ដោយ: គង់ លាងហួរ
អន្តរជាតិ: រដ្ឋាភិបាលឥណ្ឌូនេស៊ី បានស្នើឱ្យក្រុមហ៊ុនបច្ចេកវិទ្យាខ្នាតយក្សApple និងGoogle បិទវេទិកាពាណិជ្ជកម្មអេឡិចត្រូនិកចិនTemu នៅក្នុងកម្មវិធីលក់App របស់ខ្លួនក្នុងប្រទេ សឥណ្ឌូនេស៊ី ដើម្បីការពារក្រុមហ៊ុនក្នុងស្រុក ពីការប្រកួតប្រជែងដោយមិនស្មើភាព។
លោក Budi Arie Setiadi រដ្ឋមន្រ្តីក្រសួងទំនាក់ទំនង បានថ្លែងប្រាប់សារពត៌មាន Reuters ថា វិធានការនេះមានគោលបំណងការពារសហគ្រាសខ្នាតតូច និងមធ្យមរបស់ប្រទេសឥណ្ឌូនេស៊ី ដែលអាចរងផលប៉ះពាល់ធ្ងន់ធ្ងរ ដោយសារការនាំចូលផលិតផលថោកៗពីប្រទេសចិន តាមរយៈវេទិកាអនឡាញ Temu។
អាជីវកម្មរបស់ក្រុមហ៊ុន Temu បានរីកចម្រើនយ៉ាងឆាប់រហ័ស តាមរយៈការលក់ទំនិញថោកៗ ចេញពីរោងចក្រនៅក្នុងប្រទេសចិន។ ការណ៍នេះបានបង្កជាក្ដីបារម្ភ សម្រាប់បណ្តាប្រទេសជាច្រើន នៅតំបន់អាស៊ាន ជាពិសេសថៃ ចំពោះលំហូរទំនិញថោកៗពីចិន ដែលធ្វើឱ្យសហគ្រាសខ្នាតតូច និងមធ្យមក្នុងស្រុករបស់ពួកគេពិបាកប្រកួតប្រជែង។
លោក Budi លើកឡើងថា គម្រូអាជីវកម្មរបស់វេទិកា Temu ជាការប្រកួតប្រជែងដោយមិនស្មើភាពគ្នា។
លោកអះអាងថា “យើងបានដើរមកដល់ចំណុចនេះ មិនមែន ដើម្បីការពារពាណិជ្ជកម្ម តាមប្រព័ន្ធអេឡិចត្រូនិកនោះទេ។ ប៉ុន្តែយើងការពារសហគ្រាសធុនតូច និងមធ្យម ហើយមានមនុស្សរាប់លាននាក់ ដែលយើងត្រូវតែការពារពួកគេ”។
យ៉ាងណាមិញ ទាក់ទិននឹងបញ្ហានេះ ក្រុមហ៊ុនយក្ស Apple និងក្រុមហ៊ុន Google របស់សហរដ្ឋអាមេរិក ពុំទាន់បានបង្ហាញប្រតិកម្ម ឬការឆ្លើយតបណាមួយ ចំពោះសំណើរខាងលើនេះនៅឡើយទេ។
ប៉ុន្តែទោះជាយ៉ាងណាក្តី កន្លងមក រដ្ឋាភិបាលឥណ្ឌូនេស៊ីធ្លាប់បានលើកឡើងថា ខ្លួននឹងហាមមិនឱ្យវេទិកា Temu ធ្វើប្រតិបត្តិការអាជីវកម្ម នៅក្នុងប្រទេសឥណ្ឌូនេស៊ីឡើយ។
កាលពីឆ្នាំមុន ប្រទេសឥណ្ឌូនេស៊ី ក៏បានបង្ខំឱ្យប្រព័ន្ធផ្សព្វ ផ្សាយសង្គម TikTok របស់ក្រុមហ៊ុនចិន ByteDance បិទសេវាកម្មពាណិជ្ជកម្មអេឡិចត្រូនិក នៅក្នុងប្រទេសរបស់ខ្លួន ដើម្បីការពារពាណិជ្ជករក្នុងស្រុក និងឯកជនភាពនៃទិន្នន័យរបស់អ្នកប្រើប្រាស់។
អស់រយៈពេលប៉ុន្មានខែក្រោយមក បណ្តាញសង្គម TikTok បានសម្រេចចិត្តទិញ ចំណែកភាគហ៊ុនជាច្រើននៅក្នុងក្រុមហ៊ុនបច្ចេកវិទ្យាឥណ្ឌូនេស៊ី GoTo’s ដើម្បីបន្តធ្វើអាជីវកម្មនៅក្នុងប្រទេស ដែលមានសេដ្ឋកិច្ចធំជាងគេ របស់តំបន់អាស៊ានមួយនេះ។
យោងតាមរបាយការណ៍ ដែលចងក្រងដោយក្រុមហ៊ុន Google សហការជាមួយក្រុមហ៊ុនរដ្ឋសិង្ហបុរី Temasek Holdings និងក្រុមហ៊ុនប្រឹក្សាយោបល់ Bain& Co.បានព្យាករណ៍ថា ឧស្សាហកម្មពាណិជ្ជកម្មអេឡិចត្រូនិក របស់ឥណ្ឌូនេស៊ីនឹងកើនឡើង ដល់ទំហំទឹកប្រាក់ប្រហែល១៦០ពាន់លានដុល្លារនៅឆ្នាំ២០៣០ បើធៀបនឹងទំហំ៦២ពាន់លានដុល្លារក្នុងឆ្នាំ២០២៣៕ប្រភព: Reuters៕
