ដោយៈសុខុម
ហុងកុង: ក្រុមហ៊ុនចិនតៃវ៉ាន់ Taiwan Semiconductor Manufacturing Co Ltd ហៅកាត់ TSMC ដែលជាក្រុមហ៊ុនផលិតបន្ទះឈីបធំបំផុតក្នុងពិភពលោក ទទួលបានការអនុម័តពីរដ្ឋាភិបាលតៃវ៉ាន់ ដើម្បីដំណើរការដំណាក់កាលទី១ នៃការសាងសង់រោងចក្រថ្មីមួយនៅរដ្ឋអារីហ្សូណា (Arizona) សហរដ្ឋអាមេរិក ជាមួយនឹងទុនវិនិយោគដំបូង៣,៥ ពាន់លានដុល្លារអាមេរិក។ នេះបើយោងតាមសារព័ត៌មាន TheEdgeMarkest ចុះផ្សាយកាលពីថ្ងៃទី២២ ធ្នូ។
ក្រសួងសេដ្ឋកិច្ចកោះតៃវ៉ាន់ ដែលដែលមានសិទ្ឋអនុញ្ញាត ដល់ការវិនិយោគធំៗនៅបរទេសរបស់បណ្ដាក្រុមហ៊ុនតៃវ៉ាន់ បានបញ្ជាក់កាលពីថ្ងៃទី២២ ធ្នូថា ខ្លួនបានអនុម័តការដាក់ពាក្យស្នើសុំវិនិយោគរបស់ក្រុមហ៊ុនTSMC រួចហើយ។
វាជាផ្នែកមួយនៃផែនការ ដែលក្រុមហ៊ុនTSMC បានប្រកាសកាលពីខែឧសភា ថាខ្លួននឹងសាងសង់រោងចក្រមួយ ក្នុងទំហំទុនវិនិយោគ១២ពាន់លានដុល្លារអាមេរិក ហើយនេះសរបង្ហាញពីជ័យជម្នះ របស់រដ្ឋការក្រោមការដឹកនាំ របស់ប្រធានាធិបតីដូណាល់ ត្រាំ នៅក្នុងកិច្ចប្រឹងប្រែង ទាញសង្វាក់ផ្គត់ផ្គង់គ្រឿងបច្ចេកវិទ្យា របស់ពិភពលោកចេញពីប្រទេសចិន។
គណៈកម្មការវិនិយោគ (Investment Commission) នៃក្រសួងសេដ្ឋកិច្ចតៃវ៉ាន់ បានលើកឡើង តាមរយៈសេចក្ដីថ្លែងការណ៍ថា ក្រុមហ៊ុនTSMC មានផែនការសាងសង់រោងចក្រមួយនៅក្រុងហ្វូនិក (Phoenix) រដ្ឋអារីហ្សូណា ហើយតាមការរំពឹងទុក រោងចក្រនេះនឹងចាប់ផ្ដើមដំណើរការផលិតក្នុងឆ្នាំ២០២៤។
ក្រុមហ៊ុន TSMC ផលិតបន្ទះឈីបនៅតៃវ៉ាន់ ហើយក៏មានរោងចក្រផលិតបន្ទះឈីបនៅប្រទេសចិន និងរដ្ឋវ៉ាស៊ីនតោន សហរដ្ឋអាមេរិកផងដែរ។
ក្រុមហ៊ុននេះបានគូសបញ្ជាក់ថា ការសាងសង់រោងចក្រនៅរដ្ឋអារីហ្សូណា នឹងចាប់ផ្ដើមក្នុងឆ្នាំ២០២១ ហើយដំណើរការផលិត គ្រោងនឹងចាប់ផ្ដើមក្នុងឆ្នាំ២០២៤ ដែលមានសមត្ថភាពផលិតបន្ទះឈីបបាន២០.០០០ បន្ទះក្នុងមួយខែ៕