច (E-Wallets) នៅកម្ពុជាបានកើនឡើង៥,២២ភាគរយនៃគណនី កាលពីឆ្នាំ២០១៩ កើនឡើង៦៤ភាគរយ បើប្រៀបធៀបនឹងឆ្នាំ ២០១៨ ៕
