ដោយ: គង់ លាងហួរ
អន្តរជាតិ: បណ្តាអគារការិយាល័យនៅសង្កាត់ Causeway Bay ក្នុងទីក្រុងហុងកុងរបស់ប្រទេសចិន ត្រូវបានគេរំពឹងថា នឹងទាក់ទាញបានចំណាប់អារម្មណ៍កាន់តែខ្លាំងឡើងពីបណ្តាក្រុមហ៊ុនបរទេសធំៗ ដែលកំពុងស្វែងរកឱកាសពង្រីកខ្លួននៅក្នុងទីក្រុងហុងកុង។
ថ្មីៗនេះ ក្រុមហ៊ុនយក្សអាមេរិក Jane Street បានបំបែកកំណត់ត្រា ដោយបានជួលការិយាល័យទំហំ២២៣.៤៣៧ហ្វីតការ៉េក្នុងគម្រោង New Central Harbourfront របស់ក្រុមហ៊ុន Henderson Land ក្នុងទំហំទឹកប្រាក់ចំនួន៣០,៦លានដុល្លារហុងកុង (ប្រហែល៣,៩លានដុល្លារអាមេរិក) ក្នុងមួយខែ។
លោក Paul Yien អ្នកជំនាញជាន់ខ្ពស់ផ្នែកប្រឹក្សាយោបល់លើការជួលការិយាល័យនៅក្រុមហ៊ុន JLL បានលើកឡើងថា “អគារការិយាល័យនៅក្នុងសង្កាត់ Causeway Bay នឹងក្លាយជាចំណុចរបត់សំខាន់ថ្មីនៃទីផ្សារ ដែលនឹងអាចទាក់ទាញចំនួនអ្នកជួលកាន់តែច្រើន”។
ជាមួយគ្នានេះ គម្រោងបណ្តាក់ទុនវិនិយោគរួមគ្នា“Lee Garden Eight” នៅសង្កាត់ Causeway Bay រវាងក្រុមហ៊ុន Hysan Development និងក្រុមហ៊ុន Chinachem Group ត្រូវបានគេរំពឹងថា នឹងអាចបញ្ចប់ការសាងសង់នៅឆ្នាំ២០២៦។ គម្រោងដ៏ធំនេះនឹងអាចផ្គត់ផ្គង់ការិយាល័យថ្មីចំនួនជាង១លានហ្វីតការ៉េ។
លោក Paul Yien បានបង្ហាញទំនុកចិត្តលើទីផ្សារការិយាល័យក្នុងសង្កាត់ Causeway Bay ព្រោះសង្កាត់មួយនេះមានសកម្មភាពអាជីវកម្មយ៉ាងរស់រវើក និងមានភាពអ៊ូអរ ព្រមទាំងមានបណ្តាក្រុមហ៊ុនបរទេសជាច្រើនជាតិសាសន៍ចូលមកជួលការិយាល័យ។
គិតត្រឹមខែឧសភា អត្រាការិយាល័យទំនេរនៅសង្កាត់ Causeway Bay មានចំនួន៩ភាគរយ បើធៀបនឹងចំនួន២,១ភាគរយក្នុងខែមករា ឆ្នាំ២០១៩។ ការជួលការិយាល័យនៅសង្កាត់នេះមានតម្លៃជាមធ្យមចន្លោះពី៤០ដុល្លារហុងកុង ទៅ៤៥ដុល្លារហុងកុងក្នុងមួយហ្វីតការ៉េ៕ប្រភព: SCMP៕
