ដោយៈម៉ាណេត
ភ្នំពេញៈ ប្រទេសកម្ពុជាជាប្រទេសតូចមួយ ដែលមានប្រជាជនត្រឹមតែ១៦,៥លាននាក់ បើប្រៀបធៀបជាមួយប្រទេសជិតខាង។ ទោះយ៉ាងណា ប្រទេសកម្ពុជាគឺជាទិសដៅទាក់ទាញ សម្រាប់ក្រុមហ៊ុនបច្ចេកវិទ្យាហិរញ្ញវត្ថុ (Fintech) និងក្រុមហ៊ុនទូទាត់តាមប្រព័ន្ធអេឡិចត្រូនិក (Paytech)។
ប្រជាជនជាងពាក់កណ្តាលមានអាយុក្រោម២៥ឆ្នាំ ដែលធ្វើឱ្យប្រទេសនេះស្ថិតក្នុងចំណោមប្រទេស ដែលមានចំនួនប្រជាជនវ័យក្មេង ច្រើនជាងគេនៅលើពិភពលោក។ ការប្រើប្រាស់ទូរស័ព្ទចល័ត ដែលមានអត្រាដល់ទៅ១២៤% របស់កម្ពុជាត្រូវបានគេចាត់ទុកថា ស្ថិតក្នុងចំណោមប្រទេស ដែលមានអត្រាខ្ពស់បំផុតនៅលើពិភពលោក ហើយការប្រើប្រាស់គណនីហ្វេសប៊ុកសកម្មមានជាង១១លានគណនី។
យោងតាមលោក Manu Rajan នាយកប្រតិបត្តិក្រុមហ៊ុនវីងបានឱ្យដឹងថា គណនីប្រើប្រាស់កាបូបអេឡិចត្រូនិក (ឬហៅថា e-wallet) មានចំនួនជាង៥.៥លានគណនី បាននិងកំពុងដំណើររួចហើយនៅក្នុងប្រទេសនេះ ហើយកម្ពុជាក៏កំពុងស្ថិត នៅក្នុងការឈានទៅរកវដ្តថ្មីមួយ នៃការប្រើប្រាស់បច្ចេកវិទ្យាហិរញ្ញវត្ថុផងដែរ។
ការប្រើប្រាស់សាច់ប្រាក់ នៅតែមានភាពទូលំទូលាននៅក្នុងប្រទេសកម្ពុជា។ ភាគច្រើន នៃការទូទាត់ប្រាក់នៅតែជាប្រតិបត្តិការជាក់ស្តែង និងដោយផ្ទាល់។ ប៉ុន្តែជាមួយនឹងការកើនឡើងនៃបច្ចេកវិទ្យាហិរញ្ញវត្ថុ នៅក្នុងប្រទេស វាគ្រាន់តែត្រូវការពេលវេលា មុនពេលផ្លាស់ប្តូរទៅរកការទូទាត់តាមប្រព័ន្ធឌីជីថល។
ប្រព័ន្ធធនាគារនៅកម្ពុជា ត្រូវបានធ្វើទំនើបកម្មជាបន្តបន្ទាប់ ស្របតាមនិម្មាបនកម្មហិរញ្ញវត្ថុអន្តរជាតិ និងបានរួមចំណែកស្នូល ក្នុងការរក្សាស្ថិរភាពម៉ាក្រូសេដ្ឋកិច្ច គាំទ្រកំណើនសេដ្ឋកិច្ច លើកកម្ពស់បរិយាបន្នសេដ្ឋកិច្ចនិងសង្គម និងកាត់បន្ថយភាពក្រីក្រ។
ធនាគារជាតិនៃកម្ពុជា (NBC)បានឱ្យដឹងថា “ប្រព័ន្ធធនាគារក៏បានប្រើប្រាស់បច្ចេកវិទ្យាហិរញ្ញវត្ថុ (Fintech) ក្នុងប្រតិបត្តិការ ជាពិសេសសម្រាប់ការទូទាត់ ដែលបាន លើកកម្ពស់បរិយាបន្នហិរញ្ញវត្ថុកម្ពុជាជាលំដាប់” ។
ជាក់ស្តែង ប្រជាជនពេញវ័យដែលទទួលបានសេវា ហិរញ្ញវត្ថុផ្លូវការកើនឡើងដល់ប្រមាណជាង៧០% ធៀបនឹងពីរទសវត្សរ៍មុន (តិចជាងប្រមាណ ១០% ប៉ុណ្ណោះ)។
កម្ពុជាក្លាយជាប្រទេសដំបូងគេ ក្នុងការដាក់ឲ្យដំណើរការប្រព័ន្ធបច្ចេកវិទ្យា Blockchain ដ៏ទំនើបចុងក្រោយគេក្នុងវិស័យហិរញ្ញវត្ថុ ដើម្បីផ្តល់លទ្ធភាពក្នុងការធ្វើ និងជម្រុញបរិយាប័ន្នហិរញ្ញវត្ថុ ពោលសំដៅការផ្តល់សេវាហិរញ្ញវត្ថុ សម្រាប់ប្រជាជនកម្ពុជាគ្រប់រូប។
កាលពីចុងខែតុលា ឆ្នាំ២០២០ NBC បានបើកសម្ពោធដាក់ឱ្យដំណើរជាផ្លូវការនូវប្រព័ន្ធទូទាត់បាគង ដែលជាគម្រោងរបស់ NBC ក្នុងការធ្វើទំនើបកម្មប្រព័ន្ធទូទាត់រាយនៅក្នុងព្រះរាជាណាចក្រកម្ពុជា ដើម្បីចូលរួមចំណែកអភិវឌ្ឍន៍សេដ្ឋកិច្ច ឆ្ពោះទៅរកសេដ្ឋកិច្ចឌីជីថល។
គិតចាប់ពីថ្ងៃទី១៨ ខែកក្កដា ឆ្នាំ២០១៩ មកដល់ថ្ងៃទី២៨ ខែតុលា ឆ្នាំ២០២០ ចំនួនសមាជិកចូលរួម បានកើនឡើងរហូតដល់១៨(គ្រិះស្ថានធនាគារ និងហិរញ្ញវត្ថុចំនួន១៦ និងគ្រិះស្ថានផ្តល់សេវាទូទាត់សងប្រាក់ចំនួន២)។ ទន្ទឹមនោះមានគ្រឹះស្ថានធនាគារ និងហិរញ្ញវត្ថុ ព្រមទាំងគ្រឹះស្ថានសេវាទូទាត់ សងប្រាក់ប្រមាណ២៤ផ្សេងទៀត បានទទួលការអនុញ្ញាតជាគោលការណ៍ ចូលជាសមាជិកប្រព័ន្ធបាគង និងកំពុងរៀបចំសិក្សាលក្ខណៈបច្ចេកទេសតភ្ជាប់ប្រព័ន្ធ៕