ដោយៈ គង់ ម៉ាលីនណា
ភ្នំពេញៈ ជាមួយនឹងការងាកចេញពីការវិនិយោគផ្សេងៗ ទីផ្សារហ៊ុនកម្ពុជា កាន់តែមានភាពសកម្មជាងមុន ដោយចំនួនអ្នកបើកគណនីជួញដូរមានការកើនឡើងជាបន្តបន្ទាប់។
ប្រតិភូរាជរដ្ឋាភិបាល ទទួលបន្ទុកអគ្គនាយកផ្សារហ៊ុនកម្ពុជាលោកហុង សុហួរបានមានប្រសាសន៍ឲ្យដឹង កាលពីចុងសប្តាហ៍មុនថា គិតត្រឹមចុងឆ្នាំ២០២៣ ចំនួនគណនីជួញដូរនៅផ្សារហ៊ុនកម្ពុជាបានកើនឡើងដល់៤៩,០០០គណនី ហើយជាមធ្យមមានការចុះឈ្មោះជួញដូរថ្មី កើនឡើង១០០០នាក់រៀងរាល់ខែ។
លោកបន្តថា “ទំហំទឹកប្រាក់ជួញដូរមានចំនួន១០ ទៅ២០ម៉ឺនដុល្លារក្នុងមួយថ្ងៃ ខណៈក្រុមហ៊ុនបោះផ្សាយលក់ មូលបត្រមានចំនួន១១ក្រុមហ៊ុន”។ លោកបន្តថា “នាពេលកន្លងមក ការវិនិយោគលើភាគហ៊ុនមានផលចំណេញប្រសើរ ប៉ុន្តែទាមទារឲ្យអ្នកវិនិយោគមានភាពរហ័សរហួន ក្នុងការតាមដានស្ថានភាពទីផ្សារ និងស្ថានភាពនៃការប្រែប្រួលសេដ្ឋកិច្ចពិភពលោកផងដែរ”។
លោកហុង សុហួរបានបន្តថា ប្រសិនជាយើងមើលទៅប្រទេសជិតខាង ដែលវិស័យមូលបត្ររីកចម្រើន វិស័យនេះ និងវិស័យអចលនទ្រព្យ មានភាពត្រដំត្រសងគ្នា ដោយពេលខ្លះវិស័យអចលនទ្រព្យចំណេញជាង ប៉ុន្តែពេលខ្លះវិស័យមូលបត្រ មានភាពចំណេញជាង ដោយសារតែទីផ្សាររបស់គេធំ។
លោកបន្តថា សម្រាប់បរិបទនៅកម្ពុជា ដោយសារតែទីផ្សារយើងតូច និងទំហំជួញដូរនៅមានកម្រិត ទើបផលចំណេញពីវិស័យមូលបត្រមានផលចំណេញនៅមានកម្រិត ប៉ុន្តែនៅពេលខាងមុខ នៅ ពេលមានក្រុមហ៊ុនចុះបញ្ជីរកាន់តែច្រើន មានក្រុមហ៊ុនបោះផ្សាយលក់មូលបត្រកាន់តែច្រើន ពិសេសវិនិយោគិនបរទេស ចាប់ផ្តើមវិនិយោគលើទីផ្សារហ៊ុនរបស់យើង ពេលនោះហើយទីផ្សារមូលបត្ររបស់យើងនឹងទាក់ទាញអ្នកវិនិយោគកាន់តែច្រើន៕