ដោយៈ ម៉ាណេត
ភ្នំពេញៈ ក្រុមហ៊ុនហិរញ្ញវត្ថុអន្តរជាតិ (ធនាគារ) ជាច្រើនបាននិងកំពុងពង្រីកវត្តមានរបស់ខ្លួននៅកម្ពុជា ដោយផ្តល់សេវាហិរញ្ញវត្ថុខុសៗគ្នាដល់អតិថិជន ដើម្បីដណ្តើមយកទីផ្សារក្នុងស្រុករបស់ប្រទេសកម្ពុជា ដែលមានកំណើនសេដ្ឋកិច្ចខ្ពស់ ក្នុងរយៈជាង២០ឆ្នាំ។
ធនាគារ និងស្ថាប័នមីក្រូហិរញ្ញវត្ថុ នៅតែមានឱកាសជាច្រើន ក្នុងនាមជាអ្នកផ្តល់សេវាហិរញ្ញវត្ថុនៅកម្ពុជា ព្រោះកម្ពុជាមិនទាន់មានការអភិវឌ្ឍ វិស័យហិរញ្ញវត្ថុគ្រប់គ្រាន់នៅឡើយ។
កាលពីដើមខែធ្នូកន្លងមកនេះ ក្រុមហ៊ុន G Capital Bhd ដែលមានមូលដ្ឋាននៅប្រទេសម៉ាឡេស៊ីបានឱ្យដឹងថា ខ្លួនបានទទួលការយល់ព្រមជាគោលការណ៍ ពីធនាគារជាតិនៃម្ពុជា ដើម្បីបង្កើតធនាគារពាណិជ្ជកម្មពេញលេញមួយ នៅក្នុងប្រទេសកម្ពុជាជាមួយដៃគូរបស់ខ្លួន ហើយធនាគារដ៏ធំប្រចាំសាធារណរដ្ឋកូរ៉េ DGB Bank ដែលស្ថិតនៅក្នុងសម្ព័ន្ធ DGB Financial Group របស់កូរ៉េ ក៏បានបង្ហាញមហិច្ឆតារបស់ខ្លួន ក្នុងការរៀបចំទីស្នាក់កណ្តាលរបស់ខ្លួននៅក្នុងប្រទេសកម្ពុជា។
លោកបណ្ឌិតអ៊ិន ចាន់នី ប្រធានសមាគមធនាគារ នោកម្ពុជាបានថ្លែងប្រាប់កាលពីថ្មីៗនេះថា ការពង្រីកធនាគាររបស់ប្រទេស ដែលមានវិស័យហិរញ្ញវត្ថុវ័យចំណាស់ មានបទពិសោធន៍ និងមានវិសាលភាពសេដ្ឋកិច្ចធំ ជាការផ្តល់ឱកាសទៅវិញទេ ប៉ុន្តែមិនមែនជាការប្រកួតប្រជែងអ្វី ដែលនាំឱ្យការលំបាកនោះទេ។
លោកបណ្ឌិតបានថ្លែងថា “វាជាឱកាសសម្រាប់ទាំងអស់គ្នា ព្រោះវិស័យហិរញ្ញវត្ថុត្រូវការពឹងពាក់ទៅវិញទៅមក ដូច្នេះបានជានៅក្នុងវិស័យធនាគារ គេប្រើពាក្យថាLiquidity (សាច់ប្រាក់) ដូចជាទឹក ដែលហូរទៅហូរមក” ។ លោកបន្តថា “វាន័យថា មានសាច់ប្រាក់ទំនេរពីប្រទេស ដែលសម្បូរធនធានយកមកប្រើប្រាស់នៅក្នុងប្រទេស ដែលត្រូវការធនធានក្នុងន័យវិនិយោគ” ។
លោកបណ្ឌិតបានឱ្យដឹងទៀតថា យើងសាគមន៍ក្នុងការពង្រីកប្រតិបត្តិការរបស់ធនាគារផ្សេង។ កត្តាសំខាន់ធ្វើឱ្យធនាគារដទៃ មកចាប់ការវិនិយោគនៅប្រទេសកម្ពុជាមានកត្តាធំៗចំនួន៣ ដូចជា កត្តាសេដ្ឋកិច្ចលូតលាស់ប្រកបចេរភាព ស្ថេរភាពសង្គមនិងស្ថិរភាពនយោបាយ។
ជាមួយគ្នានេះដែរ វិស័យធនាគារនៅកម្ពុជានៅតែបន្តមានវឌ្ឍនភាព ប្រកបដោយទំនុកចិត្ត និងបានរួមចំណែកយ៉ាងសកម្ម គាំទ្រសកម្មភាពសេដ្ឋកិច្ច ដែលធ្វើឱ្យមានកំនើនវិនិយោគក្នុងងការបង្កើតធនាគារ និងគ្រឹះស្ថានហិរញ្ញវត្ថុជាច្រើននៅក្នុងប្រទេស។
កម្ពុជាមានគ្រឹះស្ថានធនាគារនិងហិរញ្ញវត្ថុ រួមមាន ធនាគារពាណិជ្ជចំនួន៥១ ធនាគារឯកទេសចំនួន១៤ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ពីសាធារណជនចំនួន៦ គ្រឹះស្ថានមីក្រូហិរញ្ញវត្ថុ មិនទទួលប្រាក់បញ្ញើចំនួន៧៦ និងគ្រឹះស្ថានឥណទានជនបទចំនួន២៤៦រហូតមកដល់បច្ចុប្បន្ននេះ។ នេះបើយោងតាមរបាយការណ៍របស់ធនាគារជាតិនៃកម្ពុជា។
បណ្តាញប្រតិបត្តិការ និងសេវាហិរញ្ញវត្ថុបានអភិវឌ្ឍជាបន្តបន្ទាប់ ដោយចំនួនទីស្នាក់ការ និងសាខាគ្រឹះស្ថានធនាគារ និងហិរញ្ញវត្ថុនៅទូទាំងប្រទេសបានកើនដល់២.៤៦៥ ហើយម៉ាស៊ីនដក និងដាក់ប្រាក់ស្វ័យប្រវត្តិ (ATM) មានចំនួន៣,០៨១ គណនីប្រាក់បញ្ញើអតិថិជន កើនដល់ ៨.២លានគណនី និងគណនីឥណទានកើនដល់៣.២លានគណនី។
ធនាគារជាតិនៃកម្ពុជាបានឱ្យដឹងថា បានប្រឹងប្រែងយ៉ាងខ្លាំង ក្នុងការត្រួតពិនិត្យសុខមាលភាពរបស់គ្រឹះស្ថានធនាគារ និងហិរញ្ញវត្ថុ និងការអនុវត្តច្បាប់ និងបទប្បញ្ញត្តិ។ ជាលទ្ធផលវិស័យធនាគារ និងហិរញ្ញវត្ថុស្ថិតក្នុងស្ថានភាពល្អ៕
