ដោយៈ និស្ស័យ
ព្រះសីហនុៈ លោក ឡុង ឌីម៉ង់ អភិបាលរងខេត្តព្រះសីហនុបានថ្លែងថា ក្រុងកោះរ៉ុង ជាគ្រាប់ពេជ្រមិនទាន់បានកែច្នៃ ឲ្យអស់លទ្ធភាពរបស់ខេត្តព្រះសីហនុ ដោយភ្ញៀវទេសចរណ៍ជាតិ និងអន្តរជាតិមិនដែលរំលង។
លោក ឡុង ឌីម៉ង់ បានធ្វើឡើងក្នុងដំណើរបំពេញបេសកកម្មរបស់អ្នកសារព័ត៌មានជាតិ និងអន្តរជាតិជាង៦០រូប ដឹកនាំដោយក្លិបអ្នកកាសែតកម្ពុជា ដែលមានលោកពុយ គា ជាប្រធានដឹកនាំផ្ទាល់ ដើម្បីចុះផលិត និងផ្សព្វផ្សាយព័ត៌មាន ក្នុងខេត្តព្រះសីហនុ រយៈពេល៤ថ្ងៃ ចាប់ពីថ្ងៃទី១៥ ដល់ ១៨ ខែធ្នូ ឆ្នាំ២០២៤។
លោកឡុង ឌីម៉ង់ បានឲ្យដឹងថា ក្រុងកោះរ៉ុង ជាទីប្រជុំកោះ ហើយត្រូវបានចែកចេញជាពីសង្កាត់ គឺសង្កាត់កោះរ៉ុង និងសង្កាត់កោះរ៉ុងសន្លឹម ដែលមានធនធានធម្មជាតិដ៏ស្រស់បំព្រង ព្រៃកោងកាង ឆ្នេរសមុទ្រដ៏ស្រស់ស្អាត ដែលបានទាក់ចិត្តភ្ញៀវទេសចរជាតិ និងអន្តរជាតិជាច្រើន។
លោកបានបន្តថា ក្រុងកោះរ៉ុង ភាគច្រើនភ្ញៀវទេសចរប៉ែកអឺរ៉ុប ចូលចិត្តមកកម្សាន្ត មានទាំងផាសុកភាព មានសន្តិសុខ ភាពស្ងប់ស្ងាត់ ដែលធ្វើឱ្យភ្ញៀវទេសចរអាចមកលេងបាន៕
