ដោយ៖ ម៉ាណេត
អន្តរជាតិ៖ អ្នកឃ្លាំមើលសេដ្ឋកិច្ចទីផ្សារជាច្រើន បានលើកឡើងថា ការស្ទុះងើបឡើងវិញនៃសេដ្ឋកិច្ចចិនជាកត្តាជំរុញដល់សេដ្ឋកិច្ចពិភពលោក ដែលកំពុងរងគ្រោះដោយវិបត្តិសេដ្ឋកិច្ចដ៏ធ្ងន់ធ្ងរ ខណៈឆ្នាំ២០២០ជិតបញ្ចប់។
នៅក្នុងទស្សនវិស័យសេដ្ឋកិច្ចពិភពលោកចុងក្រោយរបស់មូលនិធិរូបិយវត្ថុអន្ដរជាតិ (IMF) បានព្យាករថា សេដ្ឋកិច្ចចិននឹងកើនឡើង ១,៩ ភាគរយនៅឆ្នាំ ២០២០ ខ្ពស់ជាង ០,៩ ភាគរយលើសពីការព្យាករណ៍កាលពីខែមិថុនា ដែលធ្វើឱ្យប្រទេសចិនក្លាយជាប្រទេសសេដ្ឋកិច្ចតែមួយគត់ ដែលអាចមើលឃើញកំណើនវិជ្ជមាននៅឆ្នាំនេះ។ នេះយើងតាមការសារព៌ត៌មានចិន Xinhua ចេញផ្សាយនៅថ្ងៃទី១៨ ខែធ្នូ ឆ្នាំ២០២០។
លោក Kristalina Georgieva នាយកគ្រប់គ្រងមូលនិធិរូបិយវត្ថុអន្តរជាតិ បានមានប្រសាសន៍ថា “ជាមួយនឹងការរួមបញ្ចូលគ្នានៃគោលនយោបាយម៉ាក្រូសេដ្ឋកិច្ច ដែលគាំទ្រដោយផ្តោតលើការពង្រឹងសុវត្ថិភាពសង្គម និងកំណែទម្រង់សំខាន់ៗបន្ថែមទៀត ប្រទេសចិននឹងធានានូវការងើបឡើងវិញ និងធានានូវកំណើនប្រកបដោយតុល្យភាព និងគុណភាពខ្ពស់ ដែលនឹងផ្តល់ផលប្រយោជន៍ដល់ប្រទេសខ្លួន និងពិភពលោក”។
សូចនាករជាច្រើន បានបង្ហាញថា ការស្ទុះងើបឡើងវិញនៃសេដ្ឋកិច្ចរបស់ប្រទេសដែលមានសេដ្ឋកិច្ចធំលំដាប់ទី ២ នៅលើពិភពលោកមួយនេះ កំពុងស្ថិតនៅលើផ្លូវត្រឹមត្រូវ។
នៅក្នុងខែវិច្ឆិកា សន្ទស្សន៍អ្នកគ្រប់គ្រងការទិញសម្រាប់វិស័យផលិតកម្ម ដែលជារង្វាស់ដ៏សំខាន់នៃសកម្មភាពរោងចក្រ បានឈានដល់ ៥២.១ ពិន្ទុ។
គិតជាកំណើនជាងពាក់កណ្តាលនៃកំណើនផលិតផលក្នុងស្រុកសរុបរបស់ប្រទេសចិន វិស័យសេវាកម្មគឺជាផ្នែកមួយនៃឧបករណ៍វាស់សេដ្ឋកិច្ចដ៏សំខាន់របស់ខ្លួន។ កាលពីខែមុន សន្ទស្សន៍សម្រាប់សកម្មភាពអាជីវកម្មនៅក្នុងវិស័យសេវាកម្ម បានកើនឡើងដល់ ៥៥,៧ ពិន្ទុ ដែលជាកម្រិតខ្ពស់បំផុតប្រចាំឆ្នាំ។
បើនិយាយពីពាណិជ្ជកម្មបរទេស នៅតែបន្តមានការកើនឡើងផងដែរ ដោយសារទាំងការបញ្ជាទិញនាំចេញថ្មី និងសន្ទស្សន៍នាំចូលបានកើនឡើងក្នុងរយៈពេលបីខែជាប់ៗគ្នា។
អ្នកឃ្លាំមើលប្រទេសចិនមួយចំនួន មានការព្រួយបារម្ភថា ការងើបឡើងវិញរបស់ប្រទេសនេះគឺមិនមានតុល្យភាពជាមួយនឹងការស្ទុះងើបឡើងវិញលឿនជាងមុននៅក្នុងវិស័យឧស្សាហកម្ម និងការធ្លាក់ចុះនៃការចំណាយរបស់អ្នកប្រើប្រាស់ ទោះបីមានការជំរុញឱ្យមានកំណើននៃការប្រើប្រាស់ក៏ដោយ៕
