ដោយៈ គង់ សូរិយា
ព្រះសីហនុៈ ក្រុមហ៊ុន Haoruidar (Cambodia) Co.,Ltd គ្រោងបោះទុន ក្នុងទំហំទឹកប្រាក់ជាង១២លានដុល្លារ វិនិយោគសាងសង់ រោងចក្រកែច្នៃផ្លែឈើ ដើម្បីនាំចេញ ជាពិសេសក្រុមហ៊ុននឹងធ្វើការប្រមូលទិញនូវផ្លែឈើពីប្រជាកសិករ ដើម្បីយកមកកែច្នៃផងដែរ។
អភិបាលរងខេត្តព្រះសីហនុ លោកឡុង ឌីម៉ង់បានមានប្រសាសន៍ឲ្យដឹងថា នាពេលថ្មីៗនេះ រដ្ឋាភិបាលបានអនុម័តលើគម្រោងវិនិយោគរបស់ក្រុមហ៊ុន Haoruidar (Cambodia) ដែលមានទុនវិនិយោគជាង១២,៣លានដុល្លារ លើរោងចក្រកែច្នៃផ្លែឈើ (ស្វាយ, ម្នាស់, ខ្នុរ, ទុរេន) នៅឃុំកំពង់សីលា ស្រុកកំពង់សីលា ខេត្តព្រះសីហនុ។
លោកប្រាប់ថា “ការវិនិយោគរបស់ក្រុមហ៊ុន នៅខេត្តព្រះសីហនុ គឺពិតជាមានសារៈសំខាន់ ព្រោះវាជាគម្រោងវិនិយោគដែលប្រមូលទិញផលិតផលក្នុងស្រុកទាំងអស់”។ លោកបន្តថា “ដូច្នេះក្រុមហ៊ុននឹងធ្វើការប្រមូលទិញផ្លែខ្នុរ ស្វាយ ម្នាស់ និងទុរេនពីក្នុងស្រុកទាំងអស់ គឺពុំបាននាំចូលដើម្បីយកមកកែច្នៃឡើយ”។
លោកបន្ថែមថា គម្រោងរោងចក្រកែច្នៃផ្លែឈើនេះ គឺមិនត្រឹមតែចូលរួមចំណែក ដល់ការអភិវឌ្ឍសេដ្ឋកិច្ចរបស់ខេត្ត តាមរយៈការបង្កើតតម្លៃបន្ថែម ការនាំចូលនូវបច្ចេកវិទ្យាទំនើបៗ ការបង្កើតការងារ ជាពិសេសបង្កើតទីផ្សារ ដល់ប្រជាកសិករប៉ុណ្ណោះទេ ប៉ុន្តែក៏បានរួមចំណែកក្នុងការជំរុញផលិតកម្ម ក្នុងស្រុកលើវិស័យកែច្នៃនេះ ស្របតាមទិសដៅរបស់រាជរដ្ឋាភិបាលផងដែរ។
អនុប្រធានសភាពាណិជ្ជកម្មកម្ពុជា អ្នកឧកញ៉ាលឹម ហេងបាននិយាយថា ការវិនិយោគលើវិស័យកែច្នៃចំណីអាហារ នៅកម្ពុជាមានវិសាលភាពធំ ដែលផ្តល់ឱកាសដល់វិស័យឯកជន ក្នុងការវិនិយោគលើការដំឡើងរោងចក្រកែច្នៃ ក្នុងការផ្គត់ផ្គង់ក្នុងស្រុក ក៏ដូចជា នាំចេញទៅទីផ្សារក្នុងតំបន់ និងពិភពលោក ស្របពេលដែលប្រទេសកម្ពុជាមានអំណោយផលខ្ពស់លើវិស័យកសិកម្ម។
លោកបញ្ជាក់ថា “យើងស្វាគមន៍ការវិនិយោគ លើវិស័យកែច្នៃចំណីអាហារផ្លែឈើ ដោយសារតែប្រទេសយើងជាប្រទេសកសិកម្ម ប៉ុន្តែសម្រាប់លទ្ធភាពកែច្នៃ គឺយើងនៅមានកម្រិតនៅឡើយ”។លោកបន្ថែមថា “ដូច្នេះការវិនិយោគលើវិស័យកែច្នៃចំណីអាហារនេះ គឺពិតជាមានសារៈសំខាន់ណាស់ ដែលវាបានផ្តល់តម្លៃបន្ថែមក្នុងស្រុក រក្សាលំនឹងទីផ្សារកសិផល ក៏ដូចជា បង្កើនសមត្ថភាពនៃវិស័យកែច្នៃចំណីអាហារនេះផងដែរ”៕
