ដោយៈ ម៉ាណា
ភ្នំពេញៈ ទីផ្សារហិរញ្ញវត្ថុកម្ពុជាត្រូវបានរំពឹងថា នឹងឆ្ពោះទៅមុខកាន់តែលឿនបន្ថែមទៀត បន្ទាប់ពីនិយ័តករមូលបត្រកម្ពុជា(SERC) និងសាជីវកម្មហិរញ្ញវត្ថុអន្តរជាតិ (IFC) បានចុះកិច្ចព្រមព្រៀងសហប្រតិបត្តិការគ្នា។
ការចុះកិច្ចព្រមព្រៀងនេះ ដើម្បីរួមចំណែកកសាងនូវប្រព័ន្ធអេកូឡូស៊ី ទីផ្សារឱ្យកាន់តែរឹងមាំ និងធានាបាននូវកំណើនប្រកបដោយចីរភាព។ នេះបើតាម លោក ស៊ូ សុជាតិ អគ្គនាយក SERC។
ពិធីចុះហត្ថុលេខាត្រូវធ្វើឡើងក្នុងថ្ងៃទី២២ ខែមករា រវាងលោក ស៊ូ សុជាតិ អគ្គនាយក SERC (Sou Socheat, Delegate of the royal Government in Charge as Director General of the Securities and Exchange Regulator of Cambodia)និងលោក Tom Ceusters ប្រធានទទួលបន្ទុកផ្នែកផ្សារមូលបត្រ និងវិនិយោគនៃ IFC។
លោក ស៊ូ សុជាតិ បានថ្លែងថា កិច្ចសហការនេះបានធ្វើឡើងក្នុងកាលៈទេសៈដ៏សំខាន់មួយ ដោយសារទីផ្សារឧបករណ៍និស្សន្ទនៅប្រទេសកម្ពុជា មានសក្ដានុពលយ៉ាងធំធេង ក្នុងការរួមចំណែកដល់កំណើនហិរញ្ញវត្ថុរបស់ប្រទេស។
លោកបញ្ជាក់ថា “ការផ្តល់ឧបករណ៍ហិរញ្ញវត្ថុ ប្រកបដោយភាពច្នៃប្រឌិតសម្រាប់ការគ្រប់គ្រងហានិភ័យ និងការធ្វើពិពិធកម្មការវិនិយោគ នឹងជួយឱ្យទីផ្សារហិរញ្ញវត្ថុកម្ពុជាកាន់តែមានភាពរឹងមាំ ហើយវានឹងដើរតួនាទីយ៉ាងសំខាន់ ក្នុងការជួយអភិវឌ្ឍន៍សេដ្ឋកិច្ចជាតិផងដែរ”។
លោកបានបន្តថា កិច្ចព្រមព្រៀងរវាងនិយ័តករមូលបត្រកម្ពុជា និងសាជីវកម្មហិរញ្ញវត្ថុអន្តរជាតិ បង្ហាញពីផែនការដ៏ទូលំទូលាយមួយ ដើម្បីធានាបាននូវកំណើនប្រកបដោយចីរភាព។ គំនិតផ្តួចផ្តើមនេះស្របតាមគោលដៅរបស់ប្រទេសកម្ពុជា ក្នុងការក្លាយជាអ្នកចូលរួមប្រកួតប្រជែង និងគួរឱ្យទុកចិត្តនៅក្នុងប្រព័ន្ធអេកូឡូស៊ី ហិរញ្ញវត្ថុសកល។
យោងតាមកិច្ចព្រមព្រៀងIFC នឹងចូលរួមជួយការកសាងសមត្ថភាពជាបន្តបន្ទាប់ដល់បុគ្កលនិយ័តកម្ម និងអ្នកចូលរួមទីផ្សារជាមួយនឹងជំនាញចាំបាច់ នៃទីផ្សារនិស្សន្ទ, ការពង្រឹងក្របខ័ណ្ឌច្បាប់និងហិរញ្ញវត្ថុរបស់កម្ពុជា ដោយធានាថា អនុលោមតាមស្តង់ដាអន្តរជាតិ ហើយកិច្ចព្រមព្រៀងនេះ ក៏កំណត់ដំណាក់កាល សម្រាប់ទីផ្សារនិស្សន្ទដែលរួមចំណែកដល់ស្ថិរភាពហិរញ្ញវត្ថុរបស់កម្ពុជា និងគោលដៅសេដ្ឋកិច្ចទូលំទូលាយនៃការជំរុញការបង្កើតថ្មី តម្លាភាព និងភាពធន់នៅក្នុងទីផ្សារ។
លោក សុជាតិ បានបញ្ជាក់ថា កិច្ចព្រមព្រៀងនេះលើសពីឯកសារមួយ វាតំណាងឱ្យការប្តេជ្ញាចិត្តរួមគ្នារបស់យើង ដើម្បីសម្រេចបាននូវវឌ្ឍនភាពដ៏មានន័យ និងយូរអង្វែង។ នៅពេលដែលគម្រោងនេះចាប់ផ្តើមដំណើរការជាផ្លូវការ ការប្តេជ្ញាចិត្តពីទាំង SERC និង IFC មានគោលបំណងផ្តល់នូវអត្ថប្រយោជន៍ សម្រាប់ការអភិវឌ្ឍទីផ្សារនិស្សន្ទ និងសេដ្ឋកិច្ចកម្ពុជា”៕
 និងសាជីវកម្មហិរញ្ញវត្ថុអន្តរជាតិ (IFC) បានចុះកិច្ចព្រមព្រៀងសហប្រតិបត្តិការគ្នា។){kind=link}