ដោយៈសុខុម
ភ្នំពេញៈ សេដ្ឋកិច្ចរបស់ប្រទេសមីយ៉ាន់ម៉ា នៅតែបន្តទទួលរងផលប៉ះពាល់ខ្លាំងដោយសារការឆ្លងរាតត្បាតវីរុសកូវីដ-១៩ ហើយកំនើនសេដ្ឋកិច្ចរបស់ប្រទេសនេះ ត្រូវបានប៉ាន់ប្រមាណថា នឹងដាំក្បាលចុះដល់១,៧% ក្នុងឆ្នាំសារពើពន្ធ២០១៩-២០២០ ពីកំណើន៦,៨%ក្នុងឆ្នាំសារពើពន្ធ២០១៨/ ២០១៩ ។ នេះបើយោងតាមសារព័រមាន moderndiplomacy ចុះផ្សាយក្នុងថ្ងៃដដែល។
យោងតាមរបាយការណ៍ Myanmar Economic Monitor (តាមដានសេដ្ឋកិច្ចមីយ៉ាន់ម៉ា) របស់ធនាគារពិភពលោក (World Bank) ដែលបានចេញផ្សាយកាលពីថ្ងៃទី១៧ ធ្នូឱ្យដឹងថា ការឆ្លងរាតត្បាត បូករួមនឹងវិធានការទប់ការឆ្លងរាលដាល បានធ្វើឱ្យការទិញដូរ និងការវិនិយោគធ្លាក់ចុះខ្សោយខ្លាំង ហើយធ្វើឱ្យរាំងស្ទះដំណើរការអាជីវកម្ម និងការផ្គត់ផ្គងកម្លាំងការងារ។
ជាលទ្ធផលនៃវីរុសកូវីដ-១៩ អត្រានៃភាពក្រីក្រអាចកើនឡើងពី២២,៤% ក្នុងឆ្នាំសារពើពន្ធ ២០១៨/២០១៩ ទៅរហូតដល់២៧% ក្នុងឆ្នាំសារពើពន្ធ២០២០/២០២១ ហើយទម្រាំតែអាចវិល ទៅរកកម្រិតមុនពេលមានវិបត្តិវិញយ៉ាងឆាប់បំផុត ក៏ត្រូវឈានដល់ឆ្នាំសារពើពន្ធ២០២១/២០២២ដែរ។
ការផ្ទុះរលកទី១ បានបង្ខំឱ្យគ្រួសារក្រីក្រជាច្រើន ព្យាយាមប្រើវិធីដ៏មានហានិភ័យ និងគ្មាននិរន្តរភា ពដើម្បីទប់វិបត្តិសកលដ៏គួរឱ្យតក់ស្លុតនេះ រួមមាន ទាំងការកាត់បន្ថយការបរិភោគប្រចាំថ្ងៃរបស់ពួកគេផងដេរ។ តាំងពីមុនពេលផ្ទុះរលកទី២ម្ល៉េះ គ្រួសារជាច្រើនបានជួបការលំបាកខ្លាំងរួចទៅហើយ នៅក្នុងការដោះសងបំណុល។ ការបន្តរឹតបន្តឹងក្រោមរលកទី២ នេះកំពុងធ្វើឱ្យគ្រួសារកាន់តែច្រើន ប្រឈមហានិភ័យធ្លាក់ចូលក្នុងភាពក្រីក្រ។
វិធានការឱ្យពលរដ្ឋនៅតែផ្ទះអំឡុងពេលផ្ទុះរលកទី២ បានបង្កផលប៉ះពាល់លើអាជីវកម្មនានាធ្ងន់ជាងកាលពីរលកទី១ទៅទៀត។ ជិតពាក់កណ្តាលនៃក្រុមហ៊ុន ដែលត្រូវបានស្ទង់មតិក្នុងទីក្រុងយ៉ង់ហ្គូន បានបិទផ្អាកដំណើរការជាបណ្តោះក្នុងខែតុលា ហើយ ៣៥% ក្នុងចំណោមនេះ បានសម្ដែងការព្រួយបារម្ភខ្លាចខ្លួន មិនអាចបើកដំណើរការឡើងវិញបាន ក្រោយផ្អាករយៈពេល៣ ។ វិស័យផលិតកម្ម និងសេវាកម្មទទួលរងផលប៉ះពាល់ធ្ងន់ធ្ងរជាងគេ បើទោះបីជាអាជីវកម្មមួយចំនួន នៅតែអាចរស់រានបាន ដោយសារងាកទៅចាប់ឱកាសធ្វើអាជីវកម្មតាមអនឡាញ អំឡុងពេលរឹតបន្តឹងនេះក្ដី។
ដោយសារផលប៉ះពាល់ នៃការរាតត្បាតនៅតែមាននៅឡើយ សេដ្ឋកិច្ចត្រូវបានព្យាករថា នឹងទទួលបានកំណើនតែ២%ប៉ុណ្ណោះ ក្នុងឆ្នាំសារពើពន្ធ២០២០/២០២១ ។ ប៉ុន្តែដោយសារការរឹតបន្តឹង លើការដើរហើររបស់ប្រជាជន ត្រូវបានបន្ធូរបន្ថយជាលំដាប់ ហើយករណីឆ្លងក្នុងស្រុកមានអត្រាទាប កំនើនសេដ្ឋកិច្ចត្រូវបានព្យាករថា នឹងងើបឡើងសន្សឹមៗចាប់ពីខែមីនា ឆ្នាំ២០២១តទៅ៕