ដោយៈ គង់ សូរិយា
ភ្នំពេញៈ ស្ថាប័នស្រាវជ្រាវម៉ាក្រូសេដ្ឋកិច្ចអាស៊ាន(AMRO) បានទម្លាក់ការព្យាករណ៍កំណើនសេដ្ឋកិច្ចកម្ពុជា ទាបជាងមុនដោយសារហេតុផលសំខាន់ៗចំនួន។
របាយការណ៍របស់AMRO បានបង្ហាញថា សេដ្ឋកិច្ចកម្ពុជានឹងសម្រេចបានក្នុងអត្រាជាង៥% ដែលជាអត្រាកំណើនខ្ពស់លំដាប់ទី៣ ក្នុងតំបន់អាស៊ាន បន្ទាប់ពីប្រទេសវៀតណាម និងហ្វីលីពីន ហើយនៅឆ្នាំ២០២៦ នឹងសម្រេចបានក្នុងអត្រា៤,៧%។
របាយការណ៍ AMRO ចេញផ្សាយកាលពីថ្ងៃទី២៣ ខែកក្កដា ឱ្យដឹងថា តាមការព្យាករគឺកំណើនសេដ្ឋកិច្ចកម្ពុជា ក្នុងឆ្នាំ២០២៥ នឹងសម្រេចបានក្នុងអត្រា៥,២% ដែលអត្រាទាបជាងការព្យាករកាលពីខែមេសា ដែលរំពឹងនឹងសម្រេចបានក្នុងអត្រា៥,៨%។
សម្រាប់ឆ្នាំ២០២៦ អត្រាកំណើននេះនឹងមានប្រមាណ៤,៧% ខណៈកាលពីខែមេសា បានព្យាករក្នុងអត្រាកំណើន៦%។ ជាមួយគ្នានេះអតិផរណា សន្ទស្សន៍តម្លៃទំនិញប្រើប្រាស់(CPI) ក្នុងឆ្នាំ២០២៥ នេះ នឹងនៅតែមានស្ថិរភាព ក្នុងអត្រា២,៥% និងក្នុងឆ្នាំ២០២៦ ចំនួន ២,៣%។
សម្រាប់តំបន់អាស៊ានទាំងមូលAMRO ព្យាករថា ប្រទេសវៀតណាម នឹងមានកំណើនសេដ្ឋកិច្ចខ្ពស់ជាងគេ គឺក្នុងអត្រា៧% សម្រាប់ឆ្នាំ២០២៥ និង៦,៥%ក្នុង២០២៦ ខណៈប្រទេសហ្វីលីពីននឹងសម្រេចបានក្នុងអត្រា៥,៦% ក្នុងឆ្នាំ២០២៥និង៥,៥% នៅឆ្នាំ២០២៦។
AMRO បានឱ្យដឹងទៀតថា ការពិនិត្យឡើងវិញ(ព្យាករ)នេះបានឆ្លុះបញ្ចាំង ពីភាពមិនប្រាកដប្រជានៃសេដ្ឋកិច្ចសកល ដែលកំពុងជួបប្រទះនឹងបញ្ហាប្រឈមថ្មីៗ ជាពិសេសបណ្តាលមកពីវិធានការពន្ធបដិការរបស់សហរដ្ឋអាមេរិក ដែលប្រកាសដោយប្រធានាធិបតីលោក Donald Trump កាលពីថ្ងៃទី២ ខែមេសា ឆ្នាំ២០២៥។
របាយការណ៍ AMRO បង្ហាញទៀតថា តំបន់អាស៊ាន+3 (អាស៊ាន ចិន ជប៉ុន និងកូរ៉េ) ក្នុងឆ្នាំ២០២៥ នេះនឹងមានកំណើនក្នុងអត្រា៣,៨% និង ៣,៦% នៅឆ្នាំ២០២៦ខាងមុខ។
ការពិនិត្យឡើងវិញនៃការធ្លាក់ចុះ ពីការព្យាករពីមុនសម្រាប់រយៈពេលទាំងពីរឆ្នាំ នេះបានឆ្លុះបញ្ចាំងពីផលប៉ះពាល់ ដែលបណ្តាលមកពីការដំឡើងពន្ធរបស់អាមេរិក ដែលនឹងចូលជាធរមាននៅថ្ងៃទី១ ខែសីហា ឆ្នាំ២០២៥។
ពន្ធគយទាំងនេះ ទំនងជានឹងកាត់បន្ថយតម្រូវការ របស់សហរដ្ឋអាមេរិក បង្កើនភាពមិនច្បាស់លាស់នៃការវិនិយោគ និងធ្វើឱ្យទំនុកចិត្តអ្នកប្រើប្រាស់ធ្លាក់ចុះ។
AMRO បានឲ្យដឹងផងដែរថា ផលប៉ះពាល់នៃពន្ធនេះ ត្រូវបានគេព្យាករថា នឹងមានកាន់តែខ្លាំងនៅឆ្នាំ២០២៦ ជាពិសេសសម្រាប់សេដ្ឋកិច្ចក្នុងតំបន់ដែលប្រឈមមុខ នឹងពន្ធខ្ពស់ពីសហរដ្ឋអាមេរិក និងការពឹងផ្អែកកាន់តែច្រើនលើតម្រូវការខាងក្រៅ។
AMRO ក៏បានព្យាករពីអតិផរណាក្នុងតំបន់ ដែលរំពឹងថានឹងនៅតែមានកម្រិតទាបប្រហែល១% ក្នុងឆ្នាំ២០២៥ និងឆ្នាំ២០២៦ ជាមួយនឹងកម្រិតមធ្យមនៃតម្លៃទំនិញសកល និងសម្ពាធតម្រូវការធ្លាក់ចុះកាន់តែច្រើន។
ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា លោកយិន លាងគង់បានលើកឡើងថា សេដ្ឋកិច្ចកម្ពុជានៅតែមានភាពធន់ ប៉ុន្តែដោយសារបញ្ហាសកល ការកើនឡើងនូវពន្ឋគយរបស់អាមេរិក និងសង្រ្គាមជាមួយប្រទេសថៃ បាននិងកំពុងធ្វើឲ្យសេដ្ឋកិច្ចកម្ពុជារងផលប៉ះពាល់បន្ថែមទៀតនៅចុងឆ្នាំនេះ។
លោកបន្តថា “ទោះជាយ៉ាងណាកំណើននៃការនាំចេញ និងការធ្វើពិពិធកម្មសេដ្ឋកិច្ច និងការនាំចេញរបស់កម្ពុជា នឹងធ្វើឲ្យសុខភាពសេដ្ឋកិច្ចរបស់កម្ពុជាមិនរងផលប៉ះពាល់ធ្ងន់ធ្ងរឡើយ”។ លោកបន្ថែមថា “ការចាប់យកចំណែកទីផ្សារថ្មីៗរបស់កម្ពុជា និងការខិតខំប្រឹងប្រែងរបស់រដ្ឋាភិបាលកន្លងមក ក្នុងការគោះទ្វារអ្នកវិនិយោគ ជាយុទ្ឋសាស្រ្តធ្វើឲ្យប្រាកដថា សេដ្ឋកិច្ចកម្ពុជានឹងមានភាពធន់រយៈពេលវែង”៕
 បានទម្លាក់ការព្យាករណ៍កំណើនសេដ្ឋកិច្ចកម្ពុជា ទាបជាងមុនដោយសារហេតុផលសំខាន់ៗចំនួន។){kind=link}