ដោយៈលក្ខិណា
ភ្នំពេញៈ មន្ត្រីជាន់ខ្ពស់រដ្ឋាភិបាលកម្ពុជាបានថ្លែងថា ការនាំចេញរបស់ម្ពុជា នឹងកើនឡើងគិតជាកំណើនប្រចាំឆ្នាំចំនួន៧.៣% វិនិយោគចំនួន២៣.៤%, និងផលិតផលក្នុងស្រុកសរុប (ផសស) កើនចំនួនប្រមាណ ២% លើផសសដែលមានបច្ចុប្បន្ន ក្រោយពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(អាសិប)ចូលជាធរមាន។
លោកបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ តំណាងដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជានៅថ្ងៃទី១៥ ខែវិច្ឆិកា ឆ្នាំ២០២០ បានដឹកនាំគណៈប្រតិភូជាន់ខ្ពស់កម្ពុជា ចូលរួមកិច្ចប្រជុំកំពូលលើកទី៤ស្តីពី កិច្ចព្រមព្រៀងអាសិប តាមប្រព័ន្ធវីដេអូ ដោយមានការចូលរួមពីប្រមុខដឹកនាំអាសិបទាំង១៥ និងអគ្គលេខា ធិការអាស៊ាន ដើម្បីពិនិត្យវឌ្ឍនភាពនៃការអនុវត្តនូវអាណត្តិផ្តល់ឱ្យរដ្ឋមន្ត្រីអាសិប កាលពីកិច្ច ប្រជុំកំពូលលើកទី៣ និងធ្វើជាសក្ខីភាពនៅក្នុងពិធីចុះហត្ថ លេខាកិច្ចព្រមព្រៀងអាសិប។
ប្រមុខដឹកនាំអាសិប បានកត់សម្គាល់ និងវាយតម្លៃខ្ពស់ចំពោះរដ្ឋមន្ត្រី និងអ្នកចរចាអាសិបទាំងអស់ ដែលបានខិតខំប្រឹងប្រែងក្នុងរយៈពេល៨ឆ្នាំ កន្លងមកនេះ និងសម្រេចបាននូវអាណត្តិ ដែលបានផ្តល់ឱ្យកាលពីកិច្ចប្រជុំ កំពូលអាសិបលើកទី៣ ឆ្នាំ២០១៩ កន្លងទៅ។
សម្រាប់កម្ពុជា រាជរដ្ឋាភិបាល បានប្រគល់សិទ្ធិជូន លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ចុះហត្ថលេខាលើកិច្ចព្រមព្រៀងនេះ។ ការសម្រេចបាននូវកិច្ចព្រមព្រៀងអាសិប នាពេលនេះ ជាសមិទ្ធិផលដ៏មានសារសំខាន់ ជាប្រវត្តិសាស្ត្រសម្រាប់កម្ពុជា និងតំបន់ ដែលនឹងចូលរួមចំណែកក្នុងការគាំពារ និងលើកកម្ពស់សកលភាវូបនីយកម្ម និងគាំទ្រប្រព័ន្ធពាណិជ្ជកម្មសេរីពហុភាគី ដោយផ្អែកលើច្បាប់ ដែលជាបុរេលក្ខខណ្ឌមិនអាចខ្វះបាន ស្របតាមគោលការណ៍នៃការធ្វើពាណិជ្ជកម្មដោយសេរី និងយុត្តិធម៌។
កិច្ចព្រមព្រៀងនេះ ក៏នឹងក្លាយជាកម្លាំងចលករដ៏សំខាន់ ក្នុងការជួយដល់ដំណើរការនៃការអភិវឌ្ឍសង្គម-សេដ្ឋកិច្ច ប្រកបដោយចីរភាព និងបរិយាប័ន្ន។ អាសិប ក៏ដើរតួនាទីជាកាតាលីករមួយផងដែរ ក្នុងការចូលរួមចំណែកជំរុញកំណើនសេដ្ឋកិច្ច លើកកម្ពស់សុខមាលភាព និងជីវភាពរបស់ប្រជាជននៅក្នុងតំបន់ ព្រមទាំងជួយស្តារសង្គម-សេដ្ឋកិច្ចតំបន់ឡើងវិញ បន្ទាប់ពីវិបត្តិនៃជំងឺកូវីដ-១៩ បានបញ្ចប់។
ការចុះហត្ថលេខា លើកិច្ចព្រមព្រៀងអាសិបនាពេលនេះ បង្កើតបាននូវកិច្ចព្រមព្រៀងពាណិជ្ជកម្មសេរីដ៏ធំបំផុតក្នុងពិភពលោក ដែលគ្របដណ្តប់លើ៖ (១) ប្រជាជនប្រមាណ២.២ពាន់លាននាក់ ឬ៣០% នៃចំនួនប្រជាជនពិភពលោក (២) ផលិតផលក្នុងស្រុកសរុបប្រមាណ២៦.២ទ្រីលាន ដុល្លារអាមេរិក ឬ៣០% នៃផលិតផលក្នុងស្រុកសរុបរបស់ពិភពលោក និង(៣) ទំហំពាណិជ្ជកម្មចំនួនប្រមាណ២៨% នៃទំហំពាណិជ្ជកម្មពិភពលោកទាំងមូល (ផ្អែកលើទិន្នន័យឆ្នាំ២០១៩) ។
សម្រាប់កម្ពុជា ផ្អែកតាមលទ្ធផលនៃការចរចា និងការសិក្សារបស់វិទ្យាស្ថានERIA បានបង្ហាញថា ក្រោយពីកិច្ចព្រមព្រៀងអាសិបនេះចូលជាធរមាន គិតជាកំណើនប្រចាំឆ្នាំ ការនាំចេញរបស់ម្ពុជានឹងកើនឡើងចំនួន៧.៣% វិនិយោគចំនួន២៣.៤%និងផលិតផលក្នុងស្រុកសរុប (ផសស) កើនចំនួនប្រមាណ២% លើ ផសស ដែលមានបច្ចុប្បន្ន។
ប្រមុខដឹកនាំអាសិបបានលើកទឹកចិត្ត ឱ្យប្រទេសជាសមាជិកពន្លឿនការបញ្ចប់នីតិវិធីក្នុងស្រុក ក្នុងការផ្តល់សច្ចាប័ន ដើម្បីឱ្យកិច្ចព្រមព្រៀងនេះ អាចចូលជាធរមានក្នុងពេលដ៏ខ្លីខាងមុខ សំដៅអនុញ្ញាតឱ្យប្រទេសជាសមាជិកទាំងអស់ អាចប្រើប្រាស់ និងទាញយកអត្ថប្រយោជន៍ជាអតិបរមា ពីកិច្ចព្រមព្រៀងអាសិបនេះ។ ប្រមុខដឹកនាំអាសិបក៏បានបញ្ជាក់ជាថ្មីថា កិច្ចព្រមព្រៀងអាសិប នៅតែបើកចំហទទួលស្វាគ មន៍ភាគីឥណ្ឌាជានិច្ច នាពេលអនាគតខាងមុខ៕