ដោយៈ សាវុធ
ភ្នំពេញៈ វិនិយោគិនដែលមានចំណាប់អារម្មណ៍ ត្រូវទៅរកក្រុមហ៊ុនមូលបត្រណាមួយ ក្នុងចំណោមក្រុមហ៊ុនមូលបត្រទាំង១១ ដែលមានរាយឈ្មោះ និងអាសយដ្ឋាននៅលើគេហទំព័ររបស់ក្រុមហ៊ុនផ្សារមូលបត្រកម្ពុជា (ហៅកាត់ថា ផ.ម.ក. ឬ CSX)។ ក្រុមហ៊ុនមូលបត្រគឺជាជំនួយការរបស់វិនិយោគិន ទាក់ទងនឹងវិស័យមូលបត្រ។
ការទិញភាគហ៊ុនពេលបោះផ្សាយនេះ មិនមែនធ្វើឡើងនៅ ផ.ម.ក. ទេ។ គឺទិញពីក្រុមហ៊ុនបោះផ្សាយ តាមរយះក្រុមហ៊ុនមូលបត្រ ដែលចាត់ទុកជាភ្នាក់ងារលក់របស់គាត់។ នេះគេហៅថា ការទិញ/លក់ភាគហ៊ុននៅទីផ្សារដំបូង (Primary Market)។
នៅពេលទិញភាគហ៊ុននេះបានហើយ វិនិយោគិនដែលចង់បានសាច់ប្រាក់មកវិញ អាចលក់ភាគហ៊ុននោះចេញវិញ ទៅឱ្យវិនិយោគិនដទៃណា ដែលចង់ទិញភាគហ៊ុននោះ គឺមិនមែនលក់ទៅឱ្យក្រុមហ៊ុនដែលបោះផ្សាយវិញទេ។
ការទិញ លក់ រវាងវិនិយោគិនគ្នាឯងនេះគេហៅថា ការទិញ/លក់ភាគហ៊ុននៅទីផ្សារបន្ទាប់ (Secondary Market) ដែលទីផ្សារនេះ ត្រូវបានតំណាងដោយក្រុមហ៊ុនផ្សារមូលបត្រកម្ពុជា(ផ.ម.ក.) ដែលមានតួនាទីចម្បងមួយ ក្នុងការផ្តល់សេវាទីកន្លែងនិងប្រព័ន្ធជួញដូរ សម្រាប់វិនិយោគិនងាយស្រួលរកគ្នាឃើញ (អ្នកលក់និងអ្នកទិញ) និងជួញដូរជាមួយគ្នា។
ប៉ុន្តែទោះទិញ/លក់ភាគហ៊ុននៅទីផ្សារដំបូងក្តី នៅទីផ្សារបន្ទាប់ក្តី វិនិយោគិនត្រូវទៅរកក្រុមហ៊ុនមូលបត្រដូចគ្នា មិនមែនទៅរកក្រុមហ៊ុនបោះផ្សាយលក់មូលបត្រ ឬទៅក្រុមហ៊ុនផ្សារមូលបត្រកម្ពុជា (ផ.ម.ក.) ឡើយ។ ក្រុមហ៊ុនមូលបត្រនឹងជួយពន្យល់ និងទិញ/លក់ភាគហ៊ុន ឱ្យវិនិយោគិនដែលជាអតិថិជន ឬអតិថិជនសក្តានុពលរបស់ខ្លួន៕
