សម្តេចធិបតីលើកទឹកចិត្តយុវជនផលិតមាតិកាផ្សព្វផ្សាយពីទេសចរណ៍ និងមគ្គុទេសក៏ទេសចរណ៍ត្រូវស្គាល់ពីប្រវត្តិសាស្រ្តឲ្យច្បាស់

ដោយៈ ម៉ាណា

    ភ្នំពេញៈ សម្តេចមហាបវរធិបតី ហ៊ុន ម៉ាណែតនាយករដ្ឋមន្រ្តីនៃកម្ពុជាបានលើកទឹកចិត្តដល់យុវជន អ្នកផលិតមាតិកាលើ បណ្តាញស​ង្គម(Content Creators) បណ្តាញសារព័ត៌មាន ក៏ដូចជាប្រជាពលរដ្ឋ​ទូទៅ ដែលបានខិតខំក្នុងការជួយផ្សព្វផ្សាយ ពីសមិទ្ធផលរបស់រាជរដ្ឋាភិបាល និង​គោល​ដៅទេសចរណ៍។

សម្តេចបានថ្លែងបែបនេះ ក្នុងពេលអញ្ជើញចូលរួមជាអធិបតីដ៏ខ្ពង់ខ្ពស់ក្នុងពិធីបិទសន្និបាត ការងារក្រសួងទេសចរណ៍កាលពីរសៀលថ្ងៃទី២៧ កុម្ភៈកន្លង​មកនេះ។

សម្តេចមហាបវរធិបតី ហ៊ុន ម៉ាណែត ប្រាង្គប្រាសាទរបស់ខ្មែរជាសម្បត្តិវប្បធម៌ មនុស្សជាតិលើពិភពលោក ត្រូវបើកចិត្តឱ្យគេស្រឡាញ់ឱ្យបានច្រើន ដើម្បីគេមកលេងកម្សាន្តបានកាន់តែច្រើន។

លើសពីនេះ សម្តេចមហាបវរធិបតី ក៏បានណែនាំដល់មគ្គទេសក៍ទេសចរណ៍ ត្រូវច្បាស់លាស់ពីប្រវត្តិសាស្ត្រ កុំបកស្រាយខុសទៅកាន់ភ្ញៀវទេសចរ។

សម្តេចមហាបវរធិបតី បានណែនាំផងដែរ ទៅក្រសួងស្ថាប័នពាក់ព័ន្ធ តាមដានរាល់ការបកស្រាយអត្ថាធិប្បាយនានា តាមបណ្តាញសង្គមពាក់ព័ន្ធប្រវត្តិកសាង និងរឿងរ៉ាវនានានៅតាមប្រាង្គប្រាសាទ ចៀសវាងការបកស្រាយខុសបង្កើតការភ័ន្តច្រឡំ។

សម្តេចមហាបវរធិបតី ហ៊ុន ម៉ាណែតថ្លែងគាំទ្រ និងលើកទឹកចិត្តក្រសួងទេសចរណ៍ ក្នុងការរៀបចំផែនការយុទ្ធសាស្ត្រជាតិអភិវឌ្ឍន៍ វិស័យទេសចរណ៍២០២៦-២០៣៥។

សម្តេចមហាបវរធិបតី ហ៊ុន ម៉ាណែត ណែនាំរៀបចំពីតារាងតម្លៃសម្រាប់ព្រលានយន្តហោះថ្មី ឱ្យបានលឿន ហើយត្រូវធានាឱ្យបានពីដំណើរការនានាពេលដាក់ដំណើរការ។

សម្តេចមហាបវរធិបតី ហ៊ុន ម៉ាណែត ណែនាំក្រសួងទេសចរណ៍សិក្សាលទ្ធភាព ក្នុងការរៀបចំយុទ្ធនាការ “ឆ្នាំទស្សនាកម្ពុជា (Visit Cambodia Year)” នៅឆ្នាំ ២០២៦ ឬពេលសមស្របណាមួយ ដើម្បីជំរុញកំណើន ភ្ញៀវទេសចរឱ្យកាន់តែខ្លាំងក្លា ដែលរាជរដ្ឋាភិបាលបានឯកភាព កំណត់យកឆ្នាំ២០២៥ ជា “ឆ្នាំទេសចរណ៍កម្ពុជា-ចិន” និងបន្តយកឆ្នាំ២០២៥ ជា “ឆ្នាំទេសចរណ៍ កម្ពុជា-ឥណ្ឌា” ស្របពេលដែលអាស៊ានក៏បានកំណត់យកឆ្នាំ ២០២៥ ជា “ឆ្នាំទេសចរណ៍អាស៊ាន-ឥណ្ឌា”៕