ដោយៈសាវុធ
ភ្នំពេញៈ ការនាំចេញផលិតសំលៀកបំពាក់ ស្បែកជើង និងផលិតធ្វើដំណើរពីកម្ពុជាទៅទីផ្សារអន្តរជាតិ សម្រេចបានទំហំទឹកប្រាក់សរុប៨,២ពាន់លានដុល្លារ ក្នុងរយៈពេល១០ខែឆ្នាំ២០២០នេះ។ នេះបើយោងតាមរបាយការណ៍របស់អគ្គនាយកដ្ឋានពន្ធគយ និងរដ្ឋាករ នៃក្រសួងសេដ្ឋកិច្ច និងហិរញ្ញវត្ថុ ចេញផ្សាយកាលពីថ្មីៗនេះ។
របាយការណ៍បានឱ្យដឹងថា ការនាំចេញផលិតផលពីវិស័យកាត់ដេរនេះ បានធ្លាក់ចុះ៩ភាគរយ ធៀបនឹងរយៈពេលដូចគ្នាក្នុងឆ្នាំ២០១៩ ។ ការថយចុះនេះ គឺដោយសារវិបត្តិជំងឺកូវីដ១៩ ដែលធ្វើឱ្យមានផលប៉ះពាល់ដល់ការបញ្ជាទិញ ការដឹកជញ្ជូន និងផ្គត់ផ្គង់វត្ថុធាតុដើម។
របាយការណ៍ដដែលបានឱ្យដឹងទៀតថា កម្ពុជាបាននាំចេញសំលៀកបំពាក់គិតជាទឹកប្រាក់សរុប ៦,១ពាន់លានដុល្លារ ធ្លាក់ចុះ ១០ភាគរយ ការនាំចេញផលិតស្បែកជើង មានទឹកប្រាក់សរុប ៩២៩លានដុល្លារ ធ្លាក់ចុះ ៦ភាគរយ និងផលិតផលដំណើរមានទឹកប្រាក់សរុប ៧៨៨លានដុល្លារ ធ្លាក់ចុះ ១១ភាគរយ គិតចាប់ពីខែមករា ដល់ខែតុលា ខណៈការនាំចេញផលិតវាយនភណ្ឌផ្សេងៗ មានទំហំទឹកប្រាក់សរុប ៣៣២លានដុល្លារ ថយចុះ ៣៧ភាគរយ។
នៅក្នុងរយៈពេល១០ខែនេះ គិតជាភាគរយនៃការចេញទៅទីផ្សារអន្តរជាតិ ការនាំចេញផលិតផលកាត់ដេរទៅកាន់ទីផ្សារអឺរ៉ុបម មាន ២២ភាគរយឬស្មើនឹងទឹកប្រាក់ ២,១ពាន់លានដុល្លារ ទៅកាន់ប្រទេសជប៉ុន តំណាងឲ្យ ១០ភាគរយ ស្មើនឹង ៧៣១លានដុល្លារ និងទៅកាន់ប្រទេសអង់គ្លេស រួមចំណែក ៧ភាគរយ ឬស្មើនឹង ៦១៥លានដុល្លារ។
ការនាំចេញទៅកាន់ទីផ្សារប្រទេសអាស៊ាន មានតម្លៃសរុប ១៩០លានដុល្លារ និងទីផ្សារដទៃផ្សេងទៀត មានទឹកប្រាក់សរុប ១,៤ពាន់លានដុល្លារ។
ទីផ្សារធំបំផុត សម្រាប់ផលិតផលកាត់ដេររបស់កម្ពុជា គឺទីផ្សារសហរដ្ឋអាមេរិក ដែលបាននាំចូល គិតជាភាគរយប្រមាណ៣៧ភាគរយ នៃការនាំចេញសរុបឬមានទឹកទំហំទឹកប្រាក់សរុបជាង៣ពាន់លានដុល្លារ៕
