ដោយគង់ សូរិយា
ភ្នំពេញៈ ស្ថាប័នមីក្រូហិរញ្ញវត្ថុប្រាសាក់ នៅតែរក្សាបានភាពខ្លាំងរបស់ខ្លួន ដោយទំហំឥណទាន និងប្រាក់បញ្ញើរ បានកើនឡើងក្នុងរង្វង់២០ភាគរយ ធៀបរយៈពេលដូចគ្នាកាលពីឆ្នាំមុន។
នាយកប្រតិបត្តិគ្រប់គ្រងទីផ្សារ នៃគ្រឹះស្ថានមីក្រូហិរញ្ញវត្ថុប្រាសាក់ លោកសាយ សូនីបានមានប្រសាសន៍ឲ្យដឹង តាមទូរស័ព្ទនៅល្ងាចថ្ងៃទី៣០វិច្ឆិកានេះថា សុខភាពរបស់មីក្រូហិរញ្ញវត្ថុប្រាសាក់នៅតែមានភាពវិជ្ជមាន ដោយទំហំឥណទានរបស់យើងអាចកើនដល់៣០២៥លានដុល្លារ និងប្រាក់បញ្ញើរអាចកើនដល់២០២៥លានដុល្លារ។ នេះបើតាមការព្យាករណ៍បឋមរបស់លោក។
លោកបន្តថា “ចំណុចខ្លាំងរបស់យើង គឺយើងមានការិយាល័យ និងមន្រ្តីឥណទាននៅទូទាំងប្រទេស ពិសេសមន្រ្តីឥណទានរបស់យើងបានចុះដល់ស្ទើរគ្រប់ភូមិ”។ លោកបន្តថា “កំនើនប្រាក់បញ្ញើរ ដោយសារអត្រាការប្រាក់យើងមានភាពទាក់ទាញ និងការវិនិយោគ លើប្រព័ន្ឋបច្ចេកវិទ្យាយើងកាន់តែទំនើប ដែលផ្តល់ភាពងាយស្រួលដល់អតិថិជន”។
ទាក់ទងលំហូរធនាគារបរទេសចូលមកកម្ពុជា នឹងធ្វើឲ្យទីផ្សារនេះ មានភាពប្រែប្រួលដូចម្តេច អ្នកជំនាញផ្នែកហិរញ្ញវត្ថុរូបនេះនៅតែសុទិដ្ឋិនិយម។
លោកសាយ សូនីបានបន្តទៀតថា ការហូរចូលនូវធនាគាររបស់ចិន និងកូរ៉េច្រើនមួយរយៈពេលចុងក្រោយនេះ មិនបានធ្វើឲ្យមានការប្រកួតប្រជែងខ្លាំងនោះទេ ព្រោះពួកគេមកផ្តោតលើទីក្រុង និងទីប្រជុំជនមួយចំនួន ប៉ុន្តែយើងបានចុះដល់សហគមន៍មូលដ្ឋាន យើងយល់ពីទីផ្សារច្រើនជាងពួកគេ។លោកបន្តថា ចំណុចមួយទៀត គឺធនាគារបរទេសពួកគេមកកាន់កម្ពុជា ក៏ដើម្បីគាំទ្រគំរោងវិនិយោគរបស់ពួកគេ និងដៃគូរបស់ពួកគេ ដែលមានវត្តមាននៅកម្ពុជា។
លោកបន្តថា “ភាពទាក់ទាញរបស់កម្ពុជា ដែលធនាគារបរទេសមក ក៏មួយផ្នែកដោយសារពួកគេមើលឃើញចន្លោះប្រហោង ក្នុងវិស័យសហគ្រាសធុនតូច និងមធ្យម(SMEs) ដែលនៅតែត្រូវការឥណទានច្រើន ដើម្បីពង្រឹកសមត្ថភាពផលិតកម្មរបស់ពួកគេ៕