ដោយៈ ម៉ាណា
ភ្នំពេញៈ កម្ពុជារកប្រាក់បានជិត១៥០លានដុល្លារ ពីការនាំចេញជ័រកៅស៊ូ និងឈើកៅស៊ូក្នុងរយៈពេល៤ខែដើមឆ្នាំ២០២៥ កើនឡើងជាង១៨ភាគរយ បើធៀបនឹងរយៈពេលដូចគ្នាកាលពីឆ្នាំមុន។
យោងតាមទិន្នន័យរបស់អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ ដែលទើបផ្សព្វផ្សាយបង្ហាញថា ចាប់ពីខែមករា ដល់ខែមេសា ឆ្នាំ២០២៥ កម្ពុជាផលិតជ័រកៅស៊ូបាន ៨១ ៩៦២តោន ថយចុះ៥,១៧១តោន ឬស្មើនឹង៥,៩ភាគរយបើធៀបនឹងរយៈពេលដូចគ្នាក្នុងឆ្នាំ២០២៤។
ជាមួយគ្នានេះកម្ពុជា ក៏បាននាំចេញជ័រកៅស៊ូចំនួន៧៦,៤៦៧តោន ថយចុះ៨,៩៦១តោន ឬស្មើ១០,៥ភាគរយ បើធៀបនឹងរយៈពេលដូចគ្នាក្នុងឆ្នាំ២០២៤ ដោយរកថវិកាបាន១៤៨,១៨លានដុល្លារ និងចំណូលពីការលក់ឈើកៅស៊ូ១,៧៩លានដុល្លារ ស្មើនឹង៦ ៩២៩ ម៉ែត្រគូប។
ទិន្នន័យដដែលបានឱ្យដឹងទៀតថា តម្លៃជាមធ្យមរបស់ជ័រកៅស៊ូក្នុងខែមេសា ឆ្នាំ២០២៥ គឺ១៩៨៩ដុល្លារក្នុង១តោន ដោយថយចុះ ៨៩ ដុល្លារ ឬស្មើ៤,៧១ភាគរយ បើធៀបនឹងមីនា(ឆ្នាំ២០២៥) ប៉ុន្តែបានកើនឡើង៤៥៧ដុល្លារ ឬស្មើ២៩,៨៤ភាគរយ បើធៀបនឹងខែមេសា ឆ្នាំ២០២៤ ដែលមាន១៥៣២ដុល្លារ។ ចំណែកឈើកៅស៊ូគិតជាមធ្យមមានតម្លៃ ២៣៣ដុល្លារក្នុងមួយម៉ែត្រគូប។
លោកគឹន ឧត្តមមុនីស៊ីណាត នាយកប្រតិបត្តិក្រុមហ៊ុន Sailun Tire Cambodia ដែលជាក្រុមហ៊ុនផលិត សម្បកកង់រថយន្តនៅក្នុងតំបន់សេដ្ឋកិច្ចពិសេសក្រុងព្រះសីហនុ បានមានប្រសាសន៍ឲ្យដឹងថា តម្លៃជ័រកៅស៊ូនៅទីផ្សារក្នុងស្រុក និងអន្តរជាតិបានកើនឡើងក្នុងរយៈពេលជាង១ឆ្នាំមកហើយ។
លោកបន្តថា “ការបើកដំណើររោងចក្រផលិត សំបកកង់រថយន្តនៅក្នុងប្រទេសកម្ពុជាជាបន្តបន្ទាប់ ក៏ជាចំណែកជួយឱ្យទីផ្សារជ័រកៅស៊ូនៅកម្ពុជាល្អប្រសើរផងដែរ”។
លោកបន្តទៀតថា សម្រាប់ជ័រកៅស៊ូនៅកម្ពុជាបច្ចុប្បន្ន គឺមានតម្លៃជាមធ្យមជាង១៩០០ដុល្លារក្នុង១តោន ដែលកើនឡើងតិចតួច បើធៀបនឹងរយៈពេលដូចគ្នាកាលពីឆ្នាំ២០២៤។ តម្លៃកៅស៊ូអាចនឹងកើនឡើងបន្ថែមទៀតនាពេលអនាគត។
លោកបានបន្តទៀតថា តម្រូវការជ័រកៅស៊ូពីសំណាក់ក្រុមហ៊ុនផលិតសំបកកង់រថយន្តក្នុងស្រុក បានឡើងជាបន្តបន្ទាប់ ហើយវានឹងមានកាន់តែច្រើននាពេលខាងមុខ ខណៈបច្ចុប្បន្នទាំងរោងចក្រផលិតសំបកកង់រថយន្តកំពុងដំណើរការ និងកំពុងសាងសង់នៅកម្ពុជា គឺកើនដល់៧។
យោងតាមក្រសួងកសិកម្ម រុក្ខាប្រមាញ់ និងនេសាទ កាលពីឆ្នាំ២០២៤ កម្ពុជាបានននាំចេញផលិតផលជ័រកៅស៊ូ និងឈើកៅស៊ូ មានទឹកប្រាក់សរុប៦៧១,៦៨ លានដុល្លារ កើនឡើង៣៦,៤៨ ភាគរយបើធៀបនឹងឆ្នាំ២០២៣។
ប្រាក់ចំណូលដែលទទួលបានខាងលើ គឺពីការនាំចេញជ័រកៅស៊ូចំនួន៦៦៦,២៥លានដុល្លារ និងចំណូលពីការនាំចេញ ឈើកៅស៊ូ ៥,៤លានដុល្លារ៕
