ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃនៅថ្ងៃអង្គារនេះ ស្របពេលដែលការកើនឡើងនៃភាពតានតឹងនៅក្នុងតំបន់មជ្ឈិមបូព៌ាបានជំរុញឱ្យតម្រូវការមាសសម្រាប់អ្នកវិនិយោគមានការកើនឡើងផងដែរ។
តួយ៉ាង តម្លៃមាស Spot Gold បានងើបឡើង០,៣ភាគរយដល់២០១៩,៩៩ដុល្លារ ក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៤ភាគរយដល់២០៤១,៥០ដុល្លារ ក្នុងមួយអោន។
លោក Yeap Jun Rong អ្នកយុទ្ធសាស្រ្តទីផ្សារនៅក្រុមហ៊ុន IG Group បានលើកឡើងថា “ដោយសារការវិវឌ្ឍផ្នែកភូមិសាស្ត្រនយោបាយនាពេលថ្មីៗនេះ ដែលជំរុញឱ្យភាពតានតឹងអូសបន្លាយរយៈពេលយូរ ដូច្នេះ វានឹងនាំឱ្យតម្រូវការមាសកើនឡើង”។
យោងតាមទិន្នន័យបានបង្ហាញថា នៅក្នុងខែមករា សន្ទស្សន៍តម្លៃទំនិញប្រើប្រាស់(CPI) នៅអាមេរិក បានកើនឡើងក្នុងអត្រាប្រចាំឆ្នាំ៣,១% ដែលខ្ពស់ជាងការរំពឹងទុក បើធៀបនឹងការព្យាករណ៍ក្នុងរង្វង់ត្រឹមតែ២,៩%។
ចំណែក សន្ទស្សន៍តម្លៃអ្នកផលិត (Producer price) របស់សហរដ្ឋអាមេរិក បានកើនឡើង០,៣% កាលពីខែមករា ដែលជាកំណើនខ្ពស់បំផុតមិនធ្លាប់មាន គិតចាប់តាំងពីខែសីហា ឆ្នាំមុន និងខ្ពស់ជាងការព្យាករណ៍ ដែលស្ថិតក្នុងរង្វង់០,១%។
បន្ទាប់ពីចេញផ្សាយទិន្នន័យអតិផរណាទាំង២ ខាងលើនេះ ក្រុមអ្នកវិភាគបានវាយតម្លៃឡើងវិញថា អ្នកបង្កើតគោលនយោបាយរបស់ធនាគារកណ្តាលអាមេរិក (Fed) ប្រហែលអាចពន្យារពេលរហូតដល់ខែមិថុនាខាងមុខ មុនពេលសម្រេចចិត្តកាត់បន្ថយអត្រាការប្រាក់។
ជាក់ស្តែង នៅពេលនេះ ទីផ្សារមើលឃើញឱកាសចំនួន៧៧ភាគរយ នៃការកាត់បន្ថយអត្រាការប្រាក់ ដោយធនាគារកណ្តាលអាមេរិក(Fed) នៅក្នុងខែមិថុនាខាងមុខ។ នេះបើយោងតាមឧបករណ៍ CME FedWatch។
នៅថ្ងៃអង្គារនេះផងដែរ សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណដុល្លារអាមេរិក ធៀបនឹងរូបិយប័ណ្ណគូប្រជែងចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃ០,០៣ភាគរយ ដល់១០៤,៣៣ពិន្ទុ។
តម្លៃលោហៈធាតុប្រាក់ Spot silver បានធ្លាក់ចុះ១,២ភាគរយ ដល់២៣,១២ដុល្លារ ក្នុងមួយអោន ខណៈតម្លៃផ្លាទីនបានធ្លាក់ចុះ០,៣ភាគរយដល់៩០៣,០៤ដុល្លារ ក្នុងមួយអោន ខណៈតម្លៃ palladium បានងើបឡើង០,៧%ដល់៩៥៦,៦៦ដុល្លារក្នុងមួយអោន៕
