ដោយៈ គង់ ម៉ាលីនណា
ភ្នំពេញៈ គ្រឹះស្ថានមីក្រូហិរញ្ញវត្ថុជាច្រើន ត្រូវបានទិញយកដោយធនាគារបរទេស ដែលជាផ្នែកមួយនៃការរីកចម្រើនសេដ្ឋកិច្ច សង្គម និងការកើនឡើងអំណាចនៃការទិញក្នុងស្រុក។
លោក កាំង តុងងី អ្នកនាំពាក្យសមាគមមីក្រូហិរញ្ញាវត្ថុកម្ពុជា បានមានប្រសាសន៍ឲ្យដឹងថា វិស័យមីក្រូហិរញ្ញាវត្ថុ មានប្រវត្តិជាប់ទាក់ទងនិងបរទេសតាំងពីដើមមកហើយ ពោលគឺ តាំងពីការចាប់ផ្តើមក្នុងទស្សវត្សរ៍ឆ្នាំ១៩៩០មកម្ល៉េះ ដែលវាជាទម្រង់អភិវឌ្ឍរបស់ម្ចាស់ជំនួយរបស់អង្គការធំៗ ដែលបានចូលរួមជួយកម្ពុជា ។
លោកបញ្ជាក់ថា “ក្រោយពេលដែលកម្មវិធីអភិវឌ្ឍទាំងអស់ ដកចេញពីកម្ពុជាយើង ក្រុមការងារដែលមានស្រាប់ ក៏បានវិវត្តន៍គម្រោងនានា ទៅជាក្រុមហ៊ុនឯកជន ដើម្បីធានាបាននូវនិរន្តរភាពបន្តផ្តល់សេវាដល់ប្រជាពលរដ្ឋនៅប្រទេសកម្ពុជា”។
គ្រឹះស្ថានមីក្រូហិរញ្ញវត្ថុដែលបានទិញដោយធនាគារបរទេសកន្លងមកមានដូចជា គ្រឹះស្ថានមីក្រូហិរញ្ញវត្ថុកសិករ លីមីតធីត គ្រឹះស្ថានមីក្រូហិរញ្ញវត្ថុប្រាសាក់ គ្រឹះស្ថានមីក្រូហិរញ្ញវត្ថុអម្រិតជាដើម។
លោក កាំង តុងងី បន្តថា នៅពេលដែលវិស័យមីក្រូហិរញ្ញាវត្ថុកើនឡើងខ្ពស់ គួបផ្សំជាមួយសេ្ថរភាពនយោបាយ ហើយចាប់ពីឆ្នាំ ២០១០មក យើងឃើញមានធនាគារឯកជន លើពិភពលោកចាប់ផ្តើមចូលមកទិញភាគហ៊ុន ទិញទាំងស្រុង ឬចូលរួម វិនិយោគបន្ថែមលើវិស័យមួយនេះ ។
លោកកាំង តុងងី បានបន្ថែមថា យើងឃើញគ្រឹះស្ថានមីក្រូហិរញ្ញាវត្ថុស្ថាបនា ក្រោយមកត្រូវបានធនាគារទិញ គ្រឹះស្ថានក្រេឌីត ត្រូវបានធនាគារហ្វីលីពទិញ ក៏ដូចជាគ្រឹះស្ថានមីក្រូ ហិរញ្ញាវត្ថុផ្សេងៗទៀតមួយចំនួនទិញ ដូចជាក្រុមហ៊ុនមកពីចិន កូរ៉េ សឹង្ហបុរី ជប៉ុន អីជាដើមទិញ ដោយសារតែគាត់មើលឃើញ ពីកំណើននៃសេដ្ឋកិច្ចកម្ពុជា។
លោកបញ្ជាក់ថា “នេះជានិនា្នការធម្មតា ដូចតែនៅក្នុងប្រទេសផ្សេងៗ ដែលនៅពេលប្រទេសកំពុងអភិវឌ្ឍន៍ តួអង្គក្នុងស្រុកខិតខំកសាងទីផ្សារ ហើយនៅពេលដែលទីផ្សាររឹងមាំហើយ នឹងចាប់ផ្តើមមានអ្នកវិនិយោគអន្តរជាតិ ចូលមកវិនិយោគក្នុងវិស័យនេះ។ កម្ពុជាក៏ងាកទៅរកនិន្នាការនេះដូចគ្នាដែរ”។ លោកបន្ថែមថា “ខ្ញុំមើលឃើញថា នេះជាការវិវត្តន៍ល្អទេសម្រាប់ទីផ្សារ នៅពេលដែលអ្នកផ្តល់សេវាច្រើនការប្រកួតប្រជែងកាន់តែខ្លាំង អ្នកដែលចំណេញគឺអតិថិជនទេ ហើយអ្នកដែលប្រកួតប្រជែង លើទីផ្សារគាត់ត្រូវផ្តល់ទៅលើគុណភាពនៃសេវា ដើម្បីធានាបាននូវប្រសិទ្ធភាពការផ្តល់សេវារបស់គាត់”។
នៅកម្ពុជាបច្ចុប្បន្ន មានគ្រឹះស្ថានមីក្រូហិរញ្ញវត្ថុសរុបចំនួន គ្រឹះស្ថានមីក្រូហិរញ្ញវត្ថុចំនួន៨៧ គ្រឹះស្ថានភតិសន្យាហិរញ្ញវត្ថុ១៦ គ្រឹះស្ថានឥណទានជនបទ១១៤ អ្នកដំណើរការតតិយភាគី៦ គ្រឹះស្ថានផ្តល់សេវាទូទាត់សងប្រាក់៣៣ ក្រុមហ៊ុនចែករំលែកប្រព័ន្ធព័ត៌មានឥណទាន១ ការិយាល័យតំណាងធនាគារបរទេស៥ និងអាជីវកម្មប្តូរប្រាក់២៩២៨៕
