ដោយៈ ម៉ាណា
ភ្នំពេញៈ លោកជំទាវ ចម និម្មល រដ្ឋមន្ដ្រីក្រសួងពាណិជ្ជកម្ម និងជាប្រធានគណៈកម្មាធិការ ត្រួតពិនិត្យផលិតផលហាឡាលកម្ពុជា “គ.ត.ផ.ហ.ក” អញ្ជើញដឹកនាំកិច្ចប្រជុំវិសាមញ្ញ គណៈកម្មាធិការត្រួតពិនិត្យផលិតផលហាឡាលកម្ពុជា “គ.ត.ផ.ហ.ក”។
លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម និងជាប្រធានគណៈកម្មាធិការ ត្រួតពិនិត្យផលិតផលហាឡាលកម្ពុជា បានអញ្ជើញដឹកនាំកិច្ចប្រជុំវិសាមញ្ញ គណៈកម្មាធិការត្រួតពិនិត្យផលិតផលហាឡាលកម្ពុជា ដោយមានការអញ្ជើញចូលរួមពីលោក អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស ឯកឧត្តម លោកជំទាវ ជាអនុប្រធាន និងជាសមាជិក សមាជិកា នៃ គ.ត.ផ.ហ.ក. ដែលអញ្ជើញមកពីក្រសួង-ស្ថាប័នពាក់ព័ន្ធជាច្រើនរូប។
កិច្ចប្រជុំនេះ រៀបចំឡើងក្នុងគោលបំណងដើម្បីពិនិត្យ ពិភាក្សា និងប្រមូលធាតុ ចូលលើសេចក្តីព្រាងគ្រោងឆ្អឹង ផែនការយុទ្ធសាស្រ្តស្តីពីការអភិវឌ្ឍកិច្ចការហាឡាល ឆ្នាំ២០២៥-២០២៩ និងពិនិត្យលើដំណើរការកិច្ចការវិញ្ញាបនបត្រកម្ម (Process Mapping)។
ក្នុងឱកាសនោះ លោកជំទាវរដ្ឋមន្ត្រី បានណែនាំឱ្យលេខាធិការដ្ឋាននៃ គ.ត.ផ.ហ.ក. រៀបចំសេចក្តីព្រាងបឋមផែនការយុទ្ធសាស្រ្តស្តីពីការអភិវឌ្ឍកិច្ចការហាឡាល ឆ្នាំ២០២៥-២០២៩ តាមស្មារតីនៃអង្គប្រជុំ ព្រមទាំងសហការ ជាមួយក្រុមការងារបច្ចេកទេសផលិតផលហាឡាលនៃ គ.ត.ផ.ហ.ក. រៀបចំសិក្សា និងកែសម្រួលប្រកាសស្តីការដាក់ពាក្យស្នើសុំវិញាបនបត្រ បញ្ជាក់បច្ចេកទេសស្តង់ដារផលិតផលហាឡាល និងសេចក្តីព្រាងនីតិវិធីប្រតិបត្តិស្តង់ដារការងារ (Standard Operating Procedure) សម្រាប់ដំណើរនៃការកិច្ចការវិញាបនបត្រកម្ម ស្របតាមឧត្តមានុវត្តន៍អន្តរជាតិ៕
