ដោយៈ និស្ស័យ
ភ្នំពេញៈ ក្រសួងសេដ្ឋកិច្ច និងហិរញ្ញវត្ថុ នាព្រឹកថ្ងៃទី ៨ ខែ ឧសភា ឆ្នាំ២០២៤ បានប្រកាសដាក់ឱ្យអនុវត្តន៍ គម្រោងប្រព័ន្ធបច្ចេកវិទ្យាព័ត៌មាន សម្រាប់ការគ្រប់គ្រងហិរញ្ញវត្ថុសាធារណៈ (FMIS) ទៅកាន់ការដ្ឋានបន្ថែមថ្មី និងប្រើប្រាស់សមិទ្ធផលថ្មីៗជាផ្លូវការ។
លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុបានអញ្ជើញជាអធិបតីក្នុងពិធីនេះ និងមានការចូលរួមពីមន្រ្តីពាក់ព័ន្ឋ។
មកដល់បច្ចុប្បន្ននេះ FMIS (Financial Management Information System) ត្រូវបានដាក់ឱ្យប្រើប្រាស់ នៅគ្រប់ទីតាំងអនុវត្តថវិកាសំខាន់ៗ ទាំងនៅថ្នាក់ជាតិ និងទាំងនៅថ្នាក់ក្រោមជាតិ រួមមាន អគ្គនាយកដ្ឋានជំនាញទាំងអស់ នៃក្រសួងសេដ្ឋកិច្ច និងហិរញ្ញវត្ថុ, អង្គភាពទទួលបន្ទុកហិរញ្ញវត្ថុ និងអង្គភាពថវិកាអាណាប័កផ្ទេរសិទ្ធិពេញលេញនៅគ្រប់ក្រសួង-ស្ថាប័ន, មន្ទីរសេដ្ឋកិច្ច និងហិរញ្ញវត្ថុរាជធានី-ខេត្តទាំង២៥ រតនាគាររាជធានី-ខេត្តទាំង២៥ រដ្ឋបាលរាជធានី-ខេត្តទាំង២៥ និងរដ្ឋបាលក្រុង-ស្រុក-ខណ្ឌចំនួន៤៤ ដែលសរុបមានចំនួន២១៣ ការដ្ឋាន ។
ជាមួយគ្នានេះ ការដាក់ឱ្យប្រើប្រាស់ FMIS Portal ជំនាន់ទី ១ នៅគ្រប់រដ្ឋបាលក្រុង-ស្រុក និងឃុំ-សង្កាត់ នៅទូទាំងប្រទេសកម្ពុជា សរុបចំនួន១,៨៧០ ការដ្ឋាន ។
ស្របពេលដែលរាជរដ្ឋាភិបាលនីតិកាលទី ៧ នៃរដ្ឋសភា ក្រោមការដឹកនាំដ៏ឈ្លាសវៃ របស់សម្តេចមហាបវរធិបតីហ៊ុន ម៉ាណែត នាយករដ្ឋមន្រ្តីនៃកម្ពុជា ដែលជាអគ្គមគ្គុទេសក៍វៃក្មេងដ៏ឆ្នើម បានដាក់ចេញនូវយុទ្ធសាស្រ្តបញ្ចកោណដំណាក់កាលទី ១ ដោយបន្ថែម បច្ចេកវិទ្យា ជាពិសេសបច្ចេកវិទ្យាឌីជីថល ជាអាទិភាពគន្លឹះថី្ម សម្រាប់ឆ្លើយតបទៅនឹងបដិវត្តឧស្សាហកម្មទី៤ និងបរិវត្តកម្មឌីជីថលនៃសេដ្ឋកិច្ច និងសង្គមកម្ពុជា។
រហូតមកទល់ពេលនេះ តាមរយៈវិសាលភាពនៃការប្រើប្រាស់ FMIS, ថ្នាក់ដឹកនាំ និងមន្ត្រីរាជការជាច្រើនរូប ទាំងនៅថ្នាក់ជាតិ និងថ្នាក់ក្រោមជាតិ ដែលទទួលបន្ទុកកិច្ចការហិរញ្ញវត្ថុ និងថវិកាបានយល់ដឹង ចូលរួមចំណែក និងទទួលយកនូវការងារតាមរបៀបថ្មី តាមប្រព័ន្ធបច្ចេកវិទ្យាព័ត៌មាន ស្ទើរតែទូទាំងប្រទេស។
អគ្គបណ្ឌិតសភាចារ្យ អូន ព័ន្ធមុនីរ័ត្នបានបញ្ជាក់ថា ការអនុវត្តផែនការយុទ្ធសាស្ត្រតម្រង់ទិស នីតិវិធីអនុវត្តការងារតាម FMIS បាន និងកំពុងបង្ហាញឱ្យឃើញយ៉ាងច្បាស់ ពីប្រសិទ្ធភាពដ៏ធំធេង ក្នុងការកសាងនូវមូលដ្ឋានគ្រឹះដ៏រឹងមាំ សម្រាប់ការចាត់ចែង និងការបែងចែកធនធានហិរញ្ញវត្ថុជាតិ ឱ្យកាន់តែមានតម្លាភាព គណនេយ្យភាព និងប្រសិទ្ធភាព ចូលរួមចំណែកជួយគាំទ្រ ដល់ការឈានទៅសម្រេចបាន តាមចក្ខុវិស័យនៃការប្រែក្លាយប្រទេសកម្ពុជា ទៅជាប្រទេសមានចំណូលខ្ពស់នៅឆ្នាំ២០៥០។
លោកបានប្រកាសដាក់ឱ្យអនុវត្តគម្រោង FMIS ក៏ដូចជាប្រើប្រាស់សមិទ្ធផលថ្មីៗ ដូចជា ទី១-ការដាក់ឱ្យអនុវត្តគម្រោង FMIS ទៅកាន់គ្រឹះស្ថានសាធារណៈរដ្ឋបាលថ្មីចំនួន៥ រួមមាន៖ សាកលវិទ្យាល័យភូមិន្ទកសិកម្ម សាកលវិទ្យាល័យជាតិបាត់ដំបង សាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច, វិទ្យាស្ថានសេដ្ឋកិច្ច និងហិរញ្ញវត្ថុ និងសាកលវិទ្យាល័យវិទ្យាសាស្ត្រសុខាភិបាល ដោយប្រើប្រាស់នីតិវិធីចំណាយ និងចលនាឥណទានថវិកាចរន្តតាម FMIS ទាំងស្រុង ។
២ -ប្រកាសដាក់ឱ្យអនុវត្តគម្រោងFMIS នៅអង្គភាពថវិកាអាណាប័កផ្ទេរសិទ្ធិពេញលេញ ថ្នាក់កណ្តាលចំនួន៤៤ នៃក្រសួង-ស្ថាប័នចំនួន ១០ រួមមាន៖ ក្រសួងសេដ្ឋកិច្ច និងហិរញ្ញវត្ថុ, ក្រសួងអប់រំ យុវជន និងកីឡា ក្រសួងយុត្តិធម៌, ក្រសួងរ៉ែ និងថាមពល, ក្រសួងប្រៃសណីយ៍ និងទូរគមនាគមន៍, ក្រសួងធម្មការ និងសាសនា, ក្រសួងមុខងារសាធារណៈ, ក្រសួងឧស្សាហកម្មវិទ្យាសាស្រ្ត បច្ចេកវិទ្យា និងនវានុវត្តន៍, អាជ្ញាធរសវនកម្មជាតិ និងក្រុមប្រឹក្សាអភិវឌ្ឍន៍កម្ពុជា ដោយប្រើប្រាស់នីតិវិធីចំណាយ និងចលនាឥណទានថវិកាចរន្តតាម FMIS ទាំងស្រុង ។
៣-ប្រកាសដាក់ឱ្យអនុវត្តនីតិវិធី ចលនាឥណទានថវិកាចរន្តតាម FMIS ទាំងស្រុង នៅក្រសួង-ស្ថាប័នចំនួន ៨ រួមមាន៖ ក្រសួងសេដ្ឋកិច្ច និងហិរញ្ញវត្ថុ, ក្រសួងបរិស្ថាន, ក្រសួងរ៉ែ និងថាមពល, ក្រសួងប្រៃសណីយ៍ និងទូរគមនាគមន៍, ក្រសួងធម្មការ និងសាសនា, អាជ្ញាធរសវនកម្មជាតិ, ក្រុមប្រឹក្សាអភិវឌ្ឍន៍កម្ពុជា និងក្រសួងយុត្តិធម៌ ។
៤-ប្រកាសដាក់ឱ្យប្រើប្រាស់ជាផ្លូវការ មុខងារតាមដានប្រតិបត្តិការ និងស្ថានភាពអនុម័តប្រតិបត្តិការ (FMIS Transaction Monitoring) នៅគ្រប់ការដ្ឋាន FMIS ទាំងអស់ និងមុខងារតាមដាន និងត្រួតពិនិត្យការអនុវត្តថវិកា (FMIS Performance Monitoring) នៅការដ្ឋាន FMIS ដែលអនុវត្តនីតិវិធីអនុវត្តការងារតាម FMIS ទាំងស្រុង៕