មូលនិធិខ្នាតយក្សមួយបោះទុនលើគម្រោងសាងសង់អគារការិយាល័យកប់ពពកនៅទីក្រុងញូវយ៉ក

ដោយ: គង់ លាងហួរ
អន្តរជាតិ: មូលនិធិគ្រប់គ្រងការវិនិយោគសាធារណៈរបស់រដ្ឋាភិបាលនៃប្រទេសអារ៉ាប៊ីសាអូឌីត (PIF) គ្រោងបោះទុនដើម្បីកាន់កាប់ភាគហ៊ុនចំនួន២ភាគ៣នៅក្នុងគម្រោងសាងសង់អគារកប់ពពកមួយនៅចំកណ្តាលសង្កាត់ Manhattan ក្នុងទីក្រុងញូវយ៉ករបស់សហរដ្ឋអាមេរិក។

អគារនេះគ្រោងសាងសង់លើដីមួយកន្លែង ដែលជាកម្មសិទ្ធិរបស់ក្រុមហ៊ុនអភិវឌ្ឍន៍អចលនទ្រព្យអាមេរិក Related Companies។ដីនោះមានទីតាំងស្ថិតនៅលើផ្លូវ 625 Madison Avenue នៅក្បែរឧទ្យាន Central Park ដ៏ល្បីល្បាញក្នុងទីក្រុងញូវយ៉ក។

គិតមកទល់ពេលនេះ មូលនិធិ PIF បានបណ្តាក់ទុនវិនិយោគប្រមាណ២០០លានដុល្លាររួចហើយ និងគ្រោងបន្តចាក់បញ្ចូលទុនបន្ថែមទៀត។ គម្រោងអគារកប់ពពកនេះមិនទាន់មានឈ្មោះជាផ្លូវការនៅឡើយ ខណៈតម្រូវការទុនវិនិយោគសរុបត្រូវបានរំពឹងថា នឹងមានទំហំលើសពី១ពាន់លានដុល្លារ។

យោងតាមកាសែត The Business Times បានរាយការណ៍ថា អគារកប់ពពកនេះនឹងមានកំពស់៣៦៦ម៉ែត្រ និងមាន៦៨ជាន់។ដើមឡើយ អ្នកអភិវឌ្ឍន៍គ្រោងរួមបញ្ចូលខុនដូ សណ្ឋាគារ និងហាងលក់រាយទៅក្នុងគម្រោងតែមួយដើម្បីប្រែក្លាយជាអគារប្រើប្រាស់ចម្រុះ(Mixed-use)។

ទោះជាយ៉ាងណា ថ្មីៗនេះ ក្រុមហ៊ុន Related Companies បានអះអាងថា ខ្លួនកំពុងពិចារណាសាងសង់អគារការិយាល័យ១០០ភាគរយ ដើម្បីទាញយកសក្តានុពលពីការកើនឡើងនៃតម្រូវការការិយាល័យលំដាប់ខ្ពស់នៅសង្កាត់ Manhattan។

លំហូរវិនិយោគផ្ទាល់ពីបរទេសចូលទីផ្សារអចលនទ្រព្យពាណិជ្ជកម្មរបស់សង្កាត់ Manhattan បានស្ទុះងើបឡើងវិញយ៉ាងគំហុក ខណៈការបោះទុនវិនិយោគតាមរយៈទម្រង់នៃការទិញយក (Acquisition) មានទំហំទឹកប្រាក់លើសពី២,១ពាន់លានដុល្លារក្នុងអំឡុងចុងឆ្នាំ២០២៤ និងដើមឆ្នាំ២០២៥៕ប្រភព: Business Times៕